Ol Yangfala Oli Askem

?Olsem Wanem?—?Yumitu Gud Fren Nomo? Haf 1

TAEM YU RIDIM KWESTIN ANTAP, ?YU TINGBAOT WAN BOE NO GEL NOMO?

YES NO

↓ ↓

YU MAS RIDIM OL SAVE YA I GUD YU TU YU RIDIM

NAOIA NOMO. MAET YU NO OL SAVE YA, BLONG YU GAT

LUKSAVE SE YU YU NIDIM TUMAS. STRET TINGTING TAEM YU

JOEN WETEM OL BOE, OLSEM

NAO YU NO KASEM TRABOL

Makem se i tru no i giaman:

Ol boe mo ol gel oli no mas joen wanples gogo kasem taem we oli wantem mared.

․․․․․ TRU ․․․․․ GIAMAN

Yu traem tingbaot: Jisas i gat ol fren we oli woman, be hem i no gat tingting blong mared. (Matiu 12:46-50; Luk 8:1-3) Yangfala Timoti tu i gat ol fren we oli woman. Taswe, aposol Pol i talem long hem se hem i mas ‘toktok long yang woman olsem we hem i stret sista blong hem, mo we fasin blong hem i klin gud.’—1 Timoti 5:1, 2.

Pol i save se Timoti i stap mitim plante yangfala woman taem hem i go long ol defdefren kongregesen. (Mak 10:29, 30) ?Olsem wanem? ?I rong blong Timoti i joen wanples wetem olgeta? Nogat. Be from we hem i no wantem mared yet, hem i mas lukaot gud se hem i no stat blong laekem olgeta. Mo hem i no mas tok swit no mekem narafala samting blong pulum filing blong olgeta.—Luk 6:31.

?Olsem wanem long yu? ?Yu yu rere blong mared?

Sipos YES ⇨ Taem yu joen wanples wetem ol boe mo gel, hemia i save givhan long yu blong yu faenem wan fren we yu save mared long hem.—Ol Proveb 18:22; 31:10.

Sipos NO ⇨ Taem yu joen wanples wetem ol boe mo gel, yu no mas bitim mak. (Jeremaea 17:9) I isi blong talem olsem, be i had blong mekem. Nia a we i gat 18 yia blong hem, i talem se: “Taem yu stap olsem gud fren blong wan boe, i had blong save wetaem yu bitim mak.”

?From wanem yu mas lukaot gud blong yu no bitim mak? From we, sipos yu bitim mak, yu save spolem yu wan no yu save spolem narafala. Yu traem tingbaot from wanem samting ya i tru.

 LAEF I OLSEM NAO: Boe no gel we i no rere blong mared i save spolem hem wan, sipos hem i stat blong lavem narafala be narafala i no lavem hem. Kelli we i gat 19 yia blong hem, i talem se: “Tu taem samting ya i hapen long mi. Wan taem wan boe i laekem mi be mi mi no laekem hem, ale hem nao i harem nogud. Narafala taem, mi mi laekem wan boe be hem i no laekem mi, ale mi nao mi harem nogud. Mo kam kasem naoia, mi harem nogud yet.”

Yu traem tingbaot:

● ?Wetaem mo weples i stret blong ol boe mo gel oli joen wanples? ?Wetaem mo weples i no stret?

● ?From wanem i no waes we wan boe i joen wanples oltaem wetem sem gel? ?Wan long tufala i save gat wanem tingting? ?Sipos yu, bambae yu yu gat wanem tingting?

Denise i talem se: “Samtaem mi giaman long mi wan bakegen se, ‘Mitufala i gud fren nomo. Hem i olsem brata blong mi.’ Be taem mi luk we hem i storian wetem wan narafala gel, mi harem nogud. Mi mi wantem se hem i spenem taem wetem mi nomo.”

Baebol i talem se: “Man we i gat gudfala tingting i save luksave we trabol i stap kam, nao i save ronwe long hem, be man we i no save tingting gud, hem i save letem trabol i kam, i kasem hem, we biaen i sore from.”—Ol Proveb 22:3.

 LAEF I OLSEM NAO: Boe no gel we i no rere blong mared i save lusum wan gudfala fren, sipos hem i stat blong lavem fren ya be fren ya i no lavem hem. Kati we i gat 16 yia blong hem, i talem se: “Wan boe i stap sanem teks mesej long mi mo mi mi sanem i gobak. Be i no longtaem, hem i stat tok swit long mi, mo mitufala i sanem mesej i gokam klosap evri dei. Wan dei hem i talem long mi se hem i laekem mi mo i wantem frenem mi. Be mi mi no wantem frenem hem. Taem mi talem samting ya long hem, hem i no moa toktok long mi, mo mitufala i no moa gud fren.”

Yu traem tingbaot:

● ?Hu i harem nogud, Kati no boe ya? ?From wanem samting ya i hapen? ?Kati i save mekem wanem blong i no gat trabol olsem?

● Taem tufala i stap sanem teks mesej long tufala, maet wan i givim tingting long narawan se hem i laekem hem. ?Hem i givim tingting ya olsem wanem?

Laura i talem se: “Samtaem mi mas blokem mi wan. Ol boe oli gudfala fren. Be mi no wantem lusum wan fren from we mi go bitim mak.”

Baebol i talem se: “Man we i gat hed, hem i stap lukluk gud long rod we bambae i folem.”—Ol Proveb 14:15.

Stamba poen: I no rong blong ol boe mo gel oli joen wanples. Be sipos yu yu no rere blong mared, yu mas lukaot gud blong yu no bitim mak.

LONG NEKIS HAF “OL YANGAFALA OLI ASKEM” . . .

Sipos yu stat blong laekem wan boe no gel be yu no rere blong mared, yu save spolem gudnem blong yu. Bambae yu faenemaot olsem wanem samting ya i save hapen.

[Futnot]

[Bokis/Foto blong pija long pej 30]

?BAMBAE YU YU MEKEM WANEM?

TRU STORI: “Mi sanem teks mesej long wan fren blong mi we i stap bitim 1,500 kilometa longwe. Mitufala i sanem mesej long mitufala, maet wan taem long wan wik. Mi mi no gat tingting blong frenem hem, mo mi ting se hem tu i no gat tingting blong frenem mi. Be wan dei hem i sanem wan mesej we i talem se: ‘!Ei daling! ?Olsem wanem long yu? Mi wantem luk fes blong yu.’ !Mi mi sek nogud! Mi talem long hem se mi mi no wantem frenem hem, mi tingbaot hem olsem wan gud fren nomo. Hem i sanem mesej i kambak se, ‘I stret.’ Neva hem i sanem mesej long mi bakegen.”—Janette.

● Sipos yu yu no rere blong mared no yu no wantem mared yet, ?bambae yu mekem wanem sipos yu kasem wan teks mesej olsem Janette?

● Sipos yu yu wan boe, ?yu ting se i stret blong sanem ol mesej olsem? ?From wanem yu talem olsem?

● Taem boe mo gel tufala i stap sanem teks mesej long tufala, ?yu ting se i isi moa blong tufala i talem ol swit tok, i bitim we tufala i toktok stret long tufala? ?From wanem yu talem olsem?

[Bokis blong pija long pej 31]

I GUD YU ASKEM LONG PAPA MO MAMA BLONG YU

Yu traem askem long papa mama blong yu blong talem tingting blong tufala long ol kwestin we oli gat blak mak i stap klosap long olgeta. ?Olsem wanem? ?Tingting blong tufala i defren long tingting blong yu? Sipos yes, ?i defren olsem wanem? ?Yu ting se i moagud yu folem tingting blong tufala? ?From wanem?—Ol Proveb 11:14.

[Bokis blong pija long pej 31]

SAMTING WE OL NARAFALA YANGFALA OLI TALEM

Joshua—Sipos yu spenem plante taem wetem sem gel nomo, i isi blong laekem hem.

Natasha—Maet yu tingbaot wan boe se hem i gud fren blong yu nomo. Be sipos yu joen oltaem wetem hem, bambae yu stat blong laekem hem, no yutufala tugeta i stat blong laeklaekem yutufala.

Kelsey—Fastaem maet yu tingbaot wan boe olsem gud fren blong yu nomo. Be sipos yutufala i joen wanples oltaem, filing blong yu i save jenis isi nomo. Sipos boe mo gel tufala i wantem stap olsem gud fren nomo, tufala i mas bigman long tingting blong tufala mo tufala i mas naf blong luksave denja.

[Tok blong pija long pej 30]

Sipos yu stat blong laekem wan gel bifo we yu rere blong mared, yu save kasem bigfala trabol