Faswan program blong niufala radio stesen blong ol Baebol Studen a we nem blong hem WBBR, hemia long Sande naet, 24 Februari 1924. ?Program ya i olsem wanem? ?Hu i lesin long hem? ?Mo olsem wanem ol Witnes blong Jehova oli gohed blong yusum ol niufala teknoloji blong talemaot “gud nius ya blong Kingdom long olgeta ples long wol”?—Matiu 24:14.

 Program ya we i blong tu aoa, i stat long 8:30 long naet, mo oli mekem long wan niufala bilding long Staten Aelan, New York. Brata we i meksua se saon i stret, Ralph Leffler, i tingtingbak mo i talem se, “evriwan long radio stesen ya oli stap seksek mo wari.” Hem tu i stap tingbaot se: “?Bambae ol man oli save harem mifala?” Hem i talem se: “Mi onem paoa mo program i stat. Mifala i hop nomo se evri samting bambae i wok gud.”

 Jeaman blong impoten program ya, hemia maneja blong radio stesen, Brata Victor Schmidt. Hem i talemaot se sam Baebol Studen we oli gat gudhan blong plei miusik mo singsing, bambae oli statem program ya. Fastaem, wan brata i plei piano. Biaen, Cora Wellman i singim “Naenti Naen,” hemia parabol blong Jisas long saed blong man blong lukaot long sipsip we i lusum wan sipsip blong hem. (Luk 15:4-7) Sam narafala tu oli singsing mo plei miusik, wan long olgeta hemia Frederick W. Franz, we i singim “Man We i Tanem Tingting,” hemia stori blong boe we i lusum rod.—Luk 15:11-25.

 Joseph F. Rutherford, we i stap lukaot long wok blong ol Baebol Studen long taem ya, i givim wan tok blong eksplenem se radio stesen ya i blong “givhan long wok blong kingdom blong Mesaea.” Hem i talem se: “Jehova i letem ol man oli wokem radio, mo i sua se hem i wantem we yumi yusum rod ya blong talemaot olsem wanem ol nambawan profet tok blong hem oli stap kamtru.”

 Plante man long not is Yunaeted Stet i harem faswan program ya. Wan man long Morrisville, Vermont, we i moa long 320 kilometa longwe long radio stesen, i talem se: “Mi glad blong sanem ripot long program ya we mi lesin long hem. . . . Voes blong Rutherford i nambawan. . . . Evri wod i klia gud.” !Wan man we i stap farawe long Monticello, Florida, hem tu i harem program ya! Niufala radio stesen ya i wok gud, mo plante man oli sanem leta blong talem tangkiu.

 Oli gohed blong yusum radio stesen ya blong 33 yia, b blong talemaot gud nius blong Kingdom, speseli long not is blong Yunaeted Stet. Mo sam samtaem WBBR i joen wetem sam narafala radio stesen, hemia i mekem se gud nius i kasem plante milian man long Yunaeted Stet, Kanada, mo sam narafala ples farawe. 1975 Yearbook of Jehovah’s Witnesses i talem se: “Long 1933, i gat 408 radio stesen we oli bin talemaot 23,783 Baebol tok long plante ples long wol . . . Ol program blong Wajtaoa oli stap gohed long plante defren radio stesen long semtaem nomo. Ol man long evri ples oli save lesin long radio blong harem ol trutok we i presem God.”

 Taem ol Baebol Studen oli stat blong yusum WBBR, i gat 1,064 man blong talemaot Kingdom long Yunaeted Stet. Ol program long radio oli halpem smol grup ya blong talemaot gud nius long plante moa man, ale namba blong olgeta i kam antap. Long 1957, i gat 187,762 man blong talemaot Kingdom long Yunaeted Stet mo 653,273 long fulwol. Mo tu, ol brata mo sista ya oli stap kasem trening long ol miting blong kongregesen, blong kam gud moa blong prij long ol haos wanwan, mo long ol narafala rod blong prij.

 From ol gudfala frut we i stap kamaot, ol brata we oli lukaot long oganaesesen oli stat blong tingbaot se maet wok blong prij long ol haos wanwan i givhan moa long ol man i bitim ol program long radio. Ale, long 15 Eprel 1957, oli salem laswan radio stesen we Wajtaoa Sosaeti i gat, hemia WBBR. Wan dei bifo, long wan spesel program we oli mekem long radio stesen ya, oli askem long Nathan H. Knorr from wanem oli salem. Hem i eksplenem se naoia namba blong ol Witnes blong Jehova i stap kam antap moa from wok blong prij long ol haos wanwan. Hem i talem tu se: “Ol program long WBBR oli halpem plante man. Be namba blong ol man we oli joenem ol Witnes blong Jehova long ol ples we WBBR i kasem, i no bitim namba we oli joen long ol narafala ples long wol.” Taswe ol brata oli luk se wok blong prij long ol haos wanwan i save halpem ol man moa i bitim radio. Nating se i olsem, hemia i no laswan taem we ol Witnes blong Jehova oli yusum wan rod olsem blong talemaot gud nius. Plante yia biaen oli yusum wan narafala teknoloji.

 Long 6 Oktoba 2014, wan nambawan samting i hapen long oganaesesen blong Jehova—mifala i setemap wan televisin stesen long Intenet, nem blong hem JW Brodkasting. Blong wajem Brodkasting evri manis, ol Witnes blong Jehova mo plante narafala tu oli yusum sam defren rod, olsem websaet, JW Library, ol masin blong striming, o oli yusum wan masin blong kasem signal blong satelaet. c Be long sam ples long wol, ol man blong Jehova oli gohed blong yusum radio mo TV. ?Olsem wanem oli mekem?

 Long ol yia we oli jes pas, long ol eria we ol man oli no save kasem Intenet, oganaesesen blong Jehova i yusum ol defren radio mo televisin stesen blong mekem ol miting blong kongregesen evri wik, mo sam bigfala asembli. Ol program ya oli kasem plante man we oli no Witnes tu, we oli wantem save moa long Baebol. Eksampol: Long yia 2021 kasem 2022, long Is Afrika, sam maneja blong ol radio stesen oli talem long branj ofis se ol Witnes blong Jehova mo plante we oli no Witnes oli talem tangkiu from ol miting long radio. Sam man long Kenia, Saot Sudan, mo Tansania, we oli lesin long ol miting ya, oli wantem se ol Witnes oli mekem Baebol stadi long olgeta.

 Be ol bigfala rod we ol Witnes blong Jehova oli stap yusum blong talemaot Kingdom long fulwol, hemia wok blong prij long ol haos wanwan, ol troli, mo websaet blong olgeta jw.org. Long websaet ya, ol man we oli intres oli save ridim Baebol mo ol buk we oli eksplenem Baebol long 1,080 lanwis, we oli no pem. Mo tu, oli save faenem ansa blong ol kwestin blong olgeta long Baebol, mo faenemaot weples mo wetaem oli save go long ol Kristin miting. From samting ya, i moa isi naoia blong ol man oli harem gud nius blong Kingdom blong God i bitim ol narafala taem bifo. Tru ya, ol man “long olgeta ples long wol” oli stap harem gud nius ya, olsem profet tok blong Baebol i talem.—Matiu 24:14.