Baebol i Talem Wanem

?Yumi Mas Prea Olsem Wanem?

YUMI save toktok long God ya we i gat Olgeta Paoa, mo yumi save talemaot ol tingting blong yumi we oli haed. Hemia i wan blesing we i bigwan bitim mak. Be plante man oli no save se oli mas prea olsem wanem, mo sam narafala oli wantem se prea blong olgeta i kam gud moa. Sam long ol disaepol blong Jisas oli wantem se oli kam gud moa long fasin blong prea. Wan long olgeta i talem long Jisas se: “Masta. Plis yu tijim mifala, blong mifala i prea.” (Luk 11:1) Jisas i ansa long olgeta, mo i talem prea ya we ol man oli singaot se Prea blong Masta no Lodsprea. Ol toktok blong prea ya oli isi nomo. Hem i givhan long yumi blong toktok long God long wan fasin we hem i glad long hem, mo i givhan long yumi tu blong kasem save long bigfala tingting blong Baebol.

Prea We Jisas i Tijim

Jisas i talem se: “From samting ya, taem yufala i prea bambae yufala i prea olsem. ‘Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu, mo we yu yu kam King blong olgeta man, mo we olgeta man long wol oli mekem ol samting we yu yu wantem, olsem we olgeta long heven oli stap mekem. Plis yu givim kakae long mifala, i naf blong tede. Yu fogivim mifala from ol sin blong mifala, olsem we mifala i fogivim ol man we oli stap mekem i nogud long mifala. Yu no letem ol samting oli kam traem mifala tumas, mo yu blokem Setan i no kam spolem mifala.’”—Matiu 6:9-13.

Yumi makem tok ya blong Jisas, we i talem se: “Bambae yufala i prea olsem.” ?Jisas i minim wanem? Hem i no wantem se ol man blong hem oli lanem prea ya baehat olsem wan nasiviru. Hem i givim woning finis long saed ya. (Matiu 6:7) Long prea ya, yumi lanem ol samting we oli impoten tumas long tingting blong God, i no ol samting we oli impoten long yumi nomo. Sipos yumi wantem save wanem nao ol samting ya, yumi mas kasem save long mining blong ol tok blong Jisas. Ale, i gud yumi tingbaot olgeta tok long prea blong Jisas.

Mining Blong Prea Blong Jisas

“Papa blong mifala. Yu yu stap long heven. Nem blong yu i tabu.” I stret nomo we Jisas i singaot God se “Papa,” from we Hem i lavem ol man mo i lukaot gud long olgeta, olsem wan gudfala papa. Mo tu, Hem i gat wan nem, hemia Jehova. Yumi no mas miksim nem ya wetem ol narafala taetel blong hem, olsem God we i gat Olgeta Paoa, God, mo Masta. a (Eksodas 3:14, futnot) Nem blong God i mekem yumi tingbaot ol gudfala fasin blong hem. ?Taswe from wanem i gat nid blong mekem nem ya i kam tabu? From we ol man oli giaman blong spolem nem ya mo oli sakem doti long hem.

Sam man we oli kasem trabol, oli talem se God nao i putum trabol ya long olgeta. Be samting we i tru se ol man nomo oli stamba blong trabol ya, no maet man i stap long wan ples, nao hem i sek se trabol i kasem hem we hem i no tingbaot nating. (Ol Proveb 19:3; Prija 9:11) Sam narafala oli talem se God nao i mekem se ol disasta oli kamaot. Be Baebol i talem se “i no gat samting nogud we i save kam traem God. Mo i no fasin blong God blong traem man.” (Jemes 1:13, Nyutesteman wetem Ol Sam long Bislama) Plante jos oli tijim ol man se God i bonem ol rabis man long helfaea blong panisim olgeta. Be tijing ya i spolem God, from we hem i lavem ol man. (Jeremaea 19:5; 1 Jon 4:8) Rom 6:23 i talem se: “Ol man we oli stap mekem sin, pei blong olgeta, bambae oli ded from.” !Vas ya i no talem se bambae oli bon long helfaea blong olwe! b

‘Mifala i wantem we yu yu kam King blong olgeta man.’ Jisas i stap tokbaot gavman blong God. God i jusum Jisas blong i rul olsem king long gavman ya. I no longtaem bambae Jisas i rul long olgeta ples long wol. Daniel 7:14 i talem se God ‘i putumap Jisas i king, i leftemap nem blong hem i hae we i hae,  mo i givim bigfala paoa long hem.’ Gavman blong God bambae i “kam” taem i stretem trabol blong ol man, i flatemgud paoa blong ol king we oli agensem hem, mo i rul long olgeta ples long wol.—Daniel 2:44.

‘Mifala i wantem we olgeta man long wol oli mekem ol samting we yu yu wantem, olsem we olgeta long heven oli stap mekem.’ Aninit long rul blong gavman ya, ol man bambae oli mekem samting we God i wantem. Bambae i gat pis mo olgeta man bambae oli wosipim God long fasin we hem i wantem. Bambae i no moa gat politik mo ol giaman skul we i stap seraotem ol man. Revelesen 21:3, 4 i talem se ‘God i mekem ples blong hem wetem ol man. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’

“Plis yu givim kakae long mifala, i naf blong tede.” Jisas i tokbaot nem blong God mo gavman blong hem fastaem. Biaen, hem i tokbaot ol samting we yumi nidim blong stap laef. Tok blong hem i soemaot se yumi mas traehad from ol samting we yumi nidim “tede” nomo. Yumi mas folem advaes we i stap long Ol Proveb 30:8, we i talem se: ‘Plis mi wantem blong yu mekem we mi no save kam puaman, mo mi no save kam rijman tu. Mi wantem blong yu givim kakae long mi we i stret nomo long mi.’

“Yu fogivim mifala from ol sin blong mifala, olsem we mifala i fogivim ol man we oli stap mekem i nogud long mifala.” Yumi evriwan i mas obei long God. Taswe, taem yumi no obei long hem, no yumi mekem sin agens long hem, i olsem se yumi gat wan kaon long hem. Be taem yumi fogivim olgeta we oli mekem sin agensem yumi, Jehova tu i rere blong fogetem kaon blong yumi.—Matiu 18:21-35.

“Yu no letem ol samting oli kam traem mifala tumas, mo yu blokem Setan i no kam spolem mifala.” Setan i ‘man blong traem man.’ (Matiu 4:3) From we yumi sinman mo yumi no gat paoa, yumi nidim we God i givhan long yumi blong blokem Setan mo ol man blong hem.—Mak 14:38.

I gud prea ya blong Jisas i givhan long yu, blong yu mekem ol prea blong yu oli kam gud moa. Maet naoia yu luksave ol samting we oli impoten long tingting blong God. Be prea ya i givhan long yumi tu blong yumi kasem save long bigfala tingting blong Baebol. Ol tok blong Jisas i soemaot se bigfala tingting ya, hemia se nem blong God bambae i kam tabu, rabis fasin bambae i finis, mo gavman blong God bambae i rul mo i putum pis long wol. !Yes, prea ya we Jisas i tijim ol man long hem, i fulap gud long ol gudgudfala tijing!

[Ol futnot]

YU YU BIN TINGBAOT?

● ?Wanem mining blong tok blong Jisas se: “Bambae yufala i prea olsem”?—Matiu 6:9.

● ?Long ol prea blong yumi, yumi mas tokbaot wanem samting fastaem?—Matiu 6:9, 10.

● ?From wanem yumi mas fogivim ol man we oli mekem i nogud long yumi?—Matiu 6:12.

[Tok blong pija long pej 13]

Long prea blong Jisas, yumi luksave ol samting we oli impoten tumas long tingting blong God, i no ol samting we oli impoten long yumi nomo