Baebol i Talem Wanem

Rod Blong Mekem Se Mared i Stap Gud

“God we i mekem olgeta samting, fastaem, hem i mekem tu man nomo, wan we i man, wetem wan we i woman. Nao hem i talem se, ‘From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.’ . . . Mo from we God i joenem tufala olsem, man i no mas brekem mared blong tufala.”—Hemia ol tok blong Jisas Kraes, we i stap long Matiu 19:4-6.

OL FASIN blong wol ya oli stap jenis oltaem, mekem se ol man oli no moa tinghae long mared. Plante taem, mared man mo woman tufala i stap tugeta go kasem we tufala i no moa laeklaekem tufala, no taem tufala i kasem problem, we samtaem problem ya i smol nomo, ale tufala i seraot no tufala i divos. Sore tumas, plante taem ol pikinini nao oli safa from samting ya.

Ol man we oli stadi long Baebol, oli no sapraes long samting ya. Baebol i tokbaot se long ol ‘las dei’ ya we yumi stap long hem tede, ol man bambae oli no gat ol gudfala fasin we i mekem ol famle oli joen gud. Ol man oli no moa putum tingting blong olgeta i stap strong long narafala, oli no gat lav we i tru, mo oli no gat sore. (2 Timoti 3:1-5) ?Olsem wanem? ?Yu yu wari from we ol man oli no moa gat ol fasin ya, mo plante famle oli stap harem nogud from? ?Yu yu tinghae long mared?

Sipos yu yu talem yes long tufala kwestin antap, Baebol i save mekem tingting blong yu i harem gud. Ol advaes blong Baebol oli givhan finis long plante mared man mo woman, mo i gohed yet blong givhan long plante narafala. Yu traem tingbaot faef stamba rul we oli save givhan bigwan long wan mared. a

Faef Impoten Samting We i Mekem Se Mared i Stap Gud

(1) Yu mas luksave se mared i wan samting we i tabu. Ol tok blong Jisas we oli stap long lefsaed blong pej ya, oli soemaot se hem mo Jehova we i mekem evri samting, tufala i luk mared olsem wan samting we i tabu. Yumi luksave tingting ya blong God taem hem i tok strong long sam man bifo. Ol man ya oli mekem divos long woman blong olgeta, blong oli save maredem ol woman we oli yangfala moa. Hem i talem se: “Yufala i no holem ol promes ya we yufala i mekem long ol woman blong yufala. Taem we yufala i yangfala, yufala i mared, mo long taem ya, yufala i promes long fes blong God, se bambae yufala i holemtaet promes ya we yufala i mekem wetem ol woman ya blong  yufala. Ol woman ya, oli blong yufala olwe, be yufala i girap, yufala i brekem promes blong yufala, we yufala i mekem wetem olgeta long fes blong God.” Biaen, Jehova i talem strong tok ya se: “Mi mi no laekem nating fasin ya we man i mekem i strong tumas long woman blong hem.” (Malakae 2:14-16) I klia se God i tinghae long mared. Hem i luk fasin we man i mekem long woman blong hem, mo fasin we woman i mekem long man blong hem.

(2) Man i mas mekem gud wok blong hem. Taem famle i tokbaot sam impoten desisen, i mas gat wan long famle we i mekem las desisen. Baebol i talem se man nao i mas mekem wok ya. Efesas 5:23 i talem se: “Man i hed blong woman blong hem.” Be taem man i hed blong woman, hemia i no min se hem i save mekem i strong long woman blong hem. Man i mas tingbaot se hem mo woman blong hem, tufala i “olsem wan bodi nomo.” Hem i mas ona long woman blong hem, mo i mas askem tingting blong hem taem hem i wantem mekem sam desisen long famle. (1 Pita 3:7) Baebol i talem se: “Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo.”—Efesas 5:28.

(3) Woman i mas givhan long man blong hem. Baebol i talem se woman i “wan fren” blong man blong hem. (Jenesis 2:18) Taswe hem i save givhan bigwan blong mekem se mared i stap gud. From we hem i wan fren, hem i no traem blong winim man blong hem, be hem i givhan long hem wetem lav. Samting ya i mekem se i gat pis long famle. Efesas 5:22 i talem se: “Yufala ol woman we i mared. Yufala i mas ona long ol man blong yufala.” Be sipos hem i no agri wetem man blong hem long wan samting, ?olsem wanem nao? Long taem olsem, hem i mas talemaot tingting blong hem wetem respek, sem mak olsem we hem i wantem se man blong hem i mekem long hem.

(4) Yutufala i mas gat stret tingting, mo yutufala i mas save se bambae yutufala i fesem sam trabol. I gat sam samting we oli save traem wan mared man mo woman. Maet wan long tufala i no tingting gud, ale hem i sakem wan tok we i no kaen nating. Maet tufala i gat problem long saed blong mane, no wan long tufala i kasem wan bigfala sik, no tufala i bisi tumas blong lukaot long ol pikinini. Taswe Baebol i talem stret se olgeta we oli mared, “oli gat trabol long laef blong olgeta.” (1 Korin 7:28) Be man mo woman tufala i no mas letem ol trabol mo ol hadtaem olsem i spolem mared blong tufala. Sipos man mo woman tufala i lavlavem tufala mo tufala i gat waes blong God, tufala i naf blong stretem ol bigfala trabol. ?Olsem wanem? ?Yu yu gat waes ya we i save givhan long yu blong stretem ol trabol we bambae oli kamaot long famle blong yu? Baebol i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.”—Jemes 1:5.

(5) Yutufala i mas stap tru long yutufala. Bigfala samting we i save spolem mared, hemia sipos wan long tufala i go slip wetem narafala man no woman. God i talem se man i save divos long woman blong hem from wan risen ya nomo. (Matiu 19:9) Baebol i talem se: “Mared i wan fasin we i yufala evriwan i mas tinghae long hem. Yufala we i mared, yufala i mas lukaot gud long mared blong yufala, blong i stap klin gud oltaem. God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.” (Hibrus 13:4) ?Wanem samting we man mo woman tufala i mas mekem, blong tufala i no foldaon long trap ya blong slip wetem wan narafala man no woman? Baebol i talem se: “Oltaem man i mas stap wetem woman blong hem, mo woman tu i mas stap wetem man blong hem, blong tufala i save harem gud long tufala.”—1 Korin 7:3, 4.

Maet samfala oli ting se ol faef poen ya oli no stret long taem blong yumi. Be taem man i folem ol poen ya, frut we i kamaot long laef blong hem i defren. Hem i sem mak long frut we i kamaot long laef blong wan man, taem hem i letem God i lidim hem long laef blong hem. “Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.” (Ol Sam 1:2, 3) “Evri samting” i minim mared tu.

[Futnot]

?YU YU BIN TINGBAOT?

● ?Wanem tingting blong God long divos?—Malakae 2:14-16.

● ?Wanem fasin we man i mas mekem long woman blong hem?—Efesas 5:23, 28.

● ?Waes blong hu i save mekem se mared i stap gud?—Ol Sam 1:2, 3.