Baebol i Talem Wanem

?I Oraet Blong Man i Slip Wetem Man?

I GAT plante moa man naoia we oli ting se i oraet blong man i slip wetem man. Long wan jos long Amerika, samfala oli wantem se oli jenisim ol tok blong Baebol we i agensem fasin blong man i slip wetem man. Oli talem se “waes blong ol man tede” i defren. Wan jos blong Brasil tu i gat tingting blong ol man tede long fasin ya blong man i slip wetem man. Pasta blong jos ya i jes mared wetem wan man. Taswe hem i talem se oli mas “skelem bakegen ol tok blong Baebol.”

I gat sam man we oli no agri se i oraet blong man i slip wetem man. Be plante narafala oli talem se ol man ya we oli no agri oli bitim mak, oli agens tumas. ?Be Baebol i talem wanem?

?Baebol i Talem Wanem?

Baebol i no talem se yumi mas agensem man. Be Baebol i agensem fasin blong man we i slip wetem man.

“I tabu blong man i go slip wetem narafala man, from we fasin ya i nogud we i nogud olgeta.”—Levitikas 18:22.

Hemia wan long ol loa we God i talem long Moses, blong i talemaot long ol man Isrel nomo. Be yumi save se loa ya i stret long enikaen man, from we vas ya i talem se, long tingting blong God, “fasin ya i nogud we i nogud olgeta.” Ol man we oli stap raonabaot long ol man Isrel oli mekem ol fasin olsem man i slip wetem man, man i slip wetem stret famle blong hem, man i stilim woman blong narafala man, mo ol narafala fasin we Loa i agensem. From samting ya, God i talem se ol man ya oli doti long fes blong hem. (Levitikas 18:24, 25) ?Olsem wanem? ?Long taem blong ol Kristin, tingting blong God i jenis? Yu traem tingbaot vas ya:

“God i lego olgeta finis. Hem i letem olgeta oli gohed oli folem ol rabis tingting blong olgeta we i blong sem nomo. Ol woman, oli stap tanem stret fasin blong woman wetem man, nao oli stap mekem ol fasin we i no stret. Mo long sem fasin, ol man tu oli lego ol stret fasin blong man wetem woman, nao oli stap wantem tumas ol narafala man. Nao ol man oli stap mekem ol fasin ya wetem ol narafala man, we i blong sem nomo.”—Rom 1:26, 27.

?From wanem Baebol i talem se fasin blong man i slip wetem man i no stret mo i samting blong sem? From we God i no mekem man blong i slip wetem man bakegen. Tu man i no save mekem pikinini. Baebol i talem se ol man we oli slip wetem man oli olsem ol stronghed enjel long taem blong Noa, we oli kamdaon long wol mo oli slip wetem ol woman. (Jenesis 6:4; 19:4, 5; Jud 6, 7) Long tingting blong God, olgeta evriwan oli mekem fasin we i no stret.

?From Wanem Sam Man Oli Ting Se i Oraet?

Samfala oli talem se: “Be man i save bon wetem fasin ya. No maet hem i olsem from we ol manples blong hem oli olsem. No ating hem i fesem sam trabol long laef blong hem, maet narafala i fosem hem blong slip wetem hem.” ?Olsem wanem? ?Ol samting ya oli mekem se i oraet blong man i slip wetem man? Nogat. Yu traem tingbaot: Ol saentis oli talem se sam man oli bon wetem fasin blong wantem dring bitim mak, mo hemia i save mekem se oli kam alkolik taem oli gruap. Hemia i sem mak long man we i gruap long famle we i dring tumas. Nating se yumi sore long ol man olsem, yumi no talem se i oraet nomo we oli gohed blong dring. Be yumi pulum olgeta blong oli agensem tingting ya blong wantem dring bitim mak, mo blong oli lego fasin ya.

Hemia i sem mak long man we i stap traehad blong winim problem ya blong wantem slip  wetem man. Baebol i no agensem man ya, be i agensem nogud fasin ya. Taswe, nating se man i bon olsem no i wantem mekem fasin ya from wan narafala risen, hem i mas traehad blong winim fasin ya mo ol samting we oli pulum hem. (Rom 7:21-25; 1 Korin 9:27) Baebol i givim ol gudfala advaes mo toktok blong pulum olgeta ya blong oli winim rabis fasin ya.

?God i Wantem Wanem?

Baebol i talem se, God “i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:4) Baebol i agensem fasin ya we man i slip wetem man. Be hem i no talem se yumi mas agensem ol man we oli mekem fasin ya.

God i talem se man i no mas slip wetem man. Yumi no mas ting nating long tok ya. Long 1 Korin 6:9, 10, Baebol i talem klia se man we i stap slip wetem man, mo woman we i stap slip wetem woman, oli no save go insaed long niufala wol. Be ol tok long vas 11 i leftemap tingting blong olgeta we oli stap traehad blong jenis, i se: “Bifo, sam long yufala oli olsem nomo. Be naoia, long nem blong Jisas Kraes, Masta blong yumi, mo long paoa blong Spirit blong God, God i wasemaot ol sin blong yufala finis blong mekem yufala i klin. Hem i mekem yufala i tabu, yufala i man blong hem, mo hem i mekem yufala i stret man finis long fes blong hem.”

Ol fas Kristin oli glad blong tekem man i kam joen wetem olgeta, sipos man ya i traehad blong mekem wosip olsem God i wantem. Hemia i sem mak tede. Ol man we oli traehad blong mekem God i glad, oli no jenisim ol tok blong Baebol, be oli jenisim laef blong olgeta blong mekem i laenap wetem Baebol.

?YU YU BIN TINGBAOT?

● ?Wanem tingting blong God long fasin ya blong man i slip wetem man?—Rom 1:26, 27.

● ?Olsem wanem? ?Baebol i talem se yumi mas agensem ol man ya?—1 Timoti 2:4.

● ?Yu ting se ol man ya oli save lego nogud fasin ya?—1 Korin 6:9-11.

[Tok blong pija long pej 28]

?I stret blong jenisim loa blong God se man i no mas slip wetem man?