Baebol i soemaot se King Deved blong Isrel hem i laef bitim 1,000 yia bifo Kraes, mo ol pikinini blong hem oli rul blong plante handred yia. Be sam buk oli talem se Deved i wan kastom stori nomo we ol man oli mekemap afta long taem ya. ?Olsem wanem? ?Deved i wan man we i bin laef bifo?

 Long 1993, Avraham Biran mo tim blong hem oli digim graon long Tel Dan, long not blong Isrel, nao oli faenem wan pis blong ston we raeting long hem i talem se “Haos blong Deved.” Ol toktok long ston ya oli raetem long lanwis blong laen blong Sem, bitim 800 yia bifo Kraes. Ol man ya oli bilif se hem i wan pis blong wan bigfala ston we ol man Aram oli stanemap, blong makem taem we oli winim ol man Isrel long faet.

 Wan stori long Bible History Daily i talem se: “Sam man oli no bilif se ol raeting ya ‘Haos blong Deved’ oli pruvum se Deved i bin laef bifo . . . Be plante man blong stadi long Baebol mo ol man blong faenem ol samting blong bifo, oli agri fulwan se ston we oli faenem long Tel Dan i pruvum se King Deved, we Baebol i tokbaot hem, i bin laef bifo. Hemia i mekem se ston ya i wan long ol samting we oli impoten tumas we BAR [Biblical Archaeology Review] i tokbaot.”