?I tabu blong tekem strong dring?

Man i save dring “waen blong mekem hem i glad, mo i save tekem olifoel blong mekem fes blong hem i saen, mo i save tekem kakae blong mekem hem i strong.”—Ol Sam 104:15.

?OL MAN OLI TALEM WANEM?

Long plante famle, oli dring waen no bia oltaem wetem kakae blong olgeta. Long sam narafala famle, i tabu blong tekem strong dring. ?From wanem i gat defdefren tingting olsem? Plante samting i gat paoa long tingting blong ol man, maet ples we oli gruap long hem, no helt, no skul blong olgeta.

?BAEBOL I TALEM WANEM?

Baebol i agensem man we i dring tumas mo fasin drong, be i talem se i oraet nomo we man i tekem smol dring. (1 Korin 6:9, 10) Long taem bifo, ol man blong God oli dring waen. Baebol i tokbaot waen bitim tu handred taem. (Jenesis 27:25) Prija 9:7 i talem se: “I gud yu glad blong kakae bred blong yu, mo i gud hat blong yu i harem gud blong dring waen blong yu.” Yes, waen i mekem man i glad, taswe ol man oli dring waen long ol lafet, olsem ol lafet blong mared. Long wan lafet olsem nao, Jisas i mekem fas merikel blong hem blong jenisim wota i kam “bes waen.” (Jon 2:1-11) Mo tu, ol man bifo oli yusum waen olsem meresin.—Luk 10:34; 1 Timoti 5:23.

 ?Baebol i talem stret, hamas dring we yumi save tekem?

“Yufala ya we long taem blong dring waen, yufala i jampion blong hem, . . . sore tumas long yufala.”—Aesea 5:22.

?FROM WANEM SAVE YA I IMPOTEN?

Plante famle oli harem nogud from we mama no papa, no tufala tugeta, i dring bitim mak. Plante man we oli dring tumas oli foldaon, oli kasem kil, no oli aksiden long trak. Mo sipos man i gohed nomo blong dring, hem i save spolem bren, mo hat, mo leva, mo bel blong hem.

?BAEBOL I TALEM WANEM?

Baebol i talem se man i no mas dring tumas, mo i no mas kakae bitim mak. (Ol Proveb 23:20; 1 Timoti 3:2, 3, 8) Sipos man i wantem mekem God i glad, hem i mas blokem samting we hem nomo i wantem. Baebol i talem se: “Sipos yu dring tumas waen, hemia bambae i mekem yu yu mekem tumas noes, mo i mekem yu yu krangke. Fasin ya we man i dring gogo i drong, hem i wan krangke fasin.”—Ol Proveb 20:1.

Taem man i dring tumas, tingting blong hem i no moa strong blong mekem samting we i stret, ale hem i save mekem krangke fasin. Hosea 4:11 i talem se: “Ol waen ya we yufala i stap dring, nating we i olfala, no i niuwan yet, be i stap mekem hed blong yufala i krangke nomo.” Wan man, nem blong hem John, i luksave samting ya. * Hem i rao wetem woman blong hem. Afta, hem i go long wan ba, i dring bitim mak, mo i slip wetem wan narafala woman. Biaen, hem i harem nogud tumas long krangke fasin ya we hem i mekem, mo i promes se bambae i neva mekem bakegen. Yes, sipos yumi dring bitim mak, yumi save spolem bodi blong yumi, yumi save mekem rabis fasin, mo yumi no moa fren wetem God. Baebol i talem se ol man we oli stap dring gogo oli lusum hed, bambae oli no kasem laef blong olwe.—1 Korin 6:9, 10.

?Wetaem i no stret blong dring?

“Man we i gat gudfala tingting i save luksave we trabol i stap kam, nao i save ronwe long hem, be man we i no save tingting gud, hem i save letem trabol i kam, i kasem hem, we biaen i sore from.” —Ol Proveb 22:3.

?FROM WANEM SAVE YA I IMPOTEN?

Wan buk (World Book Encyclopedia) i talem se: “Strong dring i olsem wan drag we i gat bigfala paoa.” Taswe maet i gat sam taem we i no stret nating blong dring.

?BAEBOL I TALEM WANEM?

‘Trabol i save kasem man’ sipos hem i dring long wan taem we i no stret. Baebol i talem se: ‘I gat wan stret taem blong evri samting.’ (Prija 3:1) Hemia i min se i gat sam taem we yumi no mas dring. Maet wan yangfala i no gat naf yia yet blong dring, folem loa blong kantri. Maet wan man i alkolik, nao i stap traehad blong winim fasin ya. Maet wan man i no save tekem strong dring from we hem i stap dring meresin. Plante man we oli wok long ol bigfala masin, oli save kasem bigfala trabol sipos oli dring. Taswe i gat wan ‘stret taem’ we oli no mas dring, hemia bifo we oli go long wok mo taem oli stap wok. Ol man we oli waes, oli tingbaot laef mo bodi blong olgeta olsem wan gudfala presen we God i givim. (Ol Sam 36:9) Yumi gat respek long presen ya taem yumi folem ol advaes we Baebol i givim long strong dring.