Ol nius oli soemaot se plante man oli stap talem ol tok blong agensem narafala, oli mekem ol raf fasin, mo oli faet from we oli no laekem wan grup blong ol man.

•   “Faet we i stap gohed bitwin Isrel mo Gasa i mekem plante man oli kros mo no laekem narafala. Hemia i mekem se naoia long sosol media, ol man oli stap talem plante moa nogud toktok blong agensem narafala i bitim olgeta taem bifo.”—The New York Times, 15 Novemba 2023.

•   “Stat long 7 Oktoba, fasin blong no laekem narafala i kam antap bigwan. Ol man oli stap talem plante rabis tok agensem narafala mo mekem plante raf fasin.”—Dennis Francis, presiden blong United Nations General Assembly, 3 Novemba 2023.

 Longtaem finis i kam, ol man oli stap talem ol rabis tok, mekem ol raf fasin, mo faet. Baebol tu i tokbaot ol man bifo we oli “makem ol man long ol rabis tok blong olgeta we i olsem ol ara,” mo oli mekem ol samting blong spolem ol narafala. (Ol Sam 64:3; 120:7; 140:1) Be Baebol i eksplenem from wanem fasin ya blong no laekem narafala i kam antap moa long taem blong yumi.

 Baebol i tokbaot tu risen from wanem plante man oli no laekem ol narafala.

1.  1. Baebol i talem se long ol las dei, “lav blong plante moa man bambae i kam kolkol.” (Matiu 24:12) Ol man bambae oli no lavem ol narafala, be oli mekem ol fasin we i pulum man blong agensem narafala.—2 Timoti 3:1-5.

2.  2. Devel Setan nao i stap kontrolem wol, taswe plante man oli tekem fasin blong hem blong no laekem narafala. Baebol i talem se “fulwol i stap long paoa blong man ya we i rabis.”—1 Jon 5:19; Revelesen 12:9, 12.

 Be Baebol i soemaot se i no longtaem, God bambae i finisim ol samting we i pulum ol man blong no laekem narafala. Mo tu, bambae hem i mekem se ol man oli no moa harem nogud from fasin ya we narafala i spolem olgeta. Baebol i promes se:

•   God “bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.