“I nogud yufala i laekem mane tumas . . . God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’”—Hibrus 13:5.

?GOD I MEKEM WANEM BLONG SOEMAOT SE HEM I KEA?

Taem wan man blong Jehova God i kasem trabol, bambae hem i luk plante samting we oli soemaot se God i kea long hem. Wan long ol samting ya, hemia taem ol narafala Kristin oli lavem hem mo oli givhan long hem. a Jemes 1:27 i talem se: “God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta.”

Ol fas Kristin oli stap givgivhan long olgeta taem oli gat nid. Wan taem, kakae i sot bigwan long Judia, ale ol Kristin we oli stap long Antiok, oli gat strong tingting blong ‘sanem sam mane blong givhan long ol brata blong olgeta we oli stap long Judia.’ (Ol Wok 11:28-30) Samting ya i mekem se ol Kristin brata ya oli kasem ol samting we oli nidim. Fasin blong ol Kristin long Antiok i soemaot se oli rili lavem ol brata blong olgeta, mo oli mekem samting blong soemaot lav ya.—1 Jon 3:18.

“Mi mi Hae God, mi God blong yufala. Mi nao mi stap tijim yufala blong givhan long yufala.”—Aesea 48:17, 18.

GOD I GIVHAN LONG YU BLONG YU MEKEM LAEF BLONG YU I KAM GUD MOA.

Plante milian man oli faenemaot se waes blong God we i stap long Baebol i givhan long olgeta, mo waes ya i gud moa i bitim ol narafala samting. Ol Proveb 2:6, 7 i talem se: “Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo. Hem i stap givhan long ol stret man.” Taem ol man oli lukaotem waes ya mo oli yusum, olgeta nomo oli mekem samting blong laef blong olgeta i kam moa gud.

Maet oli no moa westem mane blong olgeta long ol samting we i save spolem bodi blong olgeta, olsem ol drag, mo ol strong dring. (2 Korin 7:1) Mo tu, oli no moa giaman, oli no moa stil, mo oli traehad blong mekem gud wok blong olgeta. Long rod ya, oli save faenem wok isi nomo, mo bos blong olgeta i trastem olgeta moa. Efesas 4:28 i talem se: “Man we i man blong stil, hem i mas lego fasin ya. Hem i mas wok had . . . blong i save gat plante samting blong givhan long hem, nao bambae i save givhan long ol puaman tu.”

“Ol gudfala wok blong ol man we oli stap folem waes blong God, oli stap soemaot we waes ya i tru.”—Matiu 11:19.

GUDFALA FRUT WE I KAMAOT LONG LAEF BLONG OLGETA.

Wilson i stap long Gana. Hem i wok blong smoltaem long wan kampani, mo hemia las dei blong hem blong wok. Hem i stap wasem trak blong maneja blong kampani ya, ale i faenem mane we i stap long biaen blong trak. Supavaesa i talem long Wilson blong i kipim mane ya nomo. Be Wilson i wan Witnes blong Jehova, mo hem i no wantem stil, ale hem i karem mane ya i go long maneja. Maneja ya i glad mo i tekem Wilson i wok fultaem long kampani ya, mo sam yia biaen, hem i kam wan long ol bos blong kampani ya.

Long Yurop, Geraldine i lusum wok blong hem from we bos blong hem i no laekem ol Witnes blong Jehova. Be mama blong bos ya i talem long hem se hem i mekem wan bigfala mastik. Hem i talem se: “Sipos yu wantem wan man blong wok we yu save trastem hem mo we i save mekem gud wok blong hem, ol Witnes blong Jehova nao oli gud moa long saed ya, i bitim ol narafala.” Bos ya i traem blong faenemaot moa save long saed blong ol Witnes, biaen, hem i tekembak Geraldine.

Sarah i wan mama long Saot Afrika we i no gat man blong hem. Hem i kasem sam hadtaem, be ol brata mo sista long kongregesen blong hem, oli givim kakae long hem mo ol pikinini blong hem, mo oli karem olgeta long trak blong go long ol miting. Ol brata mo sista ya oli givhan olsem from we oli lavem Sarah. Sam taem biaen, ol pikinini blong hem oli talem se: “Mifala i gat plante papa mo mama long kongregesen.”

I gat plante narafala stori olsem. Hemia i mekem yumi tingbaot toktok blong Ol Proveb 1:33, we i talem se: “Man we i stap lesin long [Hae God], bambae hem i stap gud oltaem long laef blong hem.” !Toktok ya i tru we i tru!