Jisas i kasem save long filing we yumi gat taem narafala i spolem yumi. Hemia from we taem hem i stap long wol, ol man oli bin talem ol giaman toktok long saed blong hem, oli wipim hem, oli jajem hem long fasin we i no stret, oli mekem hem i safa, mo oli kilim hem i ded. Nating se hem i no mekem wan samting we i rong, be hem i rere nomo blong ded mo “givim laef blong hem olsem wan ransom, blong pembak plante man oli go fri.” (Matiu 20:28; Jon 15:13) Naoia hem i King blong Kingdom blong God. I no longtaem, bambae hem i finisim ol nogud fasin we ol man oli stap mekem blong spolem ol narafala, mo bambae hem i mekem se i gat jastis long fulwol.—Aesea 42:3.

 Baebol i tokbaot se laef long wol bambae i olsem wanem afta we Jisas i tekem aksen:

•   “Ol man nogud bambae oli lus. Bambae yu lukluk i go long ples we oli stap long hem, be bambae oli no moa stap. Be ol man we oli gat tingting daon bambae oli tekem wol ya i blong olgeta, mo bambae oli glad tumas from oli gat pis we i bigwan tumas.”—Ol Sam 37:10, 11.

 ?Yumi save mekem wanem blong soemaot se yumi tinghae long ol samting we Jisas i mekem finis, mo we bambae hem i mekem long fiuja? Long Luk 22:19, Jisas i talem long ol man blong hem se oli mas tingbaot ded blong hem. Taswe ol Witnes blong Jehova oli joen wanples evri yia, long dei ya we Jisas i ded long hem, blong tingbaot samting we hem i mekem. Mifala i invaetem yu blong joen wetem mifala long Memoriol blong tingbaot ded blong Jisas long Sande 24 Maj 2024.

Faenem Wan Ples Blong Memoriol