Plante milian man oli bin safa bigwan from weta we i narakaen, mo maet yu yu wan long olgeta. I gat plante kaen weta we i denja mo i save spolem yumi, olsem ol hariken, ol saeklon, bigfala wef blong solwota, ol bigbigfala ren, mo strong win we i spolem ol samting. Bigfala ren i save mekem se hil i brok mo sofmad i kavremap ol haos, mo laetning i save statem ol bigfala faea long bus. Mo tu, draetaem, taem ples i hot bitim mak, mo ol sno long koltaem, i save spolem ol ples.

 Long plante ples long wol, narakaen weta i stap mekem se i gat plante moa disasta, mo oli bigwan moa. International Federation of Red Cross and Red Crescent Societies i mekem ripot ya se: “Namba blong ol man we oli kasem trabol from ol disasta i kam antap moa. Bigfala ren, hariken, mo draetaem, i stap spolem laef blong ol man, mo ol garen blong olgeta, mekem se evri yia, plante milian man oli mas ronwe long ples blong olgeta.”

 Ol trabol olsem i save spolem ol man long bodi mo long filing tu. Oli harem nogud tumas from we oli lusum olting blong olgeta, haos blong olgeta, mo maet wan famle o fren blong olgeta.

 Sipos narakaen weta i mekem trabol olsem long yu, Baebol i save givhan. Baebol i leftemap tingting, i givim hop mo ol gudfala advaes long plante man finis, we oli kasem disasta from narakaen weta. (Rom 15:4) Mo tu, i ansarem ol impoten kwestin we plante man oli wari long olgeta, olsem: ?From wanem God i letem samting ya i hapen? ?Hem i stap panisim mi?

 Baebol i tijim se God i no stap mekem ol man oli safa. Hem i talem se “ol samting nogud oli no save traem God, mo tu God i no save yusum ol samting nogud blong traem ol man.” (Jemes 1:13) Hemia i min se i no God we i stap mekem weta i kam narakaen, blong spolem ol man tede.

 I tru se i gat sam stori long Baebol we God i yusum rabis weta blong spolem sam man nogud. Be hemia i defren long ol narakaen weta tede, we i no gat woning blong hem mo i spolem ol gudfala man wetem ol man nogud. Long ol stori long Baebol, God i protektem ol gudfala man, i givim woning fastaem, mo i eksplenem from wanem hem i mekem samting ya. Olsem nao, God i eksplenem from wanem hem i mekem bigfala wota i ron long taem blong Noa, i givim woning fastaem, mo i protektem Noa mo famle blong hem.—Jenesis 6:13; 2 Pita 2:5.

 Blong save moa long ol disasta tede mo from wanem oli no wan panis we i kam long God, yu luk haf ya “?Baebol i Talem Wanem Long Saed Blong Ol Disasta?”

 Baebol i soemaot se Jehova a God i kea long ol man mo i sore long olgeta. Traem ridim ol vas ya we oli leftemap tingting.

•   Aesea 63:9: “Taem oli stap harem nogud, [God] i harem nogud from.”

   Mining: Jehova i harem nogud tumas taem hem i luk ol trabol we i mekem man i safa.

•   1 Pita 5:7: “Hem i kea long yufala.”

   Mining: Jehova i wari long yu mo i wantem givhan long yu.

 From we Jehova i kea mo i sore long yu, hem i tekem aksen. Hem i yusum Baebol blong kamfotem yu, givim ol gudfala advaes, mo givim wan hop we yu save trastem, se long fiuja bambae i no moa gat ol disasta we narakaen weta i mekem.—2 Korin 1:3, 4.

 Baebol i tokbaot promes blong Jehova “blong givim wan fiuja mo wan hop.” (Jeremaea 29:11) Hem i wantem se ol man oli harem gud blong laef long paradaes long wol, mo oli no fraet long rabis weta.—Jenesis 1:28; 2:15; Aesea 32:18.

 God bambae i yusum Kingdom blong hem, o gavman blong hem long heven we Jisas i hed blong hem, blong mekem nambawan fiuja ya i kamtru. (Matiu 6:10) Jisas i waes mo i gat paoa, taswe hem i save blokem ol disasta we oli kamaot from rabis weta. Taem Jisas i stap long wol, hem i soemaot se hem i gat paoa blong kontrolem weta. (Mak 4:37-41) Hem i kasem save long nid blong ol man mo bambae hem i rul long waes fasin. Bambae hem i tijim ol man blong lukaotgud long envaeronmen mo no spolem ol kriesen raonabaot long olgeta. (Aesea 11:2) Taem Jisas i lidim ol man, ol narakaen weta bambae i no moa spolem yumi.

 Maet yu stap tingting se: ‘?Wetaem Jisas bambae i yusum paoa blong hem blong kontrolem weta?’ Blong faenemaot ansa blong kwestin ya, ridim haf ya “?Wetaem Kingdom Ya Bambae i Rulum Wol?”

 Advaes blong Baebol i save halpem yu bifo we narakaen weta i kam, taem i stap hapen, mo afta.

•   Bifo: Rere gud blong tekem aksen kwiktaem.

   Samting we Baebol i talem: “Man we i tingting gud i luksave we trabol i stap kam, nao i go haed, be man we i no gat ekspiriens, hem i gohed nomo, i no wantem save, mo biaen i safa from.”—Ol Proveb 22:3.

   Mining: Tingbaot ol disasta long saed blong weta we oli save kasem eria blong yu, nao bambae yu rere blong tekem aksen kwiktaem blong protektem famle blong yu.

   Ekspiriens: “Long dei we mifala i ronwe long bigfala faea, mifala i rere. Mifala i gat basket blong mifala we i rere from emejensi, ol meresin, mo ol klos blong mifala. Ol man oli panik, tingting blong olgeta i fasfas. Be mifala i gat evri samting we mifala i nidim. !Mi glad tumas se mifala i rere gud!”—Tamara, California, U.S.A.

•   Taem i stap hapen: Tingbaot samting we i moa impoten.

   Samting we Baebol i talem: “Man i save gat fulap samting, be ol samting ya oli no save givim laef long hem.”—Luk 12:15.

   Mining: Laef i moa impoten i bitim olting.

   Ekspiriens: “Taem hariken Lawin b i spolem haos blong mifala, tingting blong mi i olbaot mo mi no save wanem blong mekem. Be wan samting we mi tingbaot, hemia blong prea long Jehova God wetem fulhat blong mi. Mi luksave se ol samting we mifala i lusum oli no impoten, be laef blong mifala i no lus.”—Lesli, Filipin.

•   Afta: Tingbaot tede nomo, no wari long tumoro.

   Samting we Baebol i talem: “Yufala i no mas wari tumas from ol samting blong tumoro. Ol wari blong tumoro oli blong tumoro.”—Matiu 6:34.

   Mining: Yu no mas wari tumas from ol samting we oli save hapen long fiuja.

   Ekspiriens: “Long hariken Irma, haos blong mi i fulap long wota, nao mi mas mekem plante moa desisen i bitim olgeta taem bifo, taswe mi stres bitim mak. Mi traem blong folem advaes blong Baebol blong tingbaot tede nomo mo no wari long tumoro. Mi luk se taem Jehova i givhan long mi, mi save gotru long ol problem we mi neva ting se mi naf blong gotru long olgeta.”—Sali, Florida, U.S.A.

 Blong kasem moa advaes, luk haf ya “Long Taem Blong Disasta—?Yu Save Mekem Wanem?”