MAET yu harem nogud long sam samting we ol skul oli mekem, no maet yu ting se skul i no impoten. I no yu nomo we i tingting olsem. Naoia plante moa man oli no moa joen long ol skul.

Samfala oli lego ol skul from we oli luk se ol man blong skul oli gat tu fes, mo oli luk se ol man blong wan skul oli no laekem ol man blong narafala skul. Sam narafala oli ting se taem yu folem wan skul, i gat tumas samting we yu mas mekem mo yu no mas mekem. Sam narafala bakegen oli ting se, i no nid blong oli go long wan skul blong mekem wosip long God. ?Olsem wanem? ?Baebol i talem se yumi mas joen long wan skul blong wosipim God?

Baebol i talem klia olsem wanem ol olfala olsem Ebraham, Aesak, mo Jekob, oli mekem wosip long God. Wan taem, God i talem se: “Mi mi jusumaot [Ebraham] blong i save tok strong long ol pikinini blong hem, mo long olgeta we bambae oli kamaot biaen long hem, blong oli obei long mi, mo blong oli mekem ol fasin nomo we oli stret mo oli gud.” (Jenesis 18:19) Baebol i talem se Ebraham i wan fren blong God, i min se, hem i prea long God mo i kam klosap long hem. Be hem i mekem wosip wetem famle blong hem tu. Sam narafala man long taem bifo we oli fren blong God, olgeta tu oli joen olsem wan grup blong mekem wosip. Maet oli joen wetem ol famle blong olgeta mo ol man blong wok blong olgeta.

Biaen, God i talem long ol man Isrel mo long ol Kristin se oli mas kam wanples blong mekem wosip. (Levitikas 23:2, 4; Hibrus 10:24, 25) Long taem ya, oli singsing, oli ridimaot Tok blong God, mo oli prea. (Nehemaea 8:1-8; Kolosi 3:16) Baebol i talem tu se sam man we fasin blong olgeta i laenap wetem Baebol, oli mas lidim ol man blong God blong mekem wosip.—1 Timoti 3:1-10.

Taem yumi tingbaot ol eksampol ya blong Baebol, yumi luksave se long taem blong yumi tu, God i wantem we yumi joen olsem wan grup blong wosipim hem. Sipos yumi mekem olsem, yumi kasem plante gudfala samting from.

Baebol i talem se taem man i mekem wosip long tru God, i olsem we hem i stap wokbaot long rod we i smol nomo, no hem i stap long wan resis. (Matiu 7:14; 1 Korin 9:24-27) Taem man i resis long wan rod we i longfala mo i had, hem i save kam taed mo i foldaon long haf rod. Be sipos i gat sam man oli stap we oli leftemap tingting blong hem mo oli pulum hem blong i gohed, hem i save kasem paoa we i naf blong i finisim resis ya. Hemia i sem mak long wan man we i wantem wosipim God long fasin we i stret. Nating se hem i kasem plante trabol, be sipos ol narafala man blong mekem wosip oli leftemap tingting blong hem, hem i save gohed blong fren gud wetem God.

Hemia nao mining blong Hibrus 10:24, 25 we i talem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting  blong jos.” Yes, Baebol i talem se ol man blong tru God bambae oli mekem wosip long hem olsem ol brata mo sista nomo, we oli joen gud long wan kampani.

Baebol i talem se kampani ya i joen gud from we ol man blong hem oli lavlavem olgeta mo oli gat pis. Efesas 4:2, 3 i talem long ol man we oli mekem wosip long tru God se: “Oltaem, long olgeta samting, tingting blong yufala i mas stap daon, mo yufala i mas kwaet man. Tingting blong yufala i mas longfala, mo yufala i mas lavlavem yufala, blong yufala i no raorao long yufala. Tabu Spirit, hem i stap mekem yumi evriwan i joen gud, mo hem i givim pis long yumi. Nao from samting ya, yumi mas traehad blong holem pis ya, blong yumi save joen gud oltaem.” ?Olsem wanem? ?Yu save folem advaes ya sipos yu mekem wosip yu wan nomo? Nogat, yu mas joen wetem ol narafala man.

God i no wantem we ol man blong hem oli stap wanwan olbaot, nogat. Hem i wantem we oli kam wan kampani, we bilif blong olgeta i pulum olgeta blong oli joen gud. Baebol i talem se tingting blong ol man blong God i mas kam wan nomo, oli no mas seseraot, mo oli mas ‘joen gud we oli gat wan tingting nomo, mo we fasin blong olgeta i wan nomo.’ (1 Korin 1:10) Ol tok long vas ya bambae i blong nating nomo sipos God i wantem we ol man blong hem oli stap wanwan olbaot, nao oli mekem wosip long hem.

Yes, Baebol i soemaot klia se God i wantem we ol man blong hem oli joen long wan kampani blong mekem wosip long hem. Sipos yu joen long skul we i mekem samting we Baebol i talem mo we God i glad long hem, skul ya bambae i givhan long yu blong yu kasem ol samting we yu nidim blong kam fren blong hem.—Matiu 5:3.

I tru se plante skul long taem blong yumi oli gat tu fes mo oli mekem plante nogud fasin. Be hemia i no min se yu mas sakemaot olgeta skul evriwan. I mas gat wan skul long wol we i lavem ol man, mo we hem i tijim ol narafala long ol gudfala fasin we God i glad long olgeta. Skul ya i save givhan long yu blong yu gat bilif we i stret. Baebol i talem ol tok we i save givhan long yu blong yu luksave skul we God i glad long hem.