Ol Yangfala Oli Askem

?Mi Save Faenem Ol Gudfala Muvi, Buk, Mo Miusik Long Weples?

Sipos yu yu wan Kristin, yu mas jusum gud samting we yu stap wajem, ridim mo lesin long hem. Yu no folem tingting blong ol narafala long saed ya. ?From wanem? From we plante long ol samting ya tede oli leftemap nogud fasin blong man wetem woman, raf fasin, mo wok blong rabis spirit. Yu yu mas stap longwe long ol samting ya. Nating se i olsem, i gat sam muvi, buk, mo miusik we oli gud. ?Yu save faenem olgeta olsem wanem? Long haf ya bambae yu luk olsem wanem yu save faenem ol gudfala muvi, buk, mo miusik. a

MUVI

Aninit, yu putum saen ya ✔ klosap long ol kaen muvi we yu yu laekem tumas.

○ Comedy

○ Action/Adventure

○ Science fiction

○ Ol narafala

?Yu yu save . . . ? Long India, plante taem ol man oli wokem bitim wan taosen muvi long wan yia. Namba ya i bigwan moa i bitim namba blong ol muvi we ol narafala kantri oli stap wokem.

?Yu mas stap longwe long wanem samting? Plante muvi oli leftemap ol fasin we oli agensem ol rul blong Baebol. Samfala oli soemaot ol tabu haf blong bodi blong man mo woman, mo ol raf fasin. Mo ol narafala oli soemaot ol wok blong rabis spirit. Be Baebol i talem se: “Yufala i mas sakemaot olgeta i gowe long laef blong yufala. Bambae yufala i no moa kros. Bambae yufala i no moa faerap. Bambae yufala i no moa stap badfren long yufala. Bambae yufala i no moa tok agens long narafala man, mo yufala i no moa yusum ol doti tok.” (Kolosi 3:8) Mo tu, God i agensem evri wok we i joen wetem wok blong rabis spirit.—Dutronome 18:10-13.

?Bambae yu jusum olsem wanem? “Bifo we wan niufala muvi i kamaot, oli soemaot ol smosmol haf blong hem fastaem long televisin, blong traem pulum tingting blong ol man blong oli wantem wajem muvi ya. Be sipos mi luk se ol smosmol haf ya oli no stret, bambae mi no wajem muvi ya.”—Jerrine. b

“Sipos wan man i talem se wan muvi i gud, be mi mi save se man ya i no tinghae long ol rul we mi mi tinghae long olgeta, bambae mi mi no trastem tok blong hem se muvi ya i gud.”—Caitlyn.

“Taem mi stap wajem wan muvi long sinema, nao i gat sam samting long muvi ya we mi mi no laekem, mi goaot wantaem.”—Marina.

“Taem mi wantem save moa long wan muvi, mi go long wan ples long Intenet we i soemaot sipos i gat nogud fasin blong man wetem woman, sipos i gat raf fasin mo ol doti tok swea long muvi ya.”—Natasha.

 Wan advaes: I gud yu lukaotem ol muvi we oli no tokbaot ol samting we oli save spolem tingting blong yu. Wan yangfala we nem blong hem Masami, i talem se: “Mi mi harem gud blong wajem ol muvi we oli tokbaot ol stori blong bifo.”

Yu traem tingbaot,

‘?Ol muvi we mi mi stap wajem, oli givhan long mi blong mi obei long ol loa blong God long saed blong nogud fasin blong man wetem woman, raf fasin, mo wok blong rabis spirit, no nogat?’

BUK

Aninit, yu putum saen ya ✔ klosap long ol kaen buk we yu yu laekem blong ridim.

○ Stori we man nomo i mekemap (Fiction)

○ Tru Stori (Nonfiction)

○ Ol narafala

?Yu yu save . . . ? Long Yunaeted Stet, ol man oli printim bitim wan taosen buk long wan wik nomo.

?Yu mas stap longwe long wanem samting? Olsem long ol muvi, plante buk oli leftemap ol fasin we oli agensem ol rul blong Baebol. Yu traem tingbaot, sam long ol buk ya oli tokbaot klia ol tabu haf blong bodi blong man mo woman, mo ol wok blong rabis spirit. Be Baebol i talem se: “I no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman, mo ol narafala krangke fasin olsem, mo fasin blong man we i wantem evri samting, bambae yufala i no tokbaot.” (Efesas 5:3) Baebol i talem tu se ol wok blong rabis spirit oli “nogud olgeta long fes blong Hae God.”—2 King 17:17.

?Bambae yu jusum olsem wanem? “Taem mi stap lukaotem wan gudfala buk, mi ridim smol toktok we i stap biaen long buk, mo mi openem buk ya nao mi lukluk kwiktaem ol pej blong hem. Sipos mi luk sam samting we oli no stret, mi no moa pem buk ya.”—Marie.

“Taem mi kam bigwan, mi stat blong tingting gud ale mi luksave se i impoten blong mi lesin long tingting blong mi we mi trenem folem Baebol. Sipos mi kasem save se wan buk i nogud, mi no moa ridim. Mi luksave se buk ya i no laenap wetem tingting blong God.”—Corinne.

 Wan advaes: Yu traem ridim ol buk we oli tokbaot ol defdefren samting. Lara we i gat 17 yia, i talem se: “Mi mi intres tumas blong ridim ol buk we oli tokbaot ol stori blong bifo, i bitim ol stori blong tede. !Ol tok we oli yusum long ol buk ya, wetem ol man we ol buk ya oli tokbaot, mo stori we i stap long ol buk ya oli gud tumas!”

Yu traem tingbaot,

‘?Buk ya we mi mi stap ridim i mekem mi harem gud long ol fasin we God i no glad long olgeta?’

MIUSIK

Aninit, yu putum saen ya ✔ klosap long ol kaen miusik we yu yu laekem tumas.

○ Rock

○ Classic

○ Jazz

○ R&B

○ Hip-hop

○ Ol narafala

?Yu yu save . . . ? Fo bigfala kampani blong miusik oli stap rikodem samwe long 30,000 CD long wan yia.

?Yu mas stap longwe long wanem samting? Olsem long ol muvi mo ol buk, plante miusik tede oli tokbaot ol rabis fasin. Ol toktok blong ol singsing ya mo ol video blong olgeta we oli soemaot ol tabu haf blong bodi blong man mo woman, oli save pulum yu blong yu wantem slip olbaot. (1 Korin 6:18) Leigh, wan gel we i gat 21 yia, i talem se: “Bighaf blong ol miusik tede oli pulum ol man blong oli mekem ol fasin we Baebol i agensem. Mo ol miusik ya oli mekem se ol man oli wantem danis long fasin we i pulum filing blong narafala.”

?Bambae yu jusum olsem wanem? “Mi mi stap askem se, ‘sipos wan man we i bigman long ol Kristin fasin, i lukluk lis blong nem blong ol miusik we mi mi stap lesin long olgeta, ?bambae mi mi sem long samting we hem i save faenemaot?’ Samting ya i givhan long mi, blong mi save wanem kaen miusik we mi mas lesin long hem.”—Leanne.

Wan advaes. Yu mas glad blong lesin long ol defdefren stael blong miusik. Wan yangfala we nem blong hem Roberto, i talem se: “Papa blong mi i laekem ol miusik we i no gat man i singsing long olgeta, taswe taem mi stap gruap, mi stap lesin long ol miusik ya. !Taem mi kasem save moa long stael blong miusik ya, mo long semtaem mi lanem blong plei long piano, mi faenemaot plante niufala samting!”

Yu traem tingbaot,

‘?Miusik ya we mi mi stap lesin long hem, i givhan long mi blong mi bos long filing ya blong wantem slip wetem narafala, no nogat?’

!I GUD YU RIDIM SAM MOA SAVE LONG SAED YA!

Yu ridim japta 31 mo 32 blong buk ya Questions Young People Ask—Answers That Work, Volume 2, we ol Witnes blong Jehova oli printim.

[Ol futnot]

[Tok blong makem poen long pej 31]

Sipos yu yu no lesin long tingting blong yu we yu trenem folem Baebol, nao yu wajem ol muvi, yu ridim ol buk, mo yu lesin long ol miusik we plante man oli laekem, yu no winim wan samting be yu yu stap halpem ol kampani we oli wokem ol muvi, buk, mo miusik ya blong oli win.

[Bokis/Foto blong pija long pej 30]

“Plante buk mo muvi oli no laenap nating wetem ol rul blong Baebol. Be taem mi faenem wan stori we i no agensem ol rul ya, ale mi harem gud blong wajem no ridim stori ya.” Adrian

[Bokis blong pija long pej 30]

I GUD YU ASKEM LONG PAPA MO MAMA BLONG YU

?Stat long taem ya we yutufala i yangfala i kam kasem tede, ol muvi, buk, mo miusik oli jenis olsem wanem? ?Stat long taem ya we papa mama blong yutufala i yangfala, kasem taem we yutufala i yangfala, ol muvi, ol buk mo ol miusik oli jenis olsem wanem?

[Bokis/Foto blong pija long pej 31]

“Sam miusik oli save pulum yumi blong wantem save moa long sam samting we yumi ol Kristin yumi mas stap longwe long olgeta. Yumi no wantem go agensem gudfala tingting blong yumi we yumi trenem folem ol rul blong Baebol, jes from we yumi laekem saon blong wan miusik.” Janiece