?I Gat Wan Man We i Wokem Samting Ya?

Totel i Save Faenem Rod Blong Hem

● Totel blong solwota i save rod blong mekem longfala trip ya i go long stret sanbij we hem i mas putum ol eg blong hem long hem. Ol man we oli stadi long ol totel, oli talem se oli “sapraes moa long fasin ya blong totel i bitim ol fasin we ol narafala anamol oli gat.” Blong plante yia finis, totel i pulum tingting blong olgeta.

Yu Traem Tingbaot: Evri tu no fo yia, woman totel i kamso blong putum ol eg blong hem long sanbij, mo hem i berem olgeta. Maet wan totel i berem wan handred eg long sanbij. Taem ol eg ya oli brok, ol smosmol totel oli traehad blong wokbaot go kasem solwota. Nao oli statem wan longfala trip we maet hem i samting olsem 12,900 kilometa. Ale, plante yia i pas nao ol woman totel oli mekem longfala trip ya bakegen, blong gobak long sanbij we oli bon long hem. Nao oli putum ol eg blong olgeta long ples ya, mo oli berem ol eg ya bakegen.

?Ol totel ya oli faenem rod blong olgeta olsem wanem? Kenneth Lohmann i stap long Yunivesiti blong North Carolina long Yunaeted Stet, mo hem i stadi long ol laef samting. Tok blong hem i stap long buk ya National Geographic News, i se: “I luk olsem we ol totel oli gat wan map long tingting blong olgeta, we i pulum olgeta olsem magnet blong oli go long stret rod.” Ol man blong stadi oli faenemaot wan samting we maet i mekem se totel i save se hem i stap wea. Totel i haremsave paoa ya we i stap raon long wol (magnetic field), se i stap pulum hem long wanem saed mo i strong olsem wanem. Nambawan fasin ya i mekem se ol smosmol totel we i no gat wan samting i protektem olgeta, oli save mekem longfala trip blong olgeta long solwota blong Atlantik. Mo olsem Masta Lohmann i talem, “oli wokbaot olgeta wanwan, oli no folem wan narafala totel.”

?Wanem tingting blong yu? ?Fasin blong totel blong faenem rod blong hem, i kamaot olsem nomo? ?No i gat wan Man we i putum fasin ya long hem?

[Bokis blong pija long pej 22]

SAM NARAFALA SAVE

● Hem i berem ol eg blong hem long sanbij, nao i ronwe long olgeta.

● Taem wan smol totel i wantem brekem eg blong kamaot, hem i yusum wan spesel tut we nem blong hem caruncle. Afta we hem i brekem eg ya, tut ya i foldaon.

● Ol totel ya oli spenem klosap ful laef blong olgeta (90 pesen) long solwota.

[Foto Credit Line long pej 22]

© Masa Ushioda/WaterF/age fotostock