“!Tangkiu Tumas From Haf Ya We i Stap Kamaot Oltaem!”

● Ol man long olgeta ples long wol, oli raet i kam blong talem tangkiu from haf ya “Samting Blong Famle i Tokbaot,” we i stap kamaot oltaem long buk ya Wekap! Long haf ya, i gat wan pija mo ol kwestin long saed blong hem we man i save ansa long olgeta, mo i gat ol kad long saed blong Baebol blong man i katemaot mo kipim i stap. Evriwan long famle oli harem gud blong joen wanples blong tokbaot ol samting ya, mo oli save kasem gudfala tijing from. Yumi save ridim sam long ol leta ya:

“Mi mi mekem Baebol stadi long tufala smol bubu blong mi, we tufala i gat 12 yia blong tufala. Mi mekem stadi blong tufala long leta, mo mifala i stadi long haf ya ‘Samting Blong Famle i Tokbaot.’ Mi askem long tufala blong tufala i raetemdaon ansa blong ol kwestin we oli stap long haf ya mo blong tufala i sanem i kam long mi. Tufala smol bubu blong mi tufala i glad tumas long stadi ya, mo taem mi raet long tufala, mi eksplenem moa ol samting we haf ya i stap tokbaot. !Tangkiu tumas from haf ya we i stap kamaot oltaem long Wekap!”

V. C., Yunaeted Stet

“Smol boe blong mi i gat faef yia blong hem. I no longtaem i pas, bifo we hem i go slip, hem i askem long mi blong mitufala i tokbaot haf ya long wan Wekap! “?Wanem Samting We i No Stret Long Pija Ya?” Ale mitufala i stat blong tokbaot pija ya. Taem mi stap ridim stori blong pija ya long Baebol, smol boe blong mi i lesin gud. Naoia, klosap evri naet hem i wantem stadi. Mi mo famle blong mi, mifala i talem tangkiu tumas wetem fulhat blong mifala. Haf ya long Wekap! i givhan long ol pikinini blong mifala blong oli glad long ol tok blong Baebol.”

M. F., Franis

“Mi mi go long ples we ol man oli go long hem blong tekem bas, nao mi mitim David we i gat 12 yia, mo Jennifer we i gat 6 yia. Papa blong tufala i luk we mi mi stap givimaot buk ya Wekap! long ol man long ples ya, ale hem i letem tufala pikinini blong hem i kam luk mi blong tekem sam Wekap! Smoltaem biaen, mi luk we papa ya wetem boe blong hem, tufala i stap ridim ol Wekap! ya. Mi mo smol Jennifer mitufala i gohed blong tokbaot ol naesfala pija mo foto blong ol pijin mo ol anamol. Mitufala i tokbaot ol naesfala samting we Jehova i mekem blong yumi save harem gud long olgeta. Biaen, Jennifer i askem tu moa Wekap! blong i karem i go long papa mo brata blong hem. Taem mi stap aot, trifala i talem tangkiu from ol nambawan buk ya.”

M. C., Ekwado