!Ol Man Oli Harem Nogud Tumas!

Khieu i harem nogud tumas taem sam man oli kilim papa blong hem i ded. Oli kilim papa blong hem i ded, from we papa blong hem i letem ol buluk oli go wokbaot long wan plantesen blong kon. Biaen, long wan bigfala faet long Kambodia, ol ‘Khmer Rouge’ oli kilim mama blong hem wetem tufala sista blong hem oli ded. Ale Khieu i kasem kil from wan bom we ol man oli berem aninit long graon. Hem i wet 16 dei long dakbus blong man i kam halpem hem. Oli mas katemaot leg blong hem. Khieu i talem se: “Long taem ya, mi wantem ded nomo.”

MAET yu luksave finis se ol samting we oli mekem man i harem nogud, oli kasem enikaen man. Eniman, long eniples, long enitaem, i save harem nogud from ol samting olsem hariken, graon i seksek, mo wota we i ron bigwan, no from we hem i sik, haf bodi blong hem i nogud, no from raf fasin blong narafala. Ol man oli stanemap ol ogenaesesen blong traem givhan long ol man we oli harem nogud, mo blong traem blokem ol samting we oli save mekem man i harem nogud. Ol man long ol ogenaesesen ya oli wok had. ?Be hadwok blong olgeta i mekem wanem?

Yumi save tingbaot ol samting we ol man oli mekem blong traem winim problem long saed blong kakae. Wan niuspepa (Toronto Star) i talem se ol disasta olsem hariken mo graon i seksek, oli mekem se plante man oli no moa gat haos blong stap long hem mo oli no gat kakae. Be niuspepa ya i talem tu se, “raf fasin we i kam antap i spolem hadwok we ol grup blong ol man oli mekem blong traem givhan long olgeta we oli no gat kakae.”

Ol man blong politik, ol man we oli givhan long komuniti, mo ol dokta, oli traehad blong givhan long ol man we oli stap harem nogud. Be sore tumas, namba blong ol man we oli harem nogud, i stap kam bigwan moa. Ol man oli mekem ol plan blong traem mekem se ekonomi blong ol kantri i kam antap, be oli no save finisim fasin pua. Ol man oli wokem ol stik meresin mo ol narafala meresin, mo oli kasem moa save long fasin blong katem ol man, be oli no save finisim olgeta sik. Ol polis mo ol soldia we wok blong olgeta i blong putum pis, oli no save blokem ol raf fasin mo nogud fasin we man i mekem blong brekem loa. Ol fasin ya oli kam plante moa.

?From wanem plante man oli harem nogud? ?Wanem tingting blong God taem i luk we ol man oli stap harem nogud? ?Hem i stap tingbaot olgeta? Plante man oli faenem ol ansa we Baebol i givim long ol kwestin ya, mo samting ya i mekem se oli harem gud. Bambae yumi luk wanem we Baebol i talem.