Trabol We i Kamaot Taem Man i Kros

Wan man i go long wan tekawe mo i odarem wan kakae. Be hem i ting se ol man ya oli slo tumas nao hem i kros we i kros. Ale hem i go insaed long tekawe ya, i tok nogud long wan man we i wok long ples ya, i pusum hem i go fas long kaonta, mo i slapem hem. Biaen hem i karem kakae blong hem mo i gobak afsaed.

YUMI evriwan i save kros samtaem. Kros i wan long ol fasin we yumi ol man, yumi gat, sem mak olsem we yumi stap lavem man, yumi stap putum tingting blong yumi i strong long wan samting, yumi stap wari, yumi stap sore, mo yumi stap fraet. Wan man we i naf blong bos long hem wan taem hem i kros, hem i soemaot kros ya be long wan fasin we i gud. Mo kros ya i save pusum hem blong i mekem wan samting we i gud. Traem tingbaot wan man we i wantem mekem wan samting, be sam trabol i blokem hem. Maet hem i kam kros, be kros ya i save mekem se hem i gat strong tingting blong winim ol trabol ya.

Stori we i stap antap i soemaot se kros i save pusum man blong i mekem samting we i nogud tu. Sam man oli kros kwik moa, oli kros plante taem moa, mo oli kros bigwan moa i bitim ol narafala. Taem wan narafala i mekem olgeta oli kros, oli save sakem rabis tok long hem no oli faetem hem. Ol man olsem oli no bos long olgeta taem oli kros, be oli letem kros i bos long olgeta. Taem man i mekem olsem, hem i stap long wan bigfala denja. Fasin ya i save mekem bigfala trabol long laef blong hem, i save spolem tingting blong hem, ol samting we hem i mekem, mo i mekem se hem i no moa joen gud wetem ol narafala.

Man we i no bos long hem wan taem hem i kros, hem i karem trabol i kam long hem wan mo long ol man raonabaot long hem. Man olsem i save faerap kwiktaem from ol smosmol samting nomo, mo bigfala trabol i save kamaot from. Yumi traem tingbaot tufala stori ya:

Wan man i stap wokbaot wetem sam fren blong hem long rod, ale wan narafala man i sutum hem long nek blong hem. Narafala ya i mekem olsem from we wan fren blong man ya i bangem hem wetem basket blong hem.

Wan yangfala we i gat 19 yia, i stap pleplei long wan vidio gem we i raf, nao smol bebi blong gelfren blong hem i tajem kontrola blong gem ya, mekem se yangfala ya i no moa winim gem ya. Hem i kros nao i kilim bebi ya gogo i ded. Bebi ya i gat 11 manis nomo.

I gat sam nius we oli stap kamaot long plante ples long wol we oli klosap sem mak long tufala stori ya. Hemia i soemaot se i gat plante moa man we oli no bos long olgeta taem oli kros. ?From wanem fasin ya i stap kam antap moa?

[Bokis blong pija long pej 3]

Kros i wan long ol fasin we yumi ol man, yumi gat. Taswe, i no rong blong kros sam samtaem sipos yumi naf blong bos long yumi. Be ol haf blong Wekap! ya oli tokbaot kros we i nogud, we i save spolem yumi mo ol narafala. Kros ya i save spolem tingting blong yumi, bodi blong yumi, mo i save mekem se yumi no moa fren wetem God.