Ol Baebol Studen we biaen oli karem nem ya ol Witnes blong Jehova, oli go prij long ol man Meksiko long 1917. Hemia faswan taem we oli traehad blong go prij long ol man ya we oli glad blong welkamem narafala. Long ol yia biaen, plante handred long ol gudfala man ya oli stat blong wosipim Jehova. Be long Wol Wo Tu, gavman blong Meksiko i gat wan problem wetem ol ples mo ol bilding we yumi stap prij long hem mo holem ol miting.

 Long taem ya, loa blong Meksiko i talem se evriwan we oli stap mekem wosip long pablik ples oli mas mekem nomo long ol bilding blong gavman. Hemia i wan problem from we mifala i stap holem ol asembli long ol pablik ples, mo mifala i mekem ol miting long haos blong ol brata sista, mo mifala i prij long ol rod mo long ol haos wanwan.

 Blong folem loa ya, long 1943 mifala i rejista olsem wan oganaesesen we i no kasem mane mo wan grup we i tijim ol man blong halpem olgeta blong gat wan gudfala laef. From we mifala i rejista, naoia mifala i gat raet olsem wan oganaesesen we i tijim ol man be i no wan relijen. From samting ya, mifala i no moa joen o prij nomo long ol bilding blong gavman.

 Ol aktiviti blong mifala i joen wetem ol samting long saed blong edukesen mo laef blong ol man. Yes, mifala i obei gud long loa blong gavman long saed blong raet blong wan oganaesesen we i tijim ol man. (Rom 13:1) Nating se i olsem, mak blong mifala i sem mak yet, hemia blong tijim ol man long trutok blong Baebol. (Aesea 48:17, 18) Biaen, mifala i luksave se Jehova i blesem niufala rod ya. Hemia i mekem se plante moa man oli kam long trutok, mo tede plante long ol Witnes oli stap tingbaot yet taem ya.

 Wok we i impoten moa long mifala long Meksiko hemia blong talemaot gud nius blong Kingdom. Be olsem aposol Pol, mifala i jenisim fasin blong mifala blong prij, folem situesen we i stap. (1 Korin 9:20-23) Eksampol, taem Pol i toktok wetem ol man Atens long Areopagus, hem i no tokbaot stret ol vas blong Baebol. (Ol Wok 17:22-31) Long sem fasin, taem mifala i prij mifala i no stap karem Baebol wetem mifala o statem storian wetem wan vas blong Baebol.

 Isabel i tingtingbak mo i se: “Mifala i talemaot se mifala i representem wan grup we i stap givhan mo tijim ol man. Plante taem, mi yusum ol atikol we i stap long Wekap! we i no tokbaot stret ol vas blong Baebol.” ?Olsem wanem sipos man blong haos i wantem save moa long saed blong God? Sipos i olsem mifala i serem trutok blong Baebol wetem hem. Aurora i talem se: “From we mifala i no karem Baebol, mifala i mas lanem baehat plante vas.” Ol man blong haos oli glad tu taem mifala i soem ol vas long prapa Baebol blong olgeta.

 Mifala i save olsem wanem blong eksplenem long wan man we i kwestinim raet blong mifala blong mekem wok ya. (Filipae 1:7) I gat sam narafala samting tu we gavman i mekem we i givhan long mifala. a María i se: “Oltaem mifala i wokbaot wetem wan ID kad we Sekretari Blong Foren Afea i saen long hem.” Samuel i talem se: “Taem ol man blong gavman oli stopem mifala mo oli askem se mifala i stap mekem wanem, mifala i soem ID kad blong mifala.”

 ID kad blong mifala i rili halpem mifala taem mifala i fesem fasin agens. Eksampol, Jesús we i stap prij long Jalisco Stet, i se: “Long 1974, wan pris i lidim wan grup blong ol man nao oli holem mi wetem wan narafala kapol we oli Witnes, mo oli tekem mifala i go long ol haeman blong gavman blong traem stopem wok blong mifala. Ale mifala i soem ID kad blong mifala long ol haeman ya, nao evriwan oli no moa kros. Afta we mifala i kasem raet blong mifala folem loa, mifala i gohed bakegen blong halpem ol man we oli intres long eria ya. Tede, i gat sam kongregesen long taon ya.”

 From we mifala i wan oganaesesen we i sapotem edukesen, mifala i mekem ol fri kos blong tijim ol man blong oli save rid mo raet. b Ariel i talem se: “Plan ya i kamaot long stret taem. Long ol yia ya, plante man oli no bin go long skul, be nating se i olsem oli rili wantem ridim Baebol. Taem mifala i tijim olgeta blong rid mo raet, smoltaem afta, plante oli stat blong stadi Baebol wetem mifala.”

 Ruth i tingtingbak mo i se: “Taem ol studen blong mifala oli save olsem wanem blong talemgud sam wod, i nogat wan samting i save stopem olgeta. Filing ya blong save rid, i mekem oli harem se oli bin mekem wan impoten samting mo oli rili glad. Mifala i gat janis ya blong luk olsem wanem oli gohed gud long saed blong spirit.”

 Long medel blong yia 1943 mo 1993, ol Witnes blong Jehova oli rejista olsem wan oganaesesen mo wan grup blong tijim man. Long taem ya, mifala i halpem bitim 127,000 man blong oli save rid mo raet, mo bitim 37,000 narafala blong oli kamgud moa long fasin ya. Ol haeman blong gavman oli presem mifala from samting we mifala i mekem blong givhan long ol man blong rid mo raet. (Rom 13:3) Eksampol, long 2010 oli givim wan praes long mifala from “bigfala wok we mifala i bin mekem plante yia finis blong halpem plante taosen man blong rid mo raet, hemia i mekem laef blong ol man Meksiko i kamgud.”

 From we mifala i gat raet olsem wan oganaesesen we i tijim man, mifala i arenjem ol ples blong miting blong mifala olsem wan klasrum mo mifala i singaot ol ples ya se Ples Blong Tijim Man. Hemia nao ples we mifala i stap mekem ol miting mo tijim ol man blong rid mo raet.

 Ángel i eksplenem se: “Plante taem mifala i rerem ol ples olsem long haos blong ol brata sista, mo plante long olgeta oli nogat plante samting. Mi rili tinghae long traehad blong olgeta. Nating se haos blong olgeta i smol, be oli glad nomo blong laef long wan haf, mo letem mifala i mekem miting long nara haf.”

 Ol sakrefaes olsem oli givhan bigwan. Long saed blong ol miting, Ángel i talem se: “Samtaem, fulap man oli kam long miting, so plante long mifala i stanap aotsaed nomo. Mo blong givim wan ansa mifala i mas pusum hed long windo nomo. Nating se i olsem, mifala i rili enjoem ol miting.”

 Blong mekem se mifala i no kasem trabol, long taem blong ol miting mifala i no singsing mo prea strong. Edmundo i talem se: “Long taem blong ol Tok Blong Tijim Man, we naoia yumi kolem ol pablik tok, brata bambae i eksplenem olsem wanem yumi save folem ol save blong Baebol. Hemia i givhan long ol man blong gat wan gudfala laef mo frengud wetem narafala.” Mo long taem ya, mifala i no moa talem nem blong ol buk long Baebol. ?Olsem wanem oli tokbaot ol vas? Manuel i talem wan eksampol i se: “Insted blong tokbaot Revelesen japta 21, vas 3 mo 4, mifala i talem wan samting olsem, ‘Buk 66, 21, 3 mo 4.’” Moises wan narafala Witnes i gohed i se: “Hemia i minim se mifala i mas lanem ol namba we oli stret long ol buk blong Baebol blong save faenem ol vas.”

 Blong talem stret, plan we oganaesesen blong mifala long Meksiko i folem i sem mak long samting we i stap hapen long ol narafala ples long wol. Nating se oli putum tabu long wosip blong mifala, i klia nomo se Jehova i stap blesem ol wok ya mo ol man blong hem. Long 1943 mifala i rejista olsem wan grup we i gat raet blong tijim ol man, long taem ya i gat 1,565 pablisa nomo long Meksiko. Mifala i kasem raet olsem wan relijen long 1993. Long yia ya namba blong ol pablisa i go antap kasem 366,177. Wok we ol pablisa ya oli mekem i mekem se plante moa man oli kam long trutok. Long 2021, namba blong ol pablisa long Meksiko i go antap kasem 864,633. ?Wanem ol lesen we yumi save lanem long histri blong ol Witnes long Meksiko?

 Mekem ol jenis taem i gat ol hadtaem. Taem mifala i folem rod ya long Meksiko, hemia i mekem se loa i akseptem mifala mo mifala i save gohed long ol wok blong mifala blong 50 yia. Mario i talem se: “Samtaem mi stap tingting se from wanem mifala i no save wosipim Jehova sem mak olsem ol narafala kantri. Nating se i olsem, mi neva harem ol narafala oli kwestinim daereksen we i kam long oganaesesen. Mifala i bilif se Jehova nao i stap lidim ol man blong hem. Taswe, mifala i glad nomo blong obei.”

 Fokas long wok blong Jehova. Guadalupe i eksplenem se: “From we mifala i bisi oltaem long wok blong prij, hemia i mekem se mifala i no wari tumas long ol narafala samting. Mifala i haremgud nomo blong gohed long wok blong Jehova. Hemia nao samting we i impoten moa long mifala.”

 Stap klosap long ol narafala Kristin. Anita i talem se: “Mifala i no save singsing long ol singsing blong miting long Ples Blong Tijim Man, be mifala i save singsing long haos blong mifala. Mifala i gohed blong joen tugeta mo spenem taem tugeta. Taem mifala i mekem olsem, oltaem mifala i tokbaot ol samting long saed blong spirit we i save leftemap tingting blong mifala.”

 Florentino i talem se: “Taem mi tingtingbak long ol samting we i hapen, mi bilif se evri samting ya oli hapen long stret taem mo stret ples, mo oli blong tijim yumi. Mi luk klia se nating we ol man oli agensem wok blong yumi, be Jehova nao i stap lidim ol wok ya.”