Baebol i Talem Wanem

?Dedman i Save Givhan Long Man We i Laef?

LONGTAEM finis i kam, plante man oli bilif se dedman i save givhan long man we i laef. Wan man Gris bifo, nem blong hem Homer, i soemaot bilif ya long wan stori we hem i raetem. Long stori ya, strong man ya Odysseus we narafala nem blong hem Ulysses, i wantem save se bambae hem i mekem olsem wanem blong gobak long aelan blong hem, Ithaca. Ale hem i traem toktok wetem wan kleva we i ded finis.

Ol man we oli wantem faenem ansa blong ol had kwestin, oli traem plante rod olsem: oli go luk kleva, oli go long beregraon blong toktok long ol olfala bubu blong olgeta, mo oli mekem sam kastom we oli joen wetem spirit blong dedman. ?Olsem wanem? ?Ol dedman oli save givim ol save we i haed?

Plante Man Oli Mekem Fasin Ya

Plante skul oli tijim se yumi save toktok wetem ol dedman. Wan buk (Encyclopedia of Religion) i talem se: “Fasin blong mekem majik blong toktok wetem spirit blong dedman, hem i sem mak long wok blong kleva.” Buk ya i talem tu se “plante man” oli mekem fasin ya. Wan narafala buk (New Catholic Encyclopedia) i soemaot samting ya tu, i talem se: “Plante man long evri ples long wol oli mekem olkaen majik blong toktok wetem dedman.” Yumi no sapraes se samfala we oli strong long skul blong olgeta, oli traem toktok wetem ol spirit blong faenemaot sam save.

Buk ya (New Catholic Encyclopedia) i talem se, nating we “Jos i agensem fasin ya blong toktok wetem dedman, be ol man oli mekem fasin ya plante long ol yia 500 go kasem 1600.” ?Olsem wanem? ?Baebol i agri long fasin ya?

?I Stret Blong Traem Toktok Wetem Dedman?

Long taem bifo, Jehova God i talem long ol man blong hem se: ‘Yufala i mas lukaot gud blong yufala i no folem fasin blong singaot long ol devel blong dedman blong oli givhan long yufala.’ (Dutronome 18:9-13) ?From wanem Jehova i talem olsem? Yu traem tingbaot: God i lavem yumi. Taswe, sipos yumi save toktok wetem ol dedman, God i no save blokem yumi. Be blong talem stret, yumi no save toktok wetem dedman. ?From wanem?

I gat plante vas long Baebol we oli talem se dedman i no save wan samting. Prija 9:5 i talem se: “Ol man we oli laef yet oli save se bambae oli ded, be ol man we oli ded finis oli no moa save wan samting.” Ol Sam 146:3, 4 i talem se: “Yufala i no mas trastem ol lida blong wol ya. Olgeta oli no save sevem yufala. Taem oli ded, oli stap gobak long graon nomo, nao ol plan blong olgeta oli no save kamtru.” Ol Sam 88:10 i soemaot tu se ol dedman ‘oli no save luk’ wan samting.

Be samfala oli bilif strong se oli bin toktok wetem ol famle blong olgeta we oli ded. Plante man oli talem samting ya, taswe i klia se oli bin toktok wetem wan spirit we i stap samples. Be ol vas we yumi tokbaot finis oli soemaot klia se oli no bin toktok wetem dedman. Sipos i olsem, ?oli bin toktok wetem hu?

?Oli Toktok Wetem Hu?

Baebol i talem se, afta we God i mekem ol enjel, sam long olgeta oli no moa obei long hem, nao oli kam ol rabis enjel. (Jenesis 6:1-5; Jud 6)  Oli traehad blong mekem ol man oli bilif long giaman tingting ya se spirit blong dedman i laef yet samples. Blong giaman long ol man, oli toktok long olgeta, nao ol man oli ting se voes we oli harem, hemia voes blong famle blong olgeta we i ded.

Baebol i tokbaot Sol we i king blong Isrel bifo. Sol i no moa obei long Jehova, nao Jehova i lego hem. Hem i go luk wan kleva, blong i traem toktok long profet Samuel we i ded finis. Wan spirit i toktok long Sol, be i no Samuel we i toktok. Taem Samuel i laef yet, hem i no moa wantem luk Sol, mo hem i agensem ol kleva tu. Toktok we Sol i harem i kamaot long wan rabis enjel we i giaman se hem i Samuel.—1 Samuel 28:3-20.

Ol rabis enjel oli agensem Jehova. Yumi save kasem bigfala trabol sipos yumi traem toktok wetem olgeta. From samting ya, Baebol i talem se: “Sipos yufala i wantem faenemaot sam samting, bambae yufala i no mas go luk ol man we oli stap toktok wetem ol devel blong dedman mo ol narafala devel. Sipos yufala i mekem fasin ya, bambae yufala i kam doti long fes blong mi.” (Levitikas 19:31) Mo Dutronome 18:11, 12 i givim woning se “man we i wantem toktok wetem ol dedman,” long tingting blong Jehova hem i “rabis nomo.” Wan risen from wanem Jehova i kilim King Sol i ded, hemia from we hem “i go luk wan kleva blong faenemaot rod long ol devel blong ol dedman.”—1 Kronikel 10:13, 14.

Plante taem, ating yu harem se yu nidim wan man we i hae moa long yu blong i lidim yu. Maet yu wantem faenem ansa long wan had kwestin. Maet yu mas mekem wan strong desisen. Long taem olsem, ?yu mas toktok long hu? Baebol i talem se Jehova God i stap ‘tijim yumi.’ Sipos yu mo famle blong yu i stadi Baebol mo yufala i folem wanem we Baebol i talem, i olsem we “yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’” (Aesea 30:20, 21) Ol Kristin oli no harem prapa voes blong tru God, be Baebol we i kamaot long God, i save lidim olgeta. I olsem we Jehova hem wan i stap talem se: ‘Mi mi wantem lidim yu.’

?YU YU BIN TINGBAOT?

● ?Wanem tingting blong God long man we i traem toktok wetem dedman?—Dutronome 18:9-13.

● ?Dedman i save toktok long man we i laef? ?From wanem yu talem olsem?—Prija 9:5.

● ?Yumi mas trastem hu blong lidim yumi?—Aesea 30:20, 21.