Long plante kantri, laef i had from we praes blong evri samting i stap kam antap. Be ol Witnes blong Jehova oli no wari bitim mak, from we oli save se Jehova ‘bambae i neva livim’ ol man blong hem. (Hibru 13:5) Bakegen mo bakegen, Jehova i holem promes ya. Hem i mekem olsem long kantri blong Filipin, we plante man oli pua tumas. Long ol yia 1970 mo 1980, ol man long kantri ya oli fesem hadtaem.

 Wan sista we nem blong hem Vicky, a i talem se: “Samtaem mi krae from we mi no gat kakae. Maet mifala i gat raes, sol mo wota nomo.” Brata Florencio i no save faenem wok. Hem i talem se: “Mi gat tri sot mo tri traoses, we mi gohed blong werem oltaem long ol miting mo asembli.” ?Ol man blong Jehova oli mekem wanem? ?Wanem i givhan long olgeta blong oli gohed strong long wok blong Jehova? ?Mo olsem wanem eksampol blong olgeta i save halpem yumi tede, blong fesem ol hadtaem long fiuja?

 Ol Witnes long Filipin oli save se Jehova bambae i lukaot long olgeta long had taem ya. (Hibru 13:6) Mo hemia nao samting we i hapen. Plante taem oli kasem help long rod we oli no tingbaot. Sista Cecille i tingting bak long samting we i hapen long hem, i se: “Mifala fo long famle, mifala i kukum laswan kap blong raes long moning. Afta, mifala i prea long Jehova blong i givim samting we mifala i nidim long dei ya. Taem mifala i stap kakae raes ya yet, wan brata i kamtru wetem faef kilo raes. Mifala i krae from glad mo from blesing ya we Jehova i givim. I gat plante moa samting olsem i hapen long mifala.”

 Mo tu, ol man blong God oli folem waes advaes blong Baebol. (Ol Proveb 2:6, 7) Tingbaot Sista Arcelita we i jes baptaes. Hem i no mared, mo i had blong hem i kasem ol samting we hem i nidim blong laef. Ale hem i tokbaot trabol ya long Jehova. Biaen, hem i tingting long Ol Proveb 10:4, we i talem se: “Han we i slak, bambae i mekem man i kam pua, be han we i wok had, i mekem man i kam rij.” Nao hem i mekem desisen blong planem wan garen. Hem i talem se: “Jehova i blesem hadwok blong mi. Mi kasem kakae we mi nidim mo antap long hemia, mi salem sam kakae blong pem transpot blong mi.”

 Ol brata oli no gat mane blong pem graon mo bildim ol Haos Kingdom. Be hemia i no blokem olgeta blong oli no obei long ol tok blong Baebol blong kam wanples long ol miting blong lefleftemap tingting blong olgeta. (Hibru 10:24, 25) Oli faenem wan narafala rod. Sista Deborah i talem se: “Mifala sikis i joen long ol miting long wan smol haos we mi mo sista we i paenia wetem mi, mitufala i bildim. Mitufala i yusum ol lif blong pamtri blong mekem ruf, ol lif kokonas blong wokem ol wol, mo stamba blong pamtri blong mekem ol jea blong sidaon long olgeta.”

 Be bighaf blong ol brata mo sista oli joen blong mekem miting long haos blong wan brata o sista. Sista Virginia i talem se: “Smol haos blong mifala, mifala i bin wokem long gras mo bambu. Evri Sarede, mifala i muvumaot evri samting long haos ya blong mekem ples blong miting long nekis dei.” Ruf blong wan narafala haos i lik. Brata Noel i talem se: “Taem i ren, mifala i putum ol baket long ol ples we i lik. Be mifala i no tingbaot hemia olsem wan hadtaem, from we mifala i harem gud tumas blong joen wetem ol brata mo sista.”

 Ol Witnes oli no gat plante samting, be hemia i no slakem olgeta long wok blong prij. Lindina, we i stap long aelan blong Negros, i talem se: “I gat 9 pikinini long famle blong mifala mo Papa nomo i wok. Taswe plante taem mifala i no gat mane blong pem transpot, ale mifala i wokbaot nomo i go long teritori blong prij. Be mifala i harem gud, from we mifala i plante. Mo tu, mifala i save se Jehova i glad taem mifala i traehad olsem.”

 I had moa blong go antap long ol bigfala hil blong prij, from we i no gat plante pablik transpot. Esther we i stap long aelan blong Luzon, i talem se: “Grup blong mifala we maet i gat 6 kasem 12 Witnes long hem, i aot long haos long eli moning from we mifala i mas wokbaot plante kilometa. Mifala i gohed fuldei blong prij. Mifala i karem kakae we i tan finis, mo mifala i sidaon long sado blong ol tri blong kakae. Sam brata mo sista oli no gat kakae. Be hemia i no blokem olgeta, mifala i talem long olgeta se: ‘Yufala i no wari. Mifala i gat naf kakae blong yumi evriwan.’”

 Jehova i blesem bigwan ol brata mo sista ya we oli rere blong lego evri samting blong mekem wok blong Hem. Long 1970, i gat 54,789 pablisa long Filipin. Long 1989, namba ya i kam antap kasem 102,487. Long 2023, namba blong ol man blong talemaot Kingdom long Filipin i kasem 253,876.

 Nating se ol Witnes oli pua, be oli hapi mo bisi long wok blong Jehova. Brata Antonio i talem se: “Nating se mifala i pua, mifala i lavem Jehova.” Sista Fe Abad i talem se: “Taem mi mo hasban blong mi i no gat plante samting, mifala i stap klosap long Jehova mo mifala i harem gud long laef blong mifala we i no fasfas. From samting ya, ol pikinini blong mitufala tu i lanem blong trastem Jehova.”

 Lucila we i laef long Samar Aelan, i talem se: “Fasin pua i no wan problem taem yumi putum tingting i stap nomo long wosip blong Jehova.” Hem i gohed se: “Taem mifala i putum God i stap long fasples long laef blong mifala, mifala i harem gud mo holem wan gudfala tingting. Mi mi kasem bigfala glad taem mi luk we ol Baebol stadi blong mi oli stap save Jehova, mo biaen oli joenem mi long wok blong paenia.”

 Yumi save se bambae yumi fesem ol hadtaem long fiuja, taswe i gud yumi tingbaot ol tok blong wan elda we nem blong hem Rodolfo. Hem i raetem se: “Taem mifala i pastru long hadtaem long ol yia 1970 mo 1980, mi haremsave han blong Jehova long laef blong mi. Nating se mi no gat mane, mi harem gud. Jehova i lukaot gud long mi. Mi gat wan gudfala laef naoia, mo mi stap wet long ‘laef ya we i prapa wan’ long Paradaes long fiuja.”—1 Timoti 6:19.