“Wan bigfala problem we ol yangfala oli stap fesem tede, hemia se oli wari bitim mak mo tingting blong olgeta i trabol. Mifala i faenemaot se sosol media nao i men samting we i stap spolem olgeta.”—Dokta Vivek Murthy we i hed blong ol dokta long Yunaeted Stet, New York Times, 17 Jun 2024.

 ?Ol perens oli save mekem wanem blong sosol media i no spolem ol pikinini blong olgeta? Baebol i givim ol gudfala advaes we i save givhan.

 Tingbaot ol advaes ya blong Baebol.

 “Man we i tingting gud, hem i skelem gud wanwan step blong hem.”—Ol Proveb 14:15.

 From we sosol media i save spolem pikinini blong yu, yu no mas kwik blong letem hem i yusum sosol media jes from we ol narafala oli stap yusum. Be i gud yu tingting gud fastaem se: ‘?Bambae hem i naf blong folem ol rul we yu putum mo no spenem tumas taem long sosol media? ?Bambae hem i gohed yet blong joen gud wetem ol narafala? ?Bambae hem i no wajem ol samting we oli no stret?’

•   Blong save moa, ridim ol atikol ya “?I Stret Blong Letem Pikinini Blong Mi i Yusum Sosol Media?” mo “Tijim Tineja Blong i Stap Sef Long Sosol Media.”

 “Yusum gud taem blong yufala.”—Efesas 5:16.

 Sipos yu letem pikinini blong yu i yusum sosol media, i gud yu putum sam rul blong hem i folem, mo yu eksplenem olsem wanem ol rul ya oli save protektem hem. Biaen, sipos yu luksave se sosol media i stap jenisim fasin blong pikinini blong yu, i gud yu putum sam moa rul blong hem i no yusum tumas sosol media.

•   Yusum video ya Yu Mas Waes Taem Yu Gat Ol Fren Long Intenet blong halpem pikinini blong kasemsave from wanem hem i mas lukaot gud taem hem i yusum sosol media.

 Baebol i talemaot se long taem blong yumi, “laef bambae i strong tumas mo bambae i had blong winim ol trabol.” (2 Timoti 3:1-5) Be Baebol i tokbaot tu ol gudfala advaes we i save givhan long yumi blong winim ol trabol ya. Long atikol ya we i tokbaot ol yangfala we tingting blong olgeta i trabol, yu save faenem wan lis we i gat bitim 20 narafala atikol blong givhan long ol perens mo ol yangfala.