Baebol i talem se taem ol man Isrel oli winim Promes Lan mo oli seraot long ol laen, i gat ten famle blong Manase we oli kasem graon long wes saed blong Jodan Reva, longwe long ol narafala long laen ya. a (Josua 17:1-6) ?I gat wan pruf we i soemaot se samting ya i tru?

 Long yia 1910, oli digimaot sam pis blong ol olfala graonpot long Sameria. Long ol graonpot ya oli raetem long lanwis Hibru, ol samting we ol man oli karem i kam long haos blong king long taon ya. Hemia ol samting olsem waen mo oel. I gat 102 pis blong graonpot evriwan, mo oli blong ol yia 700 bifo Kraes, be i gat 63 nomo we ol raeting blong hem i klia. Taem oli joenem ol save ya we oli faenem long 63 graonpot ya, oli luk se i gat ol det mo nem blong ol famle, nem blong ol man we oli sanem ol samting ya i kam long taon ya, mo nem blong ol man we oli kasem ol samting ya.

 Nem blong ol famle we oli stap long ol graonpot ya, oli blong laen blong Manase nomo. Buk ya NIV Archaeological Study Bible i tokbaot ol graonpot ya se, “antap long ol tok blong Baebol, hemia wan narafala pruf we i soemaot se samting we Baebol i talem blong tokbaot ples we ol famle blong Manase oli laef long hem i tru.”

 Ol graonpot ya blong Sameria oli soemaot tu se samting we buk blong Amos i talem blong tokbaot ol man long taem ya i tru. I se: ‘oli stap yusum ol bigbigfala panikin blong dring waen, mo oli stap yusum ol gudgudfala oel blong ravem long bodi blong olgeta.’ (Amos 6:1, 6) Ol graonpot ya oli soemaot tu se ol man blong narafala kantri oli stap tekem ol samting ya i kam long ples we ol ten famle blong Manase oli laef long hem.