I No Let Tumas Blong Kam Fren Blong God

Olavi J. Mattila i talem stori ya

Long laef blong mi, mi bin mitim plante haeman blong wol, we sam long olgeta oli ol bigman blong gavman. Nao taem mi gat bitim 80 yia, wan Witnes blong Jehova i askem long mi se: “Yu yu wantem save God ya we i mekem olgeta samting?” Kwestin ya i mekem mi mi tingting se, “Mi mi olfala finis. ?I gat rod blong mi save God? ?I tru se mi save kam fren blong God?”

MI MI bon long Oktoba 1918 long taon ya Hyvinkää long Finlan. Famle blong mi i stap fidim ol buluk, hos, faol mo gus. Taswe taem mi smol nomo, mi stap mekem plante wok blong givhan long papa mama blong mi. Mi wok had mo mi glad long wok we mi mekem.

Taem mi stap kam bigwan, papa mama i wantem we mi mas skul moa. Taswe tufala i sanem mi mi go long yunivesiti. Mo mi joen plante long spot. Long taem ya nao mi mitim Masta Urho Kekkonen. Hem i lukaot long wan grup blong ol man we oli joen long spot long Finlan. Mi no save nating se biaen, Masta Kekkonen bambae i kam praeminista blong Finlan, mo biaen bakegen i kam presiden blong kantri. Hem i holem ol wok long gavman blong samwe long 30 yia. Antap long hemia, mi no save nating se bambae mi wok klosap long hem.

Mi Kasem Haenem Mo Paoa

Long yia 1939, ol man Finlan wetem ol man Soviet Yunion oli faet. Long Novemba blong yia ya, mi joen long ami. Fastaem, oli putum mi blong trenem ol soldia. Biaen oli putum mi mi kam komanda blong wan grup blong ol spesel soldia. Ples we mifala i go faet long hem, nem blong hem Karelia. Hem i stap stret long mak blong graon we i seraotem Finlan wetem Soviet Yunion. Long hot taem blong yia 1941, wan bom i bosta taem mifala i stap faet klosap long taon ya Vyborg. Mi kasem kil from ol smosmol pis aean we oli kamaot long bom ya. Ale oli tekem mi mi go long hospital blong ami. Mi no moa save gobak long faet.

Long manis Septemba blong yia 1944, mi aot long ami mo mi gobak long skul. Mi gobak tu long spot we mi laekem tumas. Tri taem mi winim fas praes long ol resis long kantri blong mi. Mo long skul, mi kasem tu setifiket long yunivesiti (teknoloji mo ekonomi).

Taem mi stap bisi long spot mo long skul, Masta Urho Kekkonen i kam wan bigman blong politik. Long yia 1952 taem hem i praeminista, hem i askem long mi blong mi kam wok long gavman. Ale oli sanem mi mi go wok long ofis blong embasi blong Finlan we i stap long Jaena. Taem mi stap long Jaena mi mitim lida blong ol man Jaena, hemia Mao Tse-tung. Be long olgeta man we mi mitim long Jaena, i gat wan we i impoten moa. Hemia wan woman we i naes tumas, nem blong hem Annikki. Hem i wok blong Ministri blong Foren Afea long Finlan. Mitufala i mared long Novemba 1956.

Long yia 1957, oli sanem mitufala i go long Ajentina blong mi wok long embasi blong Finlan. Long ples ya, tufala boe blong mitufala i bon. Long Jenuware 1960, mifala i gobak long Finlan. Smoltaem biaen, smol gel blong mitufala i bon.

 Mi Kasem Bigfala Wok Long Gavman

Long Novemba 1963, Presiden Kekkonen i singaot mi blong mi kam wan minista long gavman blong hem, nating se mi mi neva joen long wan pati blong politik. Mi wok olsem minista blong foren tred (minista we i lukaot long bisnes). Blong 12 yia, mi holem sikis defren wok insaed long palemen, mo tu taem mi wok olsem minista blong foren afea. Long taem ya, mi mi gat strong tingting se man i gat naf save blong winim ol trabol long wol. Be mi luksave kwiktaem se ol man oli hanggri from paoa nomo. Mi luk bigfala trabol we i kamaot taem man i no trastem narafala, mo taem man i wantem tumas blong kasem samting we narafala i gat.—Prija 8:9.

Mi luksave tu se i gat plante man mo sam lida we oli wantem tumas blong mekem wol i kam gud moa. Be nomata we oli gat gudfala tingting, oli no save mekem samting we oli wantem i kamtru.

Long hot taem blong yia 1975, ol bigman blong gavman long 35 kantri blong Yurop oli kam long wan bigfala miting long Helsinki. Long taem ya, mi mi minista blong foren afea mo mi wan advaesa blong Presiden Kekkonen. Oli givim wok long mi blong mekemrere evri samting blong miting ya. Long taem ya, mi mi mitim ol bigman blong ol gavman we oli kam long miting ya.

Wok ya i traem mi, from we i no isi blong mekem ol man oli glad. I hadwok jes blong mekem se evri man long miting ya oli glad long ples we oli sidaon long hem. Nating se i olsem, mi ting se bigfala miting ya, wetem sam smol miting we oli holem biaen, oli mekem se sam moa man oli kasem samting we oli gat raet long hem. Mo oli givhan tu blong mekem se ol kantri we oli gat bigfala paoa oli wok wanples.

Mi Mi Nidim God Long Laef Blong Mi

Long yia 1983 mi ritae long wok blong gavman. Mi mo Annikki, mitufala i go stap long Franis, from we gel blong mitufala i stap longwe. Long Novemba 1994, ol dokta oli faenemaot se Annikki i gat kansa blong titi. Long sem yia ya, mi mi joen long wan bisnes. Be mi faenemaot biaen se sam man long bisnes ya oli stap stilim mane blong ol man. Long ful laef blong mi, mi bin wok had blong gat wan gudnem. Be bisnes ya i sakem doti long gudnem ya.

Wanwan taem, mi bin mitim ol Witnes blong Jehova. Mi glad we oli kam long haos blong mi mo oli givim ol buk long mi. Be mi mi bisi tumas, mi no gat taem blong stadi long Baebol. Long yia 2000, mi mi stap lukaot long woman blong mi we i gat kansa. Long Septemba 2002, tu Witnes blong Jehova i kam long haos blong mi. Tufala i askem kwestin long mi, we mi tokbaot long stat blong stori. Mi tingbaot se: “?I gat rod blong mi mi save God? ?I tru se mi save kam fren blong hem?” Mi go lukaot Baebol blong mi, we mi no ridim longtaem. Ale evri wik ol Witnes oli kam luk mi blong storian long Baebol.

Long Jun 2004, woman blong mi we mi lavem hem tumas, i ded. Ol pikinini blong mi oli givhan  bigwan long mi blong mi harem gud bakegen. Nating se i olsem, mi stap tingbaot se: “?Wanem i hapen long yumi taem yumi ded?” Mi go luk tu pasta blong Luteran Jos, mo mi askem kwestin ya long tufala. Tufala i no save ansa, tufala i talem nomo se, “Tru ya. Kwestin ya i had tumas.” Ansa blong tufala i no givhan long mi nating. Long taem ya nao mi luksave moa se mi nidim God long laef blong mi.

Taem mi gohed blong stadi wetem ol Witnes, mi mi kasem save ya blong Baebol we mi wantem tumas. Mi lanem se taem man i ded hem i no moa save wan samting, i olsem we hem i slip nomo. Wan dei, bambae hem i laef bakegen long wol ya. (Jon 11:25) Save ya i mekem se mi mi gat gudfala tingting long fiuja, mo mi harem gud bigwan.

Mi ridim Baebol fulwan. Wan vas blong Baebol we mi laekem tumas, hemia Maeka 6:8. Vas ya i talem se Jehova “i wantem blong yumi stap mekem ol fasin we i stret gud, mo blong yumi stap soemaot we yumi lavem ol man tumas, mo blong yumi stap fren gud wetem hem long evri haf blong laef blong yumi, we tingting blong yumi i stap daon.” Mi laekem tumas tingting we i stap long vas ya, from we i waes mo i no had blong kasem save long hem. Hem i soemaot se Jehova i lavem ol man mo hem i mekem i stret long ol man.

Mi Tingting Strong Long Ol Promes Blong God

Taem mi kasem save long God, mi bilif moa long hem mo mi trastem hem. !Mi stap kam fren blong hem! Mi mi laekem tumas ol tok blong Aesea 55:11, we i talem se: “Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.” I tru, plante long ol promes blong God oli kamtru finis. Taswe yumi trastem hem se bambae hem i mekem ol narafala promes blong hem tu oli kamtru. Ol samting we ol gavman blong man mo ol bigfala miting blong politik oli no naf blong mekem, be God bambae i mekem i kamtru. Ol Sam 46:9 i talem se: “Hem i stap mekem ol faet i finis long olgeta ples long wol.”

Ol miting blong ol Witnes oli givhan bigwan long mi. Long ol miting ya mi luk stret long ae blong mi, samting we Jisas i talem se bambae i makemaot ol man blong hem, hemia se oli lavlavem olgeta tru. (Jon 13:35) Nomata se oli blong defdefren kantri mo laen, be oli joen gud nomo. Politik mo big bisnes i no save mekem ol man oli joen gud olsem.

Wan Samting We i Nambawan Tumas

Naoia mi bitim 90 yia finis. Long tingting blong mi, samting we i gud moa i winim olgeta samting long laef blong mi, hemia se mi mi wan Witnes blong Jehova. Bifo, mi no save God. Mi olsem wan emti dram nomo. Be naoia mi fulap long ol save blong Baebol. Mi save from wanem yumi laef mo mi save God tru.

Nating se mi mi olfala tumas, be mi glad se mi save go yet long ol miting mo long wok blong prij. I tru se long laef blong mi, mi mitim plante bigman blong gavman mo mi holem ol bigfala wok. Be Jehova God nao we mi mi glad moa blong save hem. Hem i God ya we i mekem olgeta samting, mo mi glad we mi save kam fren blong hem. Mi talem tangkiu tumas long hem, mo mi wantem presem hem from we hem i letem mi mi ‘joen wetem hem blong mekem wok blong hem.’ (1 Korin 3:9) !Yes, i no let tumas blong kam fren blong Jehova, God ya we i mekem olgeta samting!

[Tok blong pija long pej 25]

Mi wetem Presiden Kekkonen mo Presiden Ford blong Amerika, long bigfala miting long Helsinki long yia 1975

[Tok blong pija long pej 25]

Mi wetem Presiden Kekkonen mo Brezhnev we i lida blong Soviet Yunion

[Tok blong pija long pej 26]

Mi mi stap joen yet long ol Kristin wok

[Foto Credit Lines long pej 25]

Lower left: Ensio Ilmonen/Lehtikuva; lower right: Esa Pyysalo/Lehtikuva