Baebol i Talem Wanem

?From Wanem Ol Man Oli No Laekem Nating Ol Man Blong Jisas?

“Bambae sam man oli holem yufala, oli mekem i nogud long yufala, gogo oli kilim yufala i ded. Bambae olgeta man oli no laekem yufala nating, oli agens long yufala, from we yufala i holem nem blong mi.”—MATIU 24:9.

SAM dei nomo bifo we ol man oli kilim Jisas i ded, hem i talem ol tok ya antap. Long naet bifo we hem i ded, hem i talem long ol aposol we oli no lego hem, se: “Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20, 21) ?Be from wanem ol man bambae oli no laekem nating ol man we oli obei long Jisas, mo we oli traehad blong folem hem? Jisas i wan gudfala man we i wok had blong givhan long ol man. Hem i leftemap tingting blong ol puaman. Mo olgeta we ol narafala man oli stap mekem i nogud long olgeta, hem i mekem olgeta oli harem gud bakegen.

Baebol i talemaot stret from wanem ol man oli no laekem nating ol man blong Jisas bifo. Taem yumi tingting gud long samting ya, yumi luksave from wanem ol man tede oli agensem olgeta we oli folem Kraes, olsem we oli agensem Kraes bifo.

Maet Ol Man Ya Oli No Save Samting We Oli Stap Mekem

Jisas i talem long ol man blong hem, se: “I gat taem i stap kam we bambae ol man we oli kilim yufala, oli ting se oli stap mekem gudfala wok blong God. Bambae oli save mekem ol samting ya from we oli no save Papa blong mi, mo oli no save mi tu.” (Jon 16:2, 3) I tru, plante man we oli agensem ol man blong Jisas, oli talem se oli stap mekem wosip long sem God ya we Jisas i wosipim. Be ol bilif mo ol kastom blong giaman skul oli gat bigfala paoa long olgeta. Yes, “olgeta ya oli strong blong mekem wosip long God. Be wosip blong olgeta i no stanap long stret save.” (Rom 10:2, NW) Wan man we i agensem ol man blong Jisas, hemia Sol blong Tasas, we biaen hem i kam Kristin aposol Pol.

Sol i joen long grup blong ol Farisi we oli ol haeman blong skul blong ol man Jiu, mo oli strong long politik. Grup ya i agensem strong ol Kristin. Biaen, Sol i luksave samting we hem i mekem, nao hem i talem se: “Mi mi stap tok agens long [Jisas], mo mi stap mekem i nogud long hem, mo mi stap tok nogud long hem blong spolem hem.” Hem i gohed se: “Mi no bilif yet long hem, nao mi no save ol samting ya we mi mi stap mekem.” (1 Timoti 1:12, 13) Be taem Sol i lanem trutok long saed blong God mo Pikinini blong hem, Jisas, kwiktaem nomo hem i jenisim fasin blong hem.

Tede, sem samting i hapen long plante man we oli agensem ol man blong Jisas. Sam long ol man ya we oli olsem Sol, oli jenisim fasin blong olgeta, nao ol man oli agensem olgeta tu. Yes, ol man olsem oli no givimbak ol nogud fasin we ol man oli mekem long olgeta, be oli folem tok ya blong Jisas se: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.” (Matiu 5:44) Ol Witnes blong Jehova oli traehad bigwan blong folem ol tok ya long laef blong olgeta. Mo tu, oli gat strong tingting se sam long ol man ya we oli olsem Sol, bambae oli jenisim fasin blong olgeta.

Sam Man We Oli Agensem Ol Man Blong Jisas, Oli Jalus

Plante man we oli agensem Jisas, oli mekem olsem from we oli jalus. Tru ya, Ponjes Paelat we i hed gavman blong Rom, “i luk finis we ol jif pris oli putum Jisas long han blong hem from jalus nomo.” Oli wantem we hem i nilim Jisas long pos. (Mak 15:9, 10) ?From wanem ol lida blong skul blong ol man Jiu oli jalus long Kraes? Wan risen se ol man olbaot, we ol lida blong skul oli stap lukluk nogud long olgeta, oli laekem Jisas. Ol Farisi oli komplen se: “Olgeta man evriwan oli biaen long hem.” (Jon 12:19) Long sem fasin, taem ol man oli lesin long gud nius we ol man blong Kraes oli talemaot, ol lida blong skul oli ‘fulap long jalus’ mo oli spolem gud ol Kristin man ya.—Ol Wok 13:45, 50.

Sam narafala enemi oli kros, from we ol man blong God oli gat gudfala fasin. Aposol Pita i talem long ol  Kristin se: “Olgeta ya oli sapraes tumas, from we yufala i no moa go joen wetem olgeta long ol [rabis] fasin blong olgeta we oli no tingbaot wan samting, oli jes gohed nomo. Mo taem oli luk we yufala i no moa go joen wetem olgeta, oli tok nogud long yufala.” (1 Pita 4:4) Tede, yumi luk we nogud tingting ya i stap yet. Be i tru se, taem ol Kristin oli blokem ol nogud fasin, oli no ting se olgeta oli stret gud, mo oli no ting se oli gud moa bitim ol narafala. Sipos oli gat tingting ya se oli stret gud olgeta, bambae oli no tru Kristin, from we yumi evriwan i sinman mo yumi nidim we God i sore long yumi.—Rom 3:23.

Ol Man Oli Agensem Yumi From We “Yumi No Man Blong Wol Ya”

Baebol i talem se: “Yufala i no mas laekem wol ya, mo ol samting we oli stap long hem.” (1 Jon 2:15, NW) ?Wanem wol ya we aposol Jon i stap tokbaot? Hem i minim ol man blong wol ya we oli stap longwe long God, mo we oli obei long Setan. Hem nao i “god blong wol ya.”—2 Korin 4:4, New Testament in Modern English; 1 Jon 5:19.

Sore tumas, sam man we oli laekem wol ya mo ol nogud fasin blong hem, oli agensem ol man we oli stap traehad blong folem ol samting we Baebol i tijim. From samting ya, Jisas i talem long ol aposol blong hem se: “Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.”—Jon 15:19.

Ol man blong Jehova oli no laekem wol ya blong Setan, we i fulap long fasin blong brekem loa, ol man we oli mekem i no stret, mo raf fasin. Sore tumas, ol man oli agensem olgeta from. Plante man we hat blong olgeta i stret, oli wantem mekem wol ya i kam wan gudfala ples, be oli no naf blong tekemaot rul blong rabis man ya Setan, we yumi no save luk hem. !Jehova God nomo i save tekemaot Setan, mo bambae i spolem gud hem olsem we faea i kakae hem!—Revelesen 20:10, 14.

Gudfala promes ya, hemia nao wan impoten haf blong “gud nius ya blong kingdom” we ol Witnes blong Jehova oli stap talemaot long olgeta ples long wol. (Matiu 24:14, NW) Yes, ol Witnes oli bilif strong se Kingdom blong God nomo we Kraes i rul long hem, bambae i karem pis mo glad i kam long wol blong olwe. (Matiu 6:9, 10) Taswe long tingting blong olgeta, i impoten moa blong mekem Jehova i glad, i bitim we oli mekem man i glad long olgeta. Ale from samting ya, oli gohed nomo blong talemaot Kingdom ya.

?YU YU BIN TINGBAOT?

● ?From wanem Sol blong Tasas i agensem ol man blong Kraes?—1 Timoti 1:12, 13.

● ?Wanem nogud fasin i pulum sam man blong oli kam enemi blong Jisas?—Mak 15:9, 10.

● ?Wanem tingting we ol tru Kristin oli gat long saed blong wol?—1 Jon 2:15.

[Tok blong pija long pej 21]

Long yia 1945 long Quebec, Kanada, wan bigfala hip blong ol man oli girap agensem ol Witnes blong Jehova, from we oli stap talemaot gud nius blong Kingdom blong God

[Credi Line]

Courtesy Canada Wide