?From Wanem Mi Mi Talem Samting Ya?
Ol Yangfala Oli Askem
?From Wanem Mi Mi Talem Samting Ya?
Ol tok ya bambae i givhan long yu blong yu faenemaot
?FROM WANEM samtaem yu talem samting we i no stret?
?WANEM samting we yu mas mekem, taem yu mestem toktok blong yu?
?OLSEM WANEM yu save bos long tang blong yu?
“Mi mi traehad blong bos long tang blong mi. !Be samtaem mi mestem, nao mi harem nogud! !Mi wantem go haed long wan hol, olsem krab!”—Chase
“Samtaem ol man oli stap tingbaot wan samting we i no blong talem. !Be mi, mi girap mi talem wantaem! . . . !awa!”—Allie
?FROM WANEM SAMTING YA I HAPEN?
Stamba vas: “Man we i no mekem mastik samtaem long toktok blong hem, hem i wan man we i stret gud olgeta.” (Jemes 3:2) Ol tok blong vas ya i klia. I no gat man we i save bos fulwan long ol toktok blong hem. Annette a i talem se tingting blong hem i olsem wan trak we i no gat brek. Taem hem i tingbaot wan samting, be hem i talem tu. Ating yumi evriwan i olsem.
Tru stori: “I gat sam klos we mi mi no moa wantem, be wan fren blong mi i talem se i laekem olgeta. Wantaem nomo mi talem long hem se: ‘!Ol klos ya oli no stret long yu!’ Fren ya i talem se: ‘!Ei! ?Yu ting se mi mi fatfat?’”—Corrine.
I gud yu traem kasem save from wanem yu yu mestem sam samtaem long toktok blong yu. Yu save mekem olsem:
● Yu traem luksave fasin blong yu we i no stret.
․․․․․ Taem mi kros, mi sakem enikaen toktok nomo
․․․․․ Mi no tingting gud bifo we mi toktok
․․․․․ Mi no lesin, mi gohed blong toktok nomo
․․․․․ Narafala samting ․․․․․
Wan yangfala i talem se: “Mi mi tok plei tumas, nao samtaem ol man oli harem nogud long toktok blong mi from we oli ting se mi stap spolem olgeta.”—Alexis.
● Yu traem luksave hu nao yu spolem moa.
․․․․․ Papa mama
․․․․․ Brata sista
․․․․․ Fren
․․․․․ Narafala ․․․․․
Wan yangfala i talem se: “Sore tumas, mi spolem moa ol man we mi lavem olgeta. Ating mi mekem olsem from we mi no fraet long olgeta, nao mi no moa lukaot gud long toktok blong mi.”—Christine, we i gat 20 yia blong hem.
?WANEM SAMTING WE YU MAS MEKEM, TAEM YU MESTEM TOKTOK BLONG YU?
Stamba vas: “Oltaem yumi mas strong blong folem ol fasin we i save mekem pis.” (Rom 14:19) Wan rod blong folem advaes ya, hemia blong talem sore long man we yumi mekem hem i harem nogud.
Tru stori: “Taem mi mi gat ten manis nomo, mama blong mi i ded, mo papa blong mi i no wantem mi. Ale, angkel mo anti blong mi, tufala i lukaot long mi. Mi tingbaot se taem we mi gat 10 no 11 yia, mi harem nogud tumas mo mi kros se mama blong mi i ded. Mi harem se mi wantem faerap long wan man. Taswe, taem anti blong mi i askem long mi blong mi givhan long hem long wan wok, mi tokbak long hem. Ale, mi mi sakem ol strong tok gogo mi sek we mi talem se, ‘Mi no laekem yu’ mo ‘Yu no rili mama blong mi.’ Anti blong mi i sek we i sek. Hem i wokbaot i go long rum blong hem, i satem doa, mo hem i krae bigwan. Mi harem nogud tumas. Hem i lukaot gud long mi, i givim evri samting we mi nidim, be mi mi mekem olsem we hem i wan doti nomo. Angkel blong mi i tok long mi, i ridim sam vas blong Baebol we oli talem se yumi mas bos long tang blong yumi. Mi mi luksave se mi nao mi rong. Ale, mi talem sore long anti blong mi.”—Karen.
Long spes daon, yu raetem from wanem i had blong yu talem sore.
․․․․․
?From wanem yu yu harem gud taem yu talem sore?
․․․․․
Save blong halpem yu: Yu traem tingbaot advaes we i stap long Ol Proveb 11:2 mo Matiu 5:23, 24.
I moagud yet sipos yu tingting gud fastaem, nao yu toktok. Olsemia, yu no nid blong talem sore. Taswe, yu mas mekem olsem:
?OLSEM WANEM YU SAVE BOS LONG TANG BLONG YU
Stamba vas: “Yufala evriwan i mas rere oltaem blong lesin, be yufala i no mas hareap blong toktok. Mo yufala i no mas hareap blong kros.” (Jemes 1:19) Hemia toktok blong sam yangfala we maet i givhan long yu blong yu folem vas ya.
Yu ridim ol vas ya, nao yu traem joenem wetem tok we i stret long olgeta.
1 “Yu no mas tinghevi tumas long evri tok blong narafala. Olsem nao, bambae yu no hareap blong harem nogud long toktok blong hem.”—Danette.
2 “Mi mi go wokbaot. Olsemia mi stap mi wan, mo mi gat taem blong mekem tingting blong mi i kwaet.”—Brielle.
3 “Taem mi mi smol, mi ting se mi mas win long evri toktok, mo mi agensem evri samting we narafala i talem. Be mi lanem se i moa gud we mi letem sam toktok i pas, i go long wan sora i kamaot long narafala sora.”—Celia.
4 “Sipos wan man i stap singaot strong long yu, yu no ansabak long hem. Man ya bambae i taed blong toktok hem wan. I gud we yu gat longfala tingting. Yu no putum moa wud long faea.”—Kerrin.
5 “Samtaem mi mi kros long wan man. Kwiktaem nomo, ol tok i kam long hed blong mi we mi wantem talem. Be mi tingting fastaem, nao mi kasem save se ol tok ya oli blong nating nomo. Samting we mi lanem se, mi no mas hareap blong bosta.”—Charles.
[Futnot]
a Mifala i jenisim sam long ol nem ya.
[Bokis/Foto blong pija long pej 22]
Allie—Bifo we mi toktok, mi traem ansa long ol kwestin ya: ‘?Tok blong mi bambae i givhan? ?Tok blong mi bambae i mekem wanem long man we i harem?’ Sipos yu ting se tok we yu wantem talem i no stret, i moa gud yu no talem.
Chase—Taem mi wantem toktok, mi traem tingbaot se tok ya bambae i mekem wanem long ol man we oli harem. Mi ting se taem mi stap kam bigwan, mi stap lanem moa blong bos long tang blong mi. I tru nomo se, moa yu traehad, moa yu winim.
[Bokis blong pija long pej 23]
I GUD YU ASKEM LONG PAPA MO MAMA BLONG YU
Jemes i talem se yumi evriwan i sinman, taswe plante taem yumi mekem i no stret. I gud yu askem long papa mo mama blong yu se: “?Fastaem, yutufala i luk se i had blong bos long tang blong yutufala? ?Yutufala i bin mekem wanem blong winim trabol ya?”—Jemes 3:2.
[Foto blong pija long pej 22]
“Taem yu skwisim sop blong brasem tut, yu no moa save mekem i gobak long plastik blong hem. Sem mak long toktok blong yumi, taem yumi talem samting we i spolem narafala, yumi no save tekembak.”—James.
