Ol Yangfala Oli Askem

?Mi Save Mekem Wanem Blong Mi Glad Blong Stadi Long Baebol?

?From wanem mi mas stadi long Baebol? Yu traem tingbaot samting ya:

Baebol i save givhan long yu blong yu faenem plante gudgudfala samting we oli sas olsem gol. Buk ya we ol man oli pem moa i bitim ol narafala buk, i save givhan long yu long tri rod.

● Hem i save talem wanem we yu mas mekem blong yu gat wan gudfala laef

● Hem i save talem plante samting we oli no hapen yet, mo plante samting we oli hapen finis, we yu no save faenemaot long wan narafala buk

● Hem i save givhan long yu blong yu luksave ol fasin blong yu, mo blong yu kam gud moa a

!I HADWOK blong stadi long Baebol, be pei blong hem i bigwan! ?Yu yu wantem save wanem we sam yangfala oli mekem blong oli glad blong stadi long Baebol? Yu save katemaot nekis pej, yu benem, mo yu putum gud i stap. Long ol pej ya, i gat toktok blong sam yangfala we oli winim sam samting we i blokem olgeta blong stadi long Baebol. Mo oli tokbaot wanem we oli mekem blong oli kasem plante gudfala samting taem olgeta wanwan oli stadi. Yu save ridim bakegen ol tok blong olgeta taem yu nidim.

“Yumi evriwan i save faenem samting long Baebol we i givhan long yumi. Baebol i fulap long ol samting we yumi save stadi long olgeta. !Neva yumi save finisim olgeta!”—Valerie. b

[Ol futnot]

 [Bokis/Foto blong pija long pej 19, 20]

ADVAES WE YU SAVE FOLEM BLONG STADI LONG BAEBOL

?From wanem i had? YU HAREM SE YU NO WANTEM STADI

“Samtaem mi harem se mi no wantem nating blong sidaon wan aoa blong stadi.”—Lena.

?Wanem i save givhan long yu? YU MAS GAT RISEN BLONG STADI

Sipos yu wantem glad blong stadi long Baebol, yu mas ansa long kwestin ya se: ?Bambae mi kasem wanem gudfala samting? Maet yu wantem kam fren blong God. Maet yu wantem save moa long mining blong ol samting we oli stap hapen long wol. Maet yu wantem se fasin blong yu i kam gud moa. Baebol i save givhan long yu long saed ya mo long plante narafala samting tu.

“Taem yu stadi long Baebol, yu no mas ting se hem i wan wok no i olsem stadi we yu mekem long skul. I moa gud yu tingbaot stadi olsem rod blong kam klosap moa long Fren blong yu Jehova God, we hem i gud moa i bitim ol narafala fren we yu save gat.”—Bethany.

“Taem yu stadi, i olsem se yu wan yu spenem taem wetem Jehova God. Traem tingbaot, sipos yu mo papa mama blong yu, yufala i joen oltaem wetem wan man, ?yu save talem se man ya i fren blong yu no i fren blong papa mama blong yu? Sipos yu stadi yu wan, Jehova i save kam fren blong yu.”—Bianca.

Yu no mas fogetem samting ya: Baebol i save givhan long yu long plante rod, olsem vas ya i talem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.”—2 Timoti 3:16.

“Mi traem blong tingting nomo long ol gudfala samting we bambae mi kasem. Taem mi luk se mi mas kam gud moa long wan fasin, mi tingbaot stadi olsem rod blong faenemaot wanem we mi mas mekem blong kam gud moa.”—Max.

Yu traem tingbaot:

?Yu save tingbaot wan risen from wanem yu yu wantem stadi?

 ?From wanem i had? YU LES

“Mi stadi ten minit nomo, be mi taed finis. Afta long 20 minit, mi harem se mi wantem mekem wan narafala samting. !Afta long 30 minit, mi les blong ded!”—Allison.

?Wanem i save givhan long yu? YU TRAEM TINGBAOT SAM NIUFALA SAMTING WE YU SAVE MEKEM

Yu tingbaot samting we yu stadi long hem, fasin blong yu blong stadi, mo ples we yu stadi long hem, ale yu jenisim mo yu traem sam niufala rod.

“Maet yu gat sam kwestin. I gud yu tekem taem blong lukaot ansa blong olgeta. Taem yu finis blong stadi long wan samting we yu stap tingting long hem, yu harem se yu mekem wan gudfala samting mo yu glad we yu glad.”—Richard.

“Taem yu ridim wan stori, yu traem tingbaot se yu tu yu stap insaed long stori ya. Yu tingbaot se yu nao man ya we stori i stap tokbaot, no maet yu yu stap lukluk samting we i hapen long stori ya. Yu mekem olsem se yu save luk ol samting ya stret long ae blong yu.”—Steven.

“Yu traem sam samting we i save mekem se yu glad long stadi. I gud yu sidaon long yad mo yu dring jus. ?Hu i no laekem kakae twisti taem i stap stadi? Mi mi laekem blong mekem olsem.”—Alexandra.

Yu no mas fogetem samting ya: Taem yu les long wan samting, hemia from tingting blong yu nomo. I nogud yu talem se “stadi i mekem mi mi les,” i moagud yu talem nomo se “mi mi les blong stadi.” Sipos yu glad long stadi, bambae yu laekem, sipos yu no glad blong stadi, bambae yu no laekem. Taswe yu nomo yu save jenisim samting ya.—Ol Proveb 2:10, 11.

“Yu nao bambae yu mekem se yu glad long stadi blong yu long Baebol no yu les long hem.”—Vanessa.

Yu traem tingbaot:

?Wanem sam niufala samting we yu save mekem long stadi blong yu?

?From wanem i had? YU NO GAT TAEM

“Mi mi laekem tumas sipos mi save stadi moa long Baebol. Be mi bisi tumas. !I had blong faenem taem blong sidaon mo stadi!”—Maria.

?Wanem i save givhan long yu? YU MAS MEKEM SAMTING WE I MOA IMPOTEN FASTAEM

Taem yangfala i stap kam bigman, hem i mas lanem blong jusumaot samting we i moa impoten fastaem.—Filipae 1:10.

“Mama i givhan long mi blong mi luksave se oltaem nomo bambae mi gat samting blong mekem. Be mi mas lego wan samting blong mi gat taem blong mekem narafala samting. Taem mi kasem mak ya we mi wantem stadi moa, mi glad blong lego sam samting blong mi gat taem blong stadi.”—Natanya.

“Taem mi stap kam bigwan moa, mi kasem save se mi mas makemaot wan stret taem blong stadi. Mo mi meksua se mi stadi long taem ya, nomata wanem samting i hapen.”—Yolanda.

“Sipos yu mekem stadi blong yu bifo we yu pleplei, mi save se bambae yu glad moa long stadi blong yu. Mo tingting blong yu bambae i no stikim yu taem yu pleplei.”—Diana.

Yu no mas fogetem samting ya: Sipos yu no mekem samting we i moa impoten fastaem, bambae yu westem taem blong yu mo bambae yu no moa gat taem blong mekem samting we i impoten. I moagud yu lego samting we i no impoten blong yu save stadi.—Efesas 5:15, 16.

“!From we mi mi stap long haeskul, i isi blong mi tingbaot ol skul wok blong mi nomo! Be oltaem mi traehad blong mekem prapa Baebol stadi blong mi bifo we mi mekem ol narafala samting.”—Jordan.

Yu traem tingbaot:

?Wanem taem we yu yu save makemaot blong stadi?

[Bokis/Foto blong pija long pej 19]

SAM TINGTING BLONG OL NARAFALA YANGFALA

Zachary—Yu no nid blong stadi long sem samting we papa mama blong yu mo ol narafala oli stap stadi long hem. Yu mas jusum wan samting we yu yu wantem kasem save long hem. Long taem ya nao yu stap mekem prapa stadi blong yu.

Kaley—Fastaem yu stadi smol nomo. Maet i moa gud yu stadi blong faef minit nomo. Be impoten samting se yu mas mekem evri dei. Sloslo yu save stadi longtaem moa, maet 10 minit, 15 minit, gogo bambae yu glad blong stadi.

Daniela—Sam smosmol samting oli save givhan long yu blong yu glad moa blong stadi. I gud yu pem sam kalakala pen wetem wan notbuk. Sipos yu gat wan kompiuta, yu save mekem wan spesel folda blong raetem ol samting we yu lanem long stadi blong yu.

Jordan—Sipos mi stadi long samting we mi laekem, mi save stadi longtaem. Mo tu ples i mas kwaet. Mi no save stadi sipos i gat plante noes raonabaot long mi.

[Diagram on page 19]

(Lukluk niuspepa)

Katem

Benem