!LUKAOT GUD OLTAEM!
Kilim Man From Politik—?Baebol i Talem Wanem?
Tede, raon long wol yumi stap harem nius se plante man oli stap kilim narafala from politik. Ol nius ya oli mekem plante man oli wari.
Long Meksiko, naoia i gat 39 kandidet blong politik we narafala i kilim olgeta i ded, namba ya i go antap moa i bitim bifo. Mo tu, i gat plante moa trabol we i joen wetem politik. Hemia i afektem ol eleksen blong Meksiko long 2023-2024.
Long Yurop tu, i gat plante trabol we i joen wetem politik. Long 15 Mei 2024, wan man i sutum praeminista blong Slovakia blong traem kilim hem i ded.
Long 13 Julae 2024, wan man i sutum Donald Trump we bifo i presiden blong Amerika, blong traem kilim hem i ded. Ol man long Yunaeted Stet oli sek taem samting ya i hapen.
?From wanem i gat plante trabol we i joen wetem politik? ?Wan dei bambae ol trabol ya oli finis? ?Baebol i talem wanem?
Baebol i talem se ol man bambae oli seraot from politik
Baebol i talemaot se long “ol las dei,” hemia long taem blong yumi, fasin blong ol man bambae i kam moa nogud mo hemia i mekem se ol man oli raorao mo oli faet.
“Long ol las dei, laef bambae i strong tumas mo bambae i had blong winim ol trabol. Bambae ol man oli . . . no gat tangkiu, mo oli no holemstrong long ol narafala, . . . oli no save agri long wan tingting, . . . oli wael olgeta, . . . oli putum ol fren blong olgeta long han blong ol enemi, oli stronghed, oli flas gogo tingting blong olgeta i go antap tumas.”—2 Timoti 3:1-4.
Baebol i talemaot tu se long taem blong yumi, ol man bambae oli girap agensem gavman mo bambae i gat plante moa trabol i kamaot from politik. (Luk 21:9, futnot) Be ol trabol ya bambae oli no gohed blong olwe.
Ol trabol we i joen wetem politik bambae i finis
Baebol i talem se God bambae i finisim evri gavman blong man mo gavman blong hem we i stap long heven bambae i rulum wol.
“God blong heven bambae i stanemap wan kingdom we bambae . . . i smasem mo i finisim olgeta [narafala] kingdom ya, mo hem nomo bambae i stanap olwe.”—Daniel 2:44.
Kingdom blong God bambae i mekem se ol man oli joen gud mo i gat pis long olgeta ples long wol.
King blong Kingdom ya hemia Jisas Kraes, mo Baebol i singaot hem se “Prins Blong Pis.” Jisas bambae i meksua se “pis, bambae i no gat en.”—Aesea 9:6, 7.
Olgeta we oli jus blong stap aninit long Kingdom ya, naoia oli stap lanem olsem wanem blong gat pis wetem ol narafala. Taswe Baebol i talem se: “Bambae oli hamarem ol naef blong faet blong olgeta i kam aean blong plao, mo ol spia blong olgeta i kam ol huknaef blong katemaot ol branj. Bambae ol nesen oli no leftemap naef blong faet blong agensem narafala nesen, mo bambae oli no moa lanem blong faet.”—Aesea 2:3, 4.
Blong save moa, ridim atikol ya “?Kingdom Blong God Bambae i Mekem Wanem?” mo wajem video ya ?Wanem Ya Kingdom Blong God?