Bifo we yu mo man blong yu * yutufala i mared, yu luk se yutufala i gat sem tingting long plante samting. Be naoia, yu no moa glad long mared blong yu, mo filing ya i kam olsem wan stonwol we i seraotem yu mo man blong yu. Ale, yu no moa luk hem olsem gudfala fren blong yu, be olsem wan man we yu stap kalabus wetem hem.

Yu save mekem se yu wetem man blong yu, yutufala i fren gud moa. Be fastaem, yu mas tingbaot se, ?from wanem yu no moa glad long mared blong yu?

Laef i had. Taem woman i mas go long wok evri dei, i mas givim samting we pikinini blong hem i nidim, mo i mas stretem ol problem wetem palika blong hem, sloslo hem i no moa save glad long mared blong hem. Mo tu, sam narafala problem oli save kamaot. Maet tufala i no moa gat mane, no tufala i mas lukaot long wan memba blong famle we i stap siksik oltaem. Ol samting ya tu oli save mekem trabol long mared.

Yutufala i no save gat wan tingting nomo. Taem wan man i stap frenem wan woman, plante taem tufala i no wantem luksave se tufala i no gat sem tingting. Be taem tufala i mared, tufala i jes faenemaot se tufala i no gat sem tingting long sam samting. Maet tufala i no gat sem fasin blong talemaot tingting blong tufala, blong spenem mane, mo blong stretem ol problem. Maet long stat, tufala i no glad lelebet long samting ya, be naoia, samting ya i mekem tufala i kros.

Filing i lus. Maet longtaem finis i kam, man i stap sakem ol rabis tok long woman blong hem, no i mekem nogud long hem, no maet tufala i stap raorao oltaem. Ol samting ya oli save mekem se woman ya i no moa talemaot filing blong hem long man blong hem, no hem i mekem i mowas, hem i stat blong laekem wan narafala man.

Ol samting we yu tingbaot oli no kamtru. Samfala oli mared from we oli ting se oli faenem man we hem nomo i stret blong oli mared wetem. Be tingting olsem i save lidim olgeta i go long wan bigfala trabol. Taem ol trabol oli stat blong kamaot, oli luk se man ya i no stret long olgeta, ale oli ting se oli jusum rong man.

Yu tingbaot ol gudfala fasin blong hem. Yu traem rod ya: Yu raetemdaon tri gudfala fasin we man blong yu i gat. Maet yu raetemdaon biaen long wan foto blong mared blong yutufala, no yu kipim insaed long mobaelfon blong yu. Olsemia, wanwan taem yu save ridim bakegen lis ya, blong yu tingbaot risen we i mekem se yu maredem hem. Taem yu tingting gud long ol gudfala fasin blong hem, samting ya i mekem se pis i stap, mo yu fogetem ol nogud fasin blong hem.—Rul blong Baebol: Rom 14:19.

Yu mekem plan blong yutufala i spenem taem tugeta. Bifo we yutufala i mared, yutufala i mekem sam samting tugeta. Long taem ya, yutufala i jes stat blong fren mo yutufala i glad blong spenem taem tugeta. Be blong mekem olsem, yutufala i mekem plan fastaem. Taswe i gud sipos naoia tu, yutufala i mekem sem mak. Yutufala i save mekem plan se bambae yutufala i spenem taem tugeta long wan ples, olsem se yutufala i stap fren bakegen. Sipos yutufala i mekem olsem, bambae yutufala i joen gud moa, mo yutufala i save winim ol problem.—Rul blong Baebol: Ol Proveb 5:18.

Yu tokbaot filing blong yu. Sipos yu yu harem nogud from sam samting we man blong yu i talem no i mekem, i moa gud yu traem fogetem. Be yu no mas mekem fasin ya we yu no moa toktok long hem. I moagud yu talemaot filing blong yu long hem long kwaet fasin. Yu mas mekem samting ya kwiktaem, maet long sem dei nomo.—Rul blong Baebol: Efesas 4:26.

Yu mas luksave se hem i no minim blong spolem yu. I klia se yu no wantem spolem filing blong man blong yu, mo hem tu i no wantem mekem samting ya long yu. Taswe, yu mas talem long hem se yu no minim blong spolem hem, mo yu talem sore long hem. Biaen, yutufala i tokbaot sam samting we yutufala tugeta i save mekem, blong yutufala i no moa spolem yutufala. I gud yutufala i folem advaes ya blong Baebol, se: ‘Yufala i mas mekem i gud long yufala, mo yufala i mas kaen gud long yufala. Mo yufala i mas fofogivim yufala.’—Efesas 4:32.

Yu no mas ting se mared blong yu bambae i stret gud olgeta. Baebol i talem se olgeta we oli mared, bambae oli “gat trabol.” (1 Korin 7:28) Taem ol trabol ya oli kamaot, yu no mas hareap blong tingting se mared blong yu i nogud. Be yutufala i mas wok tugeta blong stretem ol trabol ya. Mo yutufala i mas gohed blong ‘givgivhan long yutufala, mo taem wan long yutufala i gat sam poen agens long narawan, yutufala i mas fogivim yutufala.’—Kolosi 3:13.