?Yu yu wari plante from COVID-19 nao yu kam taed tumas? Sipos yes, i no yu wan nomo. Blong plante manis, ol man long fulwol oli mas lan blong laef wetem wari we i kamaot from pandemik ya. Dr. Hans Kluge we i rijenal daerekta blong World Health Organization long Yurop, i talem se plante “oli mekem ol bigfala jenis long laef blong olgeta blong no spredem COVID-19. Long taem olsem, i isi mo i nomol blong no moa intres long ol samting mo tingting i foldaon, mo blong kam taed.”

 Yu no mas letem tingting blong yu i foldaon sipos yu yu kam taed tumas from wari we yu gat long pandemik. Baebol i givhan long plante blong fesem hadtaem ya. Mo i save givhan long yu tu.

•  ?Wanem ya filing blong taed tumas we i kamaot from wari long pandemik?

•  ?From wanem i denja?

•  ?Wanem ol advaes blong Baebol we oli save givhan long yu?

•  Ol vas blong Baebol we oli save givhan

 Hemia i no wan sik, be hem i filing we man i kasem taem samting olsem wan pandemik i jenisim laef blong hem mo i wari tumas from fiuja. Yumi evriwan i defdefren, be hemia sam saen we yumi save gat taem filing ya i kasem yumi:

•   No wantem mekem wan samting

•   No kakae gud mo no slip gud

•   Kam kros kwiktaem

•   Wari tumas from ol smosmol wok

•   Had blong tingting gud

•   Tingting i foldaon

 Filing ya blong taed tumas from pandemik i save spolem yumi mo ol narafala. Sipos yumi no lukaotgud, sloslo yumi save kam slak blong folem ol rul blong blokem COVID. Nao maet yumi no moa tingbaot denja blong vaeras ya we i stap goraon mo i stap kilim ol man i ded. Yumi save kam taed long ol restriksen, mo maet yumi wantem gat moa fridom, be hemia i save putum yumi mo ol narafala long denja.

 Long ol hadtaem olsem, plante oli agri wetem wanem we Baebol i talem se: “Sipos tingting blong yu i foldaon long dei we yu harem nogud, bambae yu no gat naf paoa.” (Ol Proveb 24:10) Baebol i givim plante stamba trutok we oli save givhan long yumi blong fesem ol trabol, olsem pandemik ya.

•   Stap longwe long narafala man be gohed blong toktok long fon

   Samting we Baebol i talem: “Wan tru fren . . . i kamtru long yu long taem blong trabol.”—Ol Proveb 17:17.

   I impoten blong save: Ol trufala fren oli givhan long yumi blong kam strong. (1 Tesalonaeka 5:11) Be taem yumi stap yumi wan oltaem, yumi putum helt blong yumi i stap long denja.—Ol Proveb 18:1.

   Traem hemia: Gohed blong toktok wetem ol fren blong yu long ol video chat, ol fon kol, o imel mo teks mesej. Yu ring i go long ol fren blong yu long ol dei we yu harem nogud, mo yu jekem tu sipos oli oraet. Yufala i save serem ol samting we i givhan long yufala long taem blong pandemik ya. Yu traem faenem sam rod blong mekem i gud long wan fren, ale bae yu luk se hemia i givhan long yu blong kam glad long wan dei we yu harem nogud.

•   Yusum gud taem blong yu

   Samting we Baebol i talem: “Yusum gud taem blong yufala.”—Efesas 5:16.

   I impoten blong save: Taem yu yusum gud taem blong yu, hemia i save givhan long yu blong stap glad mo no wari tumas.—Luk 12:25.

   Traem hemia: Bitim we yu fokas long wanem we yu no moa save mekem, yu traem tingbaot sam samting we yu save mekem naoia. Eksampol, maet yu gat moa taem naoia blong mekem sam wok we yu bin plan from, o gohed long sam samting we yu laekem mekem? ?Yu save spenem moa taem wetem famle blong yu?

•   Folem gud program

   Samting we Baebol i talem: “Olgeta samting oli mas hapen . . . folem plan.”—1 Korin 14:40.

   I impoten blong save: Plante man oli harem gud moa taem oli folem wan program evri dei.

   Traem hemia: Yu save mekem wan program we i stret long situesen blong yu naoia. Makemaot stret taem blong mekem skulwok, wok blong kasem mane, wok long haos, mo stadi Baebol. I gud yu makemaot taem tu blong mekem ol samting we oli save mekem i gud long yu, olsem, spenem taem wetem famle, wokbaot aotsaed, mo mekem eksasaes. I gud we wanwan taem, yu jekem program blong yu bakegen, mo jenisim sipos i gat nid blong mekem.

•   Mekem ol jenis folem weta

   Samting we Baebol i talem: “Man we i tingting gud i luksave we trabol i stap kam, nao i go haed.”—Ol Proveb 22:3.

   I impoten blong save: I dipen long ples we yu stap long hem, maet i gat sam sisen we yu no save go afsaed oltaem blong pulum fres win mo stap long san, we i gud long helt blong yu.

   Traem hemia: Sipos kolkol taem i klosap, yu traem ajastem siting rum mo ples blong wok blong yu blong i kasem san. Nating se ples i kolkol, yu traem plan from ol samting we yu save mekem aotsaed. Sipos i posibol, yu traem karem sam klos blong kolkol, blong yu save spenem moa taem aotsaed.

   Sipos hot taem i klosap, ol man bambae oli spenem moa taem aotsaed, so yu mas lukaot gud. Yu mekem plan blong ol ples we bambae yu go long hem, mo yu jusum ol taem we i no gat tumas man.

•   Gohed blong folem ol rul blong blokem COVID

   Samting we Baebol i talem: “Man we i stupid, i no kea mo i trastem hem wan bitim mak.”—Ol Proveb 14:16.

   I impoten blong save: COVID-19 i kilim man i ded, mo yumi save kasem sipos yumi no moa lukaot gud.

   Traem hemia: Wanwan taem i gud yu jekem ol rul we i kamaot long ples blong yu, mo luk sipos yu stap gohed blong folem olgeta. Yu mas tingbaot se, samting we yu mekem i save spolem yu, famle blong yu, mo ol narafala.

•   Gohed blong fren gud moa wetem God

   Samting we Baebol i talem: “Yufala i mas kam klosap long God, nao hem bambae i kam klosap long yufala.”—Jemes 4:8.

   I impoten blong save: God i save halpem yu blong fesem eni kaen trabol.—Aesea 41:13.

   Traem hemia: Yu ridim wan haf blong Tok blong God, Baebol, evri dei. Hemia bambae i givhan long yu blong statem wan gudfala program blong ridim Baebol.

 Yu save kontaktem ol Witnes blong Jehova blong faenemaot olsem wanem yu save joen long ol miting blong olgeta long taem blong pandemik blong COVID-19. Eksampol, long fulwol oli joen long fon o video blong mekem ol miting blong olgeta, lafet blong tingbaot ded blong Jisas, mo bigfala asembli.

 Aesea 33:24: “Bambae i no gat wan man long ples ya i talem se: ‘Mi mi sik.’”

 Mining: God i promes blong endem evri sik.