Pej Tu

Tijim Pikinini Blong Bambae i Gruap Wetem Ol Gudfala Fasin

Papa mama tufala i stap lukluk bebi blong tufala we i jes bon mo i naes we i naes. Be maet i gat wan samting we tufala i no tingbaot nating. Hemia wan stamba trutok: Wan dei smol bebi ya bambae i gruap, i kam wan bigman we i mas lukaot long hem wan. Olsem Baebol i talem: “Man i mas aot long papa mo mama blong hem.” (Jenesis 2:24) Hemia i tru tu long saed blong ol yangfala gel.

Taem wan boe no wan gel i gruap mo i lego papa mama, plante papa mama oli gat tu tingting, oli glad mo oli sore tu. Mo oli wari se: ‘?Mi mi tijim gud pikinini blong mi? ?Bambae hem i naf blong holem wan wok, pem renhaos blong hem, mo yusum gud mane blong hem?’ Samting we i impoten moa se, ‘?Pikinini blong mi bambae i folem ol gudfala fasin we mi mi tijim hem long hem?’—Ol Proveb 22:6; 2 Timoti 3:15.

Spesel Wekap! ya bambae i soemaot ol advaes blong Baebol, we i save givhan long ol papa mama long tri defren haf long laef blong pikinini.