?Yu yu gat gudfala tingting long saed blong fiuja? Nating se i gat ol bigfala problem tede, plante man oli traem holem gudfala tingting. ?Be yumi save ekspektem se ol samting bambae oli kam gud moa? !Yes! Baebol i givim trufala hop blong wan gudfala fiuja.

•  ?Baebol i givim wanem hop?

•  ?Hop we Baebol i tokbaot i wan drim nomo?

•  ?Olsem wanem hop ya bambae i kamtru?

•  ?Wetaem hop ya bambae i kamtru?

•  ?Olsem wanem hop ya blong Baebol i save givhan long yu tede?

 Baebol i agri se ol man oli gat ol bigbigfala problem. Be Baebol i promes tu se ol problem ya bambae oli no gohed blong olwe. Tingbaot sam eksampol.

•   Problem: No gat haos

   Samting we Baebol i talem: “Bambae oli bildim ol haos mo oli stap long olgeta.”—Aesea 65:21.

   Hemia i min se long fiuja: Ol man bambae oli gat prapa haos blong olgeta.

•   Problem: No gat wok mo oli pua

   Samting we Baebol i talem: “Ol man blong mi we mi jusumaot olgeta, bambae oli harem gud fulwan long ol wok blong han blong olgeta.”—Aesea 65:22.

   Hemia i min se long fiuja: Ol man bambae oli gat wok we oli harem gud long hem.

•   Problem: No gat jastis

   Samting we Baebol i talem: “Ol prins bambae oli rul blong i gat jastis.”—Aesea 32:1.

   Hemia i min se long fiuja: Nomata se man i gat defren kala blong skin, i gat haenem o nogat, i pua o i rij, be bambae hem i kasem jastis. Bambae ol man oli mekem i stret long olgeta.

•   Problem: No gat gudfala kakae mo hanggri

   Samting we Baebol i talem: “Bambae i gat fulap garen blong sid long olgeta ples long wol, bambae oli kavremap top blong ol bigfala hil gogo i kafkafsaed.”—Ol Sam 72:16.

   Hemia i min se long fiuja: Bambae evriwan i gat plante gudfala kakae. Bambae i no moa gat man we i hanggri o i no kakae gud.

•   Problem: Fasin blong brekem loa mo raf fasin

   Samting we Baebol i talem: “Bambae olgeta wanwan oli sidaon aninit long figtri mo rop blong grep blong olgeta, mo bambae i no gat man i save mekem olgeta oli fraet.”—Maeka 4:4.

   Hemia i min se long fiuja: Evriwan bambae oli stap sef mo oli no fraet, from we ol man nogud bambae oli lus, mo “ol stret man bambae oli tekem wol ya i blong olgeta.”—Ol Sam 37:10, 29.

•   Problem: Bigfala faet

   Samting we Baebol i talem: “Bambae ol nesen oli no leftemap naef blong faet blong agensem narafala nesen, mo bambae oli no moa lanem blong faet.”—Aesea 2:4.

   Hemia i min se long fiuja: Bambae i gat pis long fulwol. (Ol Sam 72:7) Bambae i no moa gat man i krae from we wan famle blong hem i ded long faet, o man we i mas ronwe long ples blong hem from faet.

•   Problem: Ol strong sik

   Samting we Baebol i talem: “Bambae i no gat wan man long ples ya i talem se: ‘Mi mi sik.’”—Aesea 33:24.

   Hemia i min se long fiuja: Ol man bambae oli no moa sik o handikap. (Aesea 35:5, 6) Baebol i promes tu se “bambae i no moa gat man i ded.”—Revelesen 21:4.

•   Problem: Spolem wol

   Samting we Baebol i talem: “Draeples mo graon we i drae we i drae bambae tufala i harem gud, mo drae ples bambae i glad mo i gat plante flaoa long hem olsem flaoa ya safron.”—Aesea 35:1.

   Hemia i min se long fiuja: Fulwol bambae i kam wan naesfala paradaes blong ol man oli laef long hem, olsem God i wantem fastaem.—Jenesis 2:15; Aesea 45:18.

 Maet yu olsem plante narafala man we oli harem olsem. Be i gud yu lukluk moa long ol tok we Baebol i talem long saed blong fiuja. ?From wanem? Ol promes long Baebol oli defren long ol promes blong man mo ol samting we man i talem long saed blong fiuja. Ol promes long Baebol oli kamaot long God. Traem luk risen from wanem oli defren:

•   Yumi save trastem God. Baebol i talem se God “i no save giaman.” (Taetas 1:2) Mo tu, God nomo i naf blong talemaot fiuja. (Aesea 46:10) I gat plante eksampol long Baebol blong soemaot se oltaem samting we God i talemaot i kamtru. Blong save moa, traem wajem video ya ?From Wanem Yumi Bilif Se Baebol i Kamaot Long God?

•   God i gat paoa blong stretem ol problem blong yumi. Baebol i talem se God i gat paoa blong “mekem olgeta samting we hem i wantem mekem.” (Ol Sam 135:5, 6) Hemia i min se, i no gat wan samting i save blokem God blong mekem ol promes blong hem oli kamtru. Mo tu, God i wantem halpem yumi from we hem i lavem yumi.—Jon 3:16.

 Ating yu stap askem se: ‘Sipos God i wantem halpem yumi mo i gat paoa blong halpem yumi, ?from wanem yumi stap kasem plante problem yet?’ Blong faenem ansa blong kwestin ya, traem wajem video ya ?From Wanem God i Letem Ol Man Oli Safa?

 God bambae i yusum Kingdom blong hem, wan gavman long heven, blong mekem ol promes blong hem oli kamtru. Hem i putumap Jisas Kraes olsem King blong Kingdom ya, mo hem i givim paoa long hem blong i lukaot long wol mo ol man blong hem. Taem Jisas i stap long wol, hem i mekem ol sikman oli kam gud bakegen, hem i givim kakae long ol man we oli hanggri, hem i kontrolem weta, mo hem i mekem dedman i laef bakegen. (Mak 4:39; 6:41-44; Luk 4:40; Jon 11:43, 44) Long rod ya, hem i soemaot samting we bambae hem i mekem taem hem i rulum wol olsem King blong Kingdom blong God.

 Traem wajem video ya ?Wanem Ya Kingdom Blong God? blong save moa olsem wanem Kingdom blong God bambae i givhan long yu.

 !Klosap nao hop ya bambae i kamtru! ?Olsem wanem yumi save sua long samting ya? Baebol i talemaot ol samting we oli olsem saen blong soemaot se Kingdom blong God bambae i stat blong rulum fulwol. (Luk 21:10, 11) Ol samting ya we Baebol i talemaot oli stap hapen naoia long wol.

 Blong save moa, traem ridim haf ya, “?Wetaem Kingdom Blong God Bambae i Rulum Wol?”

 Wan man blong raetem Baebol i talem se hop ya i olsem “wan angka blong holem sol blong yumi.” (Hibru 6:19) Olsem wan angka i holem sip taem solwota i raf, trufala hop we Baebol i givim long saed blong fiuja i save mekem yumi strong taem yumi kasem ol problem tede. Hop ya i save mekem se filing mo tingting blong yumi i stap kwaet, mo tu i save mekem se yumi harem gud long bodi.—1 Tesalonaeka 5:8.