Baebol i Talem Wanem

?From Wanem Yu Mas Lukaot Gud Long Toktok Blong Yu?

Plante man oli stap lesin long wan storian we praeminista i mekem wetem wan olfala woman. Afta long storian blong tufala, olfala woman ya i aot i go. Nao praeminista i tokbaot nogud olfala woman ya se hem i wan stronghed olfala, mo hem i talem se ol man we oli wok blong hem oli no sud tekem woman ya i kam luk hem. Be praeminista i no save se maekrofon i stap wok yet mo ol man oli save harem hem. Plante man oli sek nogud long toktok blong praeminista ya long saed blong olfala woman ya. Ol man oli no moa tinghae long praeminista ya. Ale, long eit dei nomo, praeminista i lusum posisen blong hem long eleksen.

I NO gat man i save bos gud long tang blong hem. (Jemes 3:2) Nating se i olsem, stori long stat blong haf ya i soemaot se ol toktok blong yu oli impoten. Tok we yu talem mo olsem wanem yu talem tok ya, i save gat bigfala paoa long tingting we ol man oli gat long gudnem blong yu mo long wok we yu mekem. Mo tu, i save givhan no i save spolem fasin fren blong yu wetem ol narafala.

Ol tok blong yu oli gat paoa blong mekem wan narafala samting tu. ?Wanem samting ya? Baebol i eksplenem se tok we yu talem i soemaot wanem i stap long hat blong yu mo i soemaot se yu yu wanem kaen man. Jisas i talem se: “Taem man i tok, hem i stap talemaot ol samting we tingting [“hat,” NW] blong hem i fulap long hem.” (Matiu 12:34) From we toktok blong yu i stap soemaot tingting blong yu, se yu wanem kaen man mo se yu harem olsem wanem, i impoten we yu tingting gud long fasin blong yu blong toktok. Baebol i save halpem yu long saed ya. Yu traem tingbaot ol save ya we oli kam biaen.

?Olsem Wanem Blong Kamgud Moa Long Fasin Blong Toktok?

Bifo we man i toktok, ol samting we hem i wantem talem oli stap long tingting blong hem. Taswe, blong yu save kamgud moa long fasin blong yu blong toktok, fastaem yu mas traem kamgud moa long fasin blong yu blong tingting. Bambae yu luk se taem yu mekem ol tok blong Baebol oli wok long laef blong yu, samting ya i save gat paoa long tingting blong yu, mo biaen i save gat paoa long toktok blong yu.

Yu mas fulumap hat blong yu wetem ol gudfala samting. Baebol i tokbaot ol gudfala samting ya se: “I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.”—Filipae 4:8.

Yu save sakemaot ol nogud tingting sipos yu folem advaes ya. Yu mas tingbaot se ol samting we yu luk mo we yu ridim, oli save gat bigfala paoa long tingting blong yu. Taswe, sipos yu no wantem gat ol nogud tingting, yu mas blokem ol rabis samting we oli save gat paoa long yu. Hemia i min se yu mas stap longwe long ol pleplei we oli soemaot fasin blong faet mo ol fasin nogud. (Ol Sam 11:5; Efesas 5:3, 4) Defren olgeta, yu mas putum tingting blong yu i stap long ol samting we oli klin mo oli gud. Baebol i save halpem yu blong mekem olsem. I gud yu ridim Ol Proveb 4:20-27; Efesas 4:20-32; mo Jemes 3:2-12 mo yu traem luk olsem wanem yu save kamgud moa long fasin blong yu blong toktok, taem yu folem ol advaes we oli stap long ol vas ya. a

Yu mas tingting gud bifo yu toktok. Ol Proveb 12:18 i talem se: “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem, be tok we i waes i save mekem man i harem gud bakegen.” Sipos yu luk se plante taem ol tok blong yu oli “stikim” narafala mo oli mekem narafala i harem nogud, yu mas traehad blong tingting gud bifo yu toktok. I gud we yu folem advaes ya long Ol Proveb 15:28 se: “Oltaem, gudfala man i tingting gud fastaem, nao biaen i tok, be man nogud i stap sakem tok kwiktaem nomo, mo tok blong hem i blong statem trabol nomo.”

 Yu mas traem putum wan mak. Long manis we i kam, yu save traehad blong no talem fas samting we i kam long tingting blong yu, speseli taem man i mekem yu yu kros no yu harem nogud. Be i gud yu tingbaot ol vas we oli stap long haf ya, mo yu traehad blong toktok long fasin we i waes, i gat lav mo i kwaet. (Ol Proveb 15:1-4, 23) Be i gat sam moa samting we yu mas mekem.

Yu mas prea long God blong i halpem yu. Wan man we i raetem Baebol i prea se: “Hae God. . . . Prea blong mi, we ol tok blong mi mo ol tingting blong mi bambae oli stret gud long fes blong yu.” (Ol Sam 19:14) Yu save talem long Jehova God se yu wantem toktok long fasin we i mekem hem i glad mo yu wantem stap olsem wan gudfala fren blong ol narafala. Ol Proveb 18:20, 21 i talem se: “Yu mas talem ol gudfala toktok—bambae yu glad from we yu mekem olsem. !Ol tok blong yu oli save spolem laef blong yu no oli save sevem laef blong yu!”—Contemporary English Version.

Yusum Baebol we i olsem wan glas. Baebol i olsem wan glas we yu lukluk gud yu long hem. (Jemes 1:23-25) Taem yu stap tingbaot tri stamba trutok ya we oli kam biaen, i gud yu tingbaot ol kwestin ya se, ‘?Ol tok we mi talem, oli laenap wetem ol stamba trutok ya? ?Taem mi toktok, ol man oli gat wanem tingting long mi?’

“Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.” (Ol Proveb 15:1) ?Olsem wanem? ?Yu yu toktok long fasin we i soemaot se yu wan kwaet man mo yu wantem gat pis wetem ol narafala?

“Long ol toktok blong yufala, yufala i no mas talem ol rabis tok we i save spolem man. Yufala i mas talem ol gudfala tok we i save mekem ol man we oli slak oli kam strong moa. Tok olsem i save givhan moa long ol man we oli harem.” (Efesas 4:29) ?Ol toktok blong yu oli mekem ol narafala raonabaot long yu, oli kam strong moa?

“Yufala i mas toktok gud long olgeta, long ol tok we olgeta oli save glad long hem. Mo yufala i mas save rod blong givim ansa long evri man, we i stret gud long olgeta evriwan.” (Kolosi 4:6) ?Taem ol samting oli traem yu, yu yu mekem se ol toktok blong yu oli kaengud mo ol narafala oli glad blong harem?

Taem yu stap lukluk yu long glas, mo yu stretem sam samting long fes blong yu, bambae yu naes long lukluk blong ol narafala mo tu, bambae yu harem gud moa. Long sem fasin, taem yu kamgud moa long fasin blong yu blong toktok from we yu lukluk long Baebol we i olsem wan glas, bambae ol narafala oli glad long yu mo tu, bambae yu harem gud moa.

[Futnot]

?YU YU BIN TINGBAOT?

● ?Toktok blong yu i soemaot wanem?—Luk 6:45.

● ?Yu mas toktok long ol narafala olsem wanem?—Efesas 4:29; Kolosi 4:6.

● ?Yu save mekem wanem blong kamgud moa long fasin blong yu blong toktok?—Ol Sam 19:14; Filipae 4:8.

[Tok blong pija long pej 11]

Samting we yumi talem i save gat paoa long gudnem blong yumi mo fasin fren blong yumi wetem ol narafala