Ol Stamp Blong Bifo—?Oli Blong Wanem?
Ol stamp ya oli smol, mo oli yusum blong prestem wan mak long klei o gris blong kandel (waks) we i sofsof. Oli mekem ol stamp ya long ol defdefren sep, sam oli olsem sep blong kon blong aeskrim, sam oli skwea, sam oli olsem sep blong botel, mo sam oli olsem sep blong hed blong animol. Ol defdefren mak long ol stamp ya oli blong makem se wan pepa i blong hu o blong pruvum se tok blong hem i tru, mo oli save putum tu blong blokem ol basket o ol ples we man i pastru long hem, olsem ol doa o ples blong go insaed long gref.
Wan botel stamp we i soemaot Darias, rula blong Pesia, i stap kilim ol animol, mo wan pis klei we oli rolem stamp ya long hem
Oli wokem ol stamp ya long plante defren samting, olsem bun, laemston, aean, ol sas ston, o wud. Samtaem oli putum nem blong ona blong stamp, mo nem blong papa blong hem. Sam stamp i soem posisen blong ona blong stamp.
Blong pruvum se ol tok long wan pepa i tru, ona blong stamp bambae i prestem stamp ya i go long wan pis klei, gris blong kandel (waks), o wan narafala samting we i sofsof we oli putum long pepa ya. (Job 38:14) Ale samting ya i save kam strong mo i save blokem man blong i no jenisim ol tok we i stap long pepa ya.
Oli Save Yusum Ol Stamp Ya Blong Putumap Wan Man
Wan man i save givim stamp blong hem long wan narafala man, mo hemia i givim raet long man ya blong i save yusum stamp ya long bihaf blong hem. Wan eksampol, hemia Fero blong Ijip bifo mo man Hibru ya Josef, boe blong olfala Jekob. Josef i bin wok slef long Ijip. Mo afta, oli giaman blong putum hem long kalabus. Be biaen, Fero i tekemaot hem long kalabus, mo i leftemap hem, i putumap hem i kam praeminista. Baebol i talem se: “Nao king i gat wan spesel ring blong hem we i stap yusum oltaem blong putum mak blong hem long leta, nao i tekemaot ring ya long fingga blong hem, i putum long fingga blong Josef.” (Jenesis 41:42) From we ring ya i gat wan spesel stamp long hem, naoia Josef i gat raet blong mekem impoten wok blong hem.
Kwin Jesebel blong Isrel bifo i yusum stamp blong hasban blong hem, long plan ya blong hem blong kilim wan man we nem blong hem Nabot. Hem i yusum nem blong King Ahab, blong raetem ol leta i go long sam haeman blong king, i askem long olgeta blong oli talem se Nabot i stap tok nogud long God. Hem i yusum stamp blong king blong stampem ol leta ya, nao hem i win long rabis plan ya blong hem.—1 King 21:5-14.
King Ahasuerus blong Pesia tu i yusum spesel ring blong hem blong putum stamp long ol impoten oda blong hem.—Esta 3:10, 12.
Nehemaea, man ya we i raetem Baebol, i talem se ol prins blong Isrel, ol Livaet mo ol pris oli soemaot se oli agri long wan kontrak we oli raetemdaon, taem oli putum stamp blong olgeta long hem.—Nehemaea 1:1; 9:38.
I gat tu taem we Baebol i talem se oli yusum ol stamp blong blokem ol ples we ol man i pastru long hem. Taem oli sakem profet Daniel i go insaed long hol blong ol laeon, “oli putum wan bigfala ston i blokem maot blong hol ya.” Ale, King Darias, we i rul long Media mo Pesia, “i putum mak blong hem mo mak blong ol haeman blong hem long ston ya blong bambae i no gat man i save tekemaot blong sevem Daniel.”—Daniel 6:17.
Taem oli putum bodi blong Jisas Kraes long gref, ol enemi blong hem “oli putum stamp raon long ston” ya we oli rolem i kam blokem maot blong hol ya. (Matiu 27:66) David L. Turner, we i stadi long buk blong Matiu, i eksplenem se sipos hemia i wan ofisol stamp blong gavman blong Rom, “oli mas mekem stamp ya long klei o gris blong kandel (waks), oli fulumap i go long ol spes bitwin long . . . ston mo maot blong gref.”
Ol stamp blong bifo oli save tijim yumi long plante samting blong bifo, taswe ol man blong digim graon mo ol man blong raetem histri oli intres bigwan long ol stamp ya. Ale, plante man oli spenem taem blong stadi long saed blong ol stamp.
