?Maot Blong Yu Hem i “Wan Samting We i Gud Tumas”?

● King Solomon blong bifo, i talem se: “Maot blong man we i gat save, i wan samting we i gud tumas, i winim gol mo plante gudgudfala korel.” (Ol Proveb 20:15, NW) Longtaem finis, ol man oli luk se gol i wan samting we i gud tumas, mo long taem blong Solomon, korel tu i wan gudfala samting we i sas tumas. Be maot blong yumi hem i wan samting we i gud moa i winim gol mo korel. ?From wanem maot blong yumi i gud moa? I no from we hem i naes. Be from we maot blong yumi i save talemaot ol tingting blong yumi.

Man we maot blong hem i gud tumas, hem i gat gudfala fasin, hem i kaen, mo hem i lavem narafala. Mo “maot blong man we i gat save,” i talemaot trutok long saed blong God we i stap long Baebol. Yes Baebol i wan olfala buk we i gat plante waestok long hem, i talem trutok long saed blong God ya we i Mekem yumi, mo i gat plante gudfala tok long hem we i save givhan long yumi long laef blong yumi.—Jon 17:17.

Be sore tumas, plante man oli no yusum gud maot blong olgeta, oli talem ol samting long saed blong God we oli no tru. Samfala oli blemem God from we i no gat stret fasin long wol mo from we plante man oli harem nogud. Be plante taem, hemia fol blong ol man nomo. Ol Proveb 19:3 i tokbaot samting ya se: “Sam man oli stap spolem laef blong olgeta long ol rabis fasin blong olgeta, mo biaen, oli talem se Hae God nomo i stap spolem olgeta.”

Sam narafala oli no yusum gud maot blong olgeta from we oli talem ol tok we i no tru, oli tokbaot man, mo oli talem ol giaman toktok blong spolem nem blong narafala. Ol Proveb 26:23 i talem wan pijatok we i nambawan, i se: “Tok we yu talem nomo blong haedem ol samting we i stap long tingting blong yu, hem i olsem pen we oli putum long rabis graonpot blong mekem i naes we i naes, be graonpot ya i rabis yet.” Olsem “pen” ya we i blong mekem rabis graonpot i luk olsem se hem i naes, man we i talem “ol tok” we oli gud tumas olsem se oli kamaot long hat blong hem, maet hem i stap “haedem samting we i stap long tingting blong hem.”—Ol Proveb 26:24-26.

Be God i luksave klia nomo ol nogud fasin olsem. !Hem i savegud yumi! Hem i save wanem i stap long tingting mo hat blong yumi. Taswe Jisas Kraes i talem se: “Fastaem yufala i mas mekem ol panikin mo ol plet blong yufala i klin insaed, nao afsaed tu bambae i save klin.” (Matiu 23:26) Yes i tru tumas, taem hat mo tingting blong yumi i klin, mo yumi putum ol tok blong God oli stap long hat blong yumi, bambae toktok blong yumi i soemaot gudfala tingting blong yumi. ?Wanem gudfala samting bambae yumi kasem? Bambae maot blong yumi i “wan samting we i gud tumas,” speseli long tingting blong God.

[Tok blong pija long pej 19]

Maot blong man we i waes, i “wan samting we i gud tumas”