Baebol i Talem Wanem

?God i Stap Long Evri Ples?

PLANTE man oli bilif se God i stap long evri ples mo long evri samting. King Solomon we i waes gud i prea long Jehova, i askem se: “Hae God, yu yu stap long hom blong yu long heven. Plis yu harem prea blong mifala.” (1 King 8:30, 39) Olsem we Baebol i talem, Jehova God i gat wan hom blong hem. Solomon i kolem ples ya se “heven.” ?Be tok ya i minim wanem?

Samtaem, Baebol i yusum wod ya “heven” blong minim prapa skae we i stap raonabaot long wol. (Jenesis 2:1, 4, NW) Be from we God i mekem olgeta samting, hom blong hem i mas stap finis, bifo we hem i mekem skae mo wol. Taswe, God i laef long wan ples we i bigwan moa long skae mo wol. From samting ya, taem Baebol i tokbaot heven olsem hom blong Jehova God, hem i no stap tokbaot wan ples long skae, no wan narafala ples antap, be hem i stap tokbaot ples we ol enjel oli stap long hem.

Wan Vison We i Mekem Man i Sapraes

Baebol i tokbaot wan vison blong aposol Jon long saed blong ples blong Jehova. Long vison ya, Jon i luk wan doa we i open long heven, mo hem i harem wan voes we i talem se: “Yu kam antap long ples ya.”—Revelesen 4:1.

Biaen, Jon i luk wan vison blong Jehova God. Long wan haf blong vison ya, Jon i luk “wan bigfala jea olsem jea blong king i stap long heven, mo wan Man i stap sidaon long hem. Man ya i saen we i saen, olsem tu gudfala ston ya jaspa mo kanilian we tufala i red. Mo i gat wan renbo i goraon long jea ya, mo laet blong hem i saen olsem gudfala ston ya emeral, we i grin. . . . Nao long jea ya blong king i gat laetning i stap saenaot i kam, mo i gat bigfala noes blong tanda i faerap. . . . Mo bakegen long fran blong jea ya, i gat wan samting olsem solwota i stap, we i olsem glas, we i saen we i saen.”—Revelesen 4:2-6.

Hemia i eksplenem olsem wanem Jehova i naes we i naes, hem i saen gud, i no gat wan narafala samting we i naes olsem. Mo yu traem luk ol samting we oli stap raonabaot long jea blong hem. Renbo ya i soemaot se ples i kwaet mo i gat pis. Ol laetning, ol voes, mo bigfala tanda, oli soemaot paoa blong God. Solwota we i olsem glas, i pulum tingting blong yumi i go long klin mo stret fasin blong olgeta we oli stanap long fes blong God.

Nating se ol samting long vison ya oli olsem pijatok nomo, be oli soemaot plante samting long saed blong ples blong God. Jehova i meksua se evri samting long heven oli stap long stret ples blong olgeta. Taswe ples blong hem i no olbaot.

?I Tru Se God i Stap Oltaem Long Evri Ples?

From we Jehova i gat wan ples blong hem, hem i no stap oltaem long evri ples. Ale ?long wanem rod nao hem i save ol samting we oli hapen? (2 Kronikel 6:39) Wan rod, hemia tru long tabu spirit blong hem, no paoa blong hem. Man blong raetem Ol Sam i talem se: “?Weples bambae mi save go haed long hem blong yu no luk mi [“blong ronwe long spirit blong yu,” NW]? ?Weples bambae mi save go long hem blong ronwe long yu? Sipos mi go long heven, be yu yu stap long ples ya, bambae yu luk mi, mo sipos mi go ledaon long Hom blong ol Dedman [“Seol,” NW], be yu yu stap long ples ya tu, bambae yu faenem mi.”—Ol Sam 139:7-10.

Blong kasem save olsem wanem tabu spirit blong God i save wok long plante ples wantaem, yumi save tingbaot san. San i stap long stret ples blong hem, be paoa blong hem i kasem plante ples blong wol long semtaem. Long sem fasin, Jehova  God i stap long wan ples nomo. Be hem i save mekem samting we hem i wantem i kamaot long eni ples long heven no long wol. Antap long samting ya, Jehova i save yusum tabu spirit blong hem, blong i luk samting we i stap hapen long eniples mo long enitaem. Taswe 2 Kronikel 16:9 i talem se: “Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.”

Mo tu, God i bos long wan bigfala grup blong ol enjel. Baebol i soemaot se i gat plante handred milian enjel, maet plante bilian. a (Daniel 7:10) I gat plante vas long Baebol we oli soemaot se sam enjel oli toktok long ples blong God. Ol enjel ya oli kamdaon long wol, oli toktok long sam man, mo biaen oli gobak, oli talemaot long God ol samting we oli luk. Long taem blong Ebraham, ol enjel oli kamdaon blong luk sipos ol tok we ol man oli stap talem agens long Sodom mo Gomora i tru no nogat. Afta we God i kasem ripot blong ol enjel ya, hem i mekemap tingting blong hem blong i spolem tufala taon ya.—Jenesis 18:20, 21, 33; 19:1, 13.

Taswe, Baebol i soemaot se i no nid blong Jehova God i go stap long evri ples. Hem i save yusum tabu spirit mo ol enjel blong hem, blong i luksave evri samting we i hapen.

I klia se, Baebol i save halpem yumi blong save gud Man ya we i Mekem yumi. Baebol i talem se God i stap long wan ples we ol man oli kolem “heven.” Hemia ples blong ol enjel, mo hem i stap longwe long prapa skae. I gat plante taosen strong enjel we oli stap long ples ya wetem hem. Hom blong hem i wan ples blong bigfala paoa mo i klin. Baebol i promes se long stret taem we Jehova i makemaot, ol man long wol bambae oli harem gud long pis, olsem olgeta long heven.—Matiu 6:10.

[Futnot]

?YU YU BIN TINGBAOT?

● ?God i stap long evri ples?—1 King 8:30, 39.

● ?Spirit blong God i save kasem weples?—Ol Sam 139:7-10, NW.

[Tok blong makem poen long pej 27]

San i stap long wan ples nomo, be paoa blong hem i save go kasem ol ples longwe. Sem mak, God i stap long ples blong hem nomo, be tabu spirit blong hem i save go kasem eniples long heven mo long wol