Wo long Yukren mo klaemet jenis i gohed blong mekem se kakae i sot long plante ples long wol. Samting ya i hapen moa long ol pua kantri, we plante man oli stap traehad evri dei blong kasem naf kakae.

•   “Wo, klaemet jenis, mo praes blong ol samting olsem fuel mo lektrik we i go antap, i mekem se kakae i no save gru gud, mo plante man oli no save kasem.”—António Guterres, Sekretari-Jenerol blong Yunaeted Nesen, 17 Julae 2023.

•   “Ol man we oli gat save long saed ya, oli talem se from we Rasia i no moa wantem joen long agrimen long saed blong sanem sid i go long ol narafala kantri, hemia i mekem trabol blong kakae long fulwol i kam bigwan moa. Mo tu, i mekem se long ol pua kantri praes blong kakae i go antap, speseli long Not Afrika mo Medel Is.”—Atalayar.com, 23 Julae 2023.

 Traem tingbaot samting we Baebol i talem long saed blong bigfala trabol blong kakae mo fiuja blong yumi.

•   Jisas i talemaot se: “Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. Mo olbaot long wol bambae kakae i sot.”—Matiu 24:7.

•   Buk blong Revelesen i tokbaot pijatok blong fo man blong ron long hos. Wan long olgeta i pija blong ol wo. Narawan we i ron biaen long hem, i pija blong kakae i sot mo praes blong kakae i go antap. Baebol i talemaot se: “Mi luk wan blak hos, mo man we i sidaon long hem, hem i holem skel long han blong hem. Nao mi harem wan samting we i olsem wan voes . . . i talem se: ‘!Wan kwot blong wit, hemia pei blong wan man blong fuldei! Tri kwot blong bale, hemia tu i pei blong wan man blong fuldei.’”—Revelesen 6:5, 6, Contemporary English Version.

 Ol profet tok blong Baebol long saed blong bigfala trabol blong kakae, oli stap kamtru naoia, long taem ya we Baebol i kolem se “ol las dei.” (2 Timoti 3:1) Blong save moa long saed blong “ol las dei” mo ol fofala man long Revelesen we oli ron long hos, wajem video ya Ol Samting Long Wol Oli Jenis Stat Long 1914 mo ridim atikol ya “Ol Fo Man Ya Long Hos ?Oli Hu?”

•   I gat ol gudfala advaes long Baebol we i save halpem yumi blong gotru long ol hadtaem ya, we praes blong kakae i go antap mo kakae i sot. Yu save luk sam eksampol long atikol ya “Laef Wetem Smol Mane Nomo.”

•   Mo tu, Baebol i givim hop se ol samting bambae oli kam gud. Hem i promes se “bambae i gat fulap garen blong sid long olgeta ples long wol,” mo evriwan bambae oli gat plante kakae. (Ol Sam 72:16) Blong save moa long saed blong hop ya blong fiuja mo from wanem yu save trastem, ridim atikol ya “Trufala Hop Blong Wan Gudfala Fiuja.”