Baebol i Talem Wanem

?God i Kea Long Ol Anamol?

LAEF blong ol anamol long wol i stap long denja. Plante saentis oli talem se ol anamol oli stap lus long wan spid we i hareap tumas. I gat sam kaen anamol we yumi no moa save faenem tede from we oli lus evriwan finis. ?From wanem i olsem? From wok blong man. Ol ples we bifo i bus nomo we anamol i stap long hem, be naoia ol man oli bildim haos blong olgeta long hem no oli mekem bisnes long hem. Ol man oli fidim anamol blong putum long ol bigfala faktri we oli mekem kakae blong man. Ol man oli trenem ol anamol blong oli faet, ale ol man oli kam wajem olsem wan spot nomo. Mo plante man oli tekem anamol be oli no save lukaotem, ale oli sakem anamol ya long ol rod olbaot we oli no gat sore nating.

Sam man oli talem se samting we i stap hapen long ol anamol, i mas hapen from we namba blong ol man i stap kam antap. ?Olsem wanem? ?Hemia nao samting we God i wantem? ?God i lego ol anamol i stap long han blong ol man mo i no wantem save se man i mekem wanem long ol anamol ya? ?Olsem wanem yumi save se God i kea long ol anamol?

Taem God i Mekem Olgeta Samting Fastaem, Hem i Soemaot Se Hem i Kea Long Ol Anamol

Afta we God i mekem ol fis, ol pijin, mo ol anamol we oli stap long graon, hem i glad long olgeta. Baebol i talem se God “i luk we i gud tumas.” (Jenesis 1:21, 25) Olgeta anamol ya, i stat long olgeta we oli bigbigfala, i go kasem olgeta we oli smosmol, be God we i mekem olgeta i laekem olgeta tumas. God i mekem ol anamol ya ‘oli waes we i waes,’ mo tu, hem i givim kakae we oli nidim blong oli save laef long ol ples we oli stap long hem. Baebol i talem tru se: “Olgeta ya evriwan, taem oli hanggri, oli stap luk long yu, blong yu givim kakae long olgeta. Taem yu givim kakae long olgeta, olgeta oli kakae, mo oli harem gud.”—Ol Proveb 30:24; Ol Sam 104:24, 25, 27, 28.

God i putum olgeta anamol oli stap long han blong fas man ya Adam. God i no mekem we anamol i naf blong tingting mo skelem samting olsem man, mo anamol i no save tingbaot God tu. (2 Pita 2:12; Jud 19) Adam i no olsem ol anamol. God i mekem hem i hae moa from we hem i naf blong “tekem fasin” blong God. Yes, Adam i save soemaot ol fasin blong Jehova, God ya we i mekem hem. (Jenesis 1:27; Ol Sam 83:18, NW) Be samting ya i no min se man i gat raet blong mekem eni samting nomo long ol anamol we God i mekem. Nogat. Ol man oli mas mekem samting olsem we God i wantem.

Traem tingbaot: ?Hu i talem long Adam blong i putum nem blong ol anamol? Jehova nao i talem long hem. Mo Jehova i givhan long Adam blong mekem wok ya from we hem “i tekem olgeta [anamol] oli kam pas long man ya blong luk se man ya bambae i putum nem blong olgeta olsem wanem.” (Jenesis 2:19) Man i mekem gud wok blong hem blong lukaot long ol anamol, taem hem i folem wanem we God i talem long hem blong mekem.

God i Soemaot Klia Se Hem i Kea Yet Long Ol Anamol

Sore tumas we Adam i no moa wantem we God i lidim hem. From we hem i gowe long God, olgeta man long wol oli kasem trabol mo laef long wol tu i kam nogud. Nating se i olsem, God ya we i Mekem Olgeta Samting, i talemaot klia wanem fasin we i stret mo wanem fasin we i no stret blong mekem long ol anamol. I tru se God i letem ol man oli kilim anamol i ded blong oli kakae mo i letem man i yusum anamol long sam gudfala wok, be neva God i givim raet long man blong i mekem i nogud long ol anamol. Baebol i talem se: “Gudfala man, hem i stap lukaot gud long ol anamol blong hem, be man nogud i stap mekem i strong tumas long ol anamol blong hem.”—Ol Proveb 12:10.

Taem God i givim loa long ol man Isrel, hem i putum loa tu blong oli lukaot gud long ol anamol blong olgeta. Evri wik ol man Isrel oli mas spel long Sabat dei. Spel ya i mekem i gud long ol man mo long ol anamol tu. (Eksodas 23:12) Ol man Isrel oli no gat raet blong wok long Sabat dei, be sipos wan anamol blong olgeta i kasem kil, oli mas givhan long anamol ya. (Luk 14:5) Mo tu, God i talem se taem ol man oli yusum buluk long wok blong olgeta, oli no mas blokem buluk ya blong i no kakae. Mo oli no mas mekem we ol anamol oli karem samting we i hevi tumas. (Eksodas 23:5; Dutronome 25:4) I tabu blong ol man Isrel oli putum yok long wan buluk  wetem dongki blong tufala i wok wan ples, from we paoa blong tufala i no sem mak mo wan i save givim kil long narawan. (Dutronome 22:10) Yes, ol tok ya blong Baebol oli soemaot klia se man i mas mekem i gud long ol anamol, i no mas spolem olgeta, mo i mas gat sore tu long olgeta.

Plante man tede oli tingbaot samting we olgeta nomo i wantem mo oli no kea long wanem we i hapen long anamol. Be God i sore long ol anamol mo i tingbaot olgeta. Taem ol man long taon ya Nineve oli tanem tingting blong olgeta from sin blong olgeta mo God i no moa panisim olgeta, profet Jona i kros. Hem i no gat sore long ol man ya, nao Jehova i talem long hem se: “I stret nomo blong mi mi sore moa long bigfala taon ya Nineve, from we long ples ya i gat moa long wan handred twanti taosen pikinini oli stap, we oli no save wanem i gud mo wanem i nogud, mo bakegen i gat plante anamol tu oli stap long ples ya.” (Jona 4:10, 11) !Yes, God we i Mekem Olgeta Samting hem i gat sore long ol anamol tu!

Long Fiuja, God i Wantem Se Ol Anamol Oli Stapgud

Ol samting we yumi tokbaot finis oli soemaot se God i kea long ol anamol mo hem i stap wajem fasin we man i mekem long olgeta. Jisas, we i Pikinini blong God, i talem se sipos wan smosmol pijin nomo i foldaon long graon, be Papa blong hem i save. (Matiu 10:29) I tru se sam man oli traehad blong lukaot gud long ol samting raonabaot long yumi. Be oli no gat save long evri samting yet we oli mas mekem blong lukaot gud long ol samting ya. Sipos ol man oli wantem laef long wol ya mo long semtaem oli wantem lukaot gud long ol anamol mo wol, oli mas jenisim tingting blong olgeta.

Baebol i mekem yumi harem gud tumas, taem hem i talem se i gat taem i stap kam we Kingdom blong God bambae i rulum wol ya. Long taem ya, wol “bambae i fulap gud long ol man we oli savegud Hae God.” (Aesea 11:9) Save ya we i kamaot long God bambae i tijim mo i trenem ol man we oli obei long hem, blong oli lukaot gud long wol ya. God nao bambae i lidim olgeta samting we oli hapen long wol, bambae hem i mekem we ol man mo ol anamol oli joen gud, ale wol bambae i kam wan paradaes bakegen olsem we hem i bin wantem fastaem.

Baebol i talem se long fiuja bambae laef blong ol man mo anamol i jenis bigwan. Hem i se: “Wael dog mo pikinini blong sipsip bambae tufala i save stap wanples nomo, we tufala i fren gud. Bigfala puskat ya leped we i stap kakae nani, bambae i save go ledaon wetem pikinini blong nani, we tufala i save slip gud long wan yad nomo. Ol pikinini blong buluk mo ol pikinini blong laeon bambae oli stap kakae wanples nomo, mo smol pikinini nomo bambae i naf blong lukaot long olgeta. Ol kao mo ol bea bambae oli kakae wanples, mo ol pikinini blong olgeta bambae oli slip kwaet long wan yad nomo, mo laeon bambae i kakae gras nomo, olsem buluk. Snek we sipos i kakae man, bambae man i ded from, be long taem ya, bambae smol pikinini nomo i save go klosap long hem, i save go pleplei stret long ples we snek i stap long hem.” !Yumi glad tumas blong tingbaot taem we bambae nambawan promes ya i kamtru!—Aesea 11:6-8.

?YU YU BIN TINGBAOT?

● ?Yu ting se God i kea long ol anamol mo hem i stap wajem fasin we man i mekem long olgeta?—Ol Proveb 12:10; Matiu 10:29.

● ?Yu ting se wan dei ol man mo ol anamol bambae oli save stap gud wanples we wan i no spolem narawan?—Aesea 11:6-9.

[Tok blong makem poen long pej 13]

Blong lukaot gud long ol anamol mo wol, ol man oli mas jenisim tingting blong olgeta

[Tok blong pija long pej 13]

La Voz de Galicia/Fotógrafo: Víctor Mejuto