“Snek ya blong bifo we nem blong hem Setan, . . . i stap giaman long olgeta man long wol, i lidim olgeta oli go krangke.” —Revelesen 12:9.

?OL MAN OLI TALEM WANEM?

Sam man oli bilif se Devel Setan, hem i no rili stap, be hem i wan rabis fasin blong man nomo.

?BAEBOL I TALEM WANEM?

Setan i rili stap, hem i wan stronghed enjel we i agensem God. Baebol i talem se hem “i stap rulum wol ya.” (Jon 12:31) Hem i stap mekem ol “giaman saen” mo “evrikaen trik” blong mekem samting we hem i wantem i kamtru.—2 Tesalonaeka 2:9, 10.

Baebol i tokbaot wan taem long heven we Setan mo God tufala i stap storian. Yu traem tingbaot. God i stret gud olgeta mo ol fasin blong hem oli klingud, hem i no gat wan rabis fasin nating long hem. Sipos i olsem ?yu ting se God i save storian wetem hem wan bakegen? !Nogat! Hemia i no save hapen. (Dutronome 32:4; Job 2:1-6) Taswe, i klia se Setan i rili stap. Hem i no wan rabis fasin nomo.

?FROM WANEM SAVE YA I IMPOTEN?

From we Setan i wantem we yumi bilif se hem i no rili stap. Hem i sem mak long wan man blong brekem loa, we i stap haedem hem wan blong ol man oli no luksave hem, olsem nao hem i save gohed blong brekem loa. Setan tu i wantem we ol man oli bilif se hem i no stap, olsem nao hem i save pulum olgeta blong oli gohed blong mekem ol samting we i no stret. Taswe, sipos yumi wantem agensem Setan, fastaem yumi mas kasem save se hem i rili stap.

‘Sore tumas long yu, graon, from we Setan i kamdaon finis long yufala.’—Revelesen 12:12.

?OL MAN OLI TALEM WANEM?

Plante man oli bilif se Setan i stap long helfaea, aninit olgeta long graon ya. Sam narafala oli ting se hem i wan rabis fasin blong man nomo.

?BAEBOL I TALEM WANEM?

Setan i wan rabis enjel we yumi no save luk hem. Taswe hem i stap laef long ples blong ol spirit. Be God, hem i stap long heven wetem ol gudfala enjel blong hem. Bifo, Setan i go long heven mo i kamdaon long wol, olsem we hem i wantem, be God i no blokem hem (Job 1:6) Be naoia, Jisas i sakemaot hem mo ol rabis enjel blong hem finis, oli aot long heven oli kamdaon long wol.—Revelesen 12:12.

?Hemia i min se taem Setan i kamdaon long wol, hem i stap long wan ples nomo? Ating yu ridim long Baebol se olfala taon blong Pegamam, hemia nao ples we “Setan i stap long hem.” (Revelesen 2:13) Baebol i talem olsem blong soemaot se ples ya hem i stamba ples we ol man oli mekem wosip long Setan. Be i no gat wan ples long wol ya we i olsem prapa ples blong Setan. Defren olgeta, Baebol i talem se “olgeta kantri long wol ya,” oli blong Setan.—Luk 4:5, 6.

“Olgeta man blong wol ya oli stap long paoa blong Setan.”—1 Jon 5:19.

?BAEBOL I TALEM WANEM?

Plante man oli letem Setan i lidim olgeta, mo i pulum olgeta oli kam aninit long paoa blong hem. (2 Korin 11:14) Samting ya i givhan long yumi blong kasem save from wanem ol man oli no naf blong mekem laef blong wol ya i kam gud moa.

Baebol i tokbaot plante stori we oli soemaot se, Setan wetem ol rabis enjel blong hem, oli stap mekem plante man oli kam krangke, nao oli stap spolem bodi blong olgeta.—Matiu 12:22; 17:15-18; Mak 5:2-5.

?YU SAVE MEKEM WANEM?

I tru se Setan i gat paoa, be yu no mas fraet long hem. Sipos yu no wantem we Setan i pulum yu mo i lidim yu, yu mas save gud ol rod we hem i stap yusum blong pulum ol man oli kam aninit long paoa blong hem. Olsem nao, bambae hem i no save ‘winim yu.’ (2 Korin 2:11) Sipos yu ridim Baebol, bambae yu naf blong luksave ol trik blong Setan, mo bambae yu naf blong blokem ol trik blong hem.

Yumi mas sakemaot eni samting we oli joen wetem wok blong ol rabis spirit. (Ol Wok 19:19) Hemia ol samting olsem, ol jen no ston we ol man oli holem blong i givim gudlak long olgeta, ol buk, ol magasin, ol muvi, ol pija, ol miusik, mo ol video gem we oli leftemap ol wok blong ol rabis spirit. Oli mekem olsem se ol samting ya oli gud nomo.

Baebol i talem se “yufala i mas blokem Setan, nao hem bambae i ronwe long yufala.” (Jemes 4:7) Sipos yu obei long ol tok blong Baebol, bambae yu naf blong blokem ol giaman trik blong Setan.—Efesas 6:11-18.