SIPOS yu luk Daena, * maet yu save talem se hem i waes, hem i fren gud wetem narafala, mo hem i glad blong joen wetem narafala. I tru, i luk olsem se Daena i glad mo i joen gud wetem ol narafala, be oltaem hem i stap harem nogud. Hem i talem se: “Evri dei mi mi wantem ded nomo. Mi stap tingbaot se sipos mi mi ded, ol narafala bambae oli harem gud moa.”

Daena i talem se bambae hem i neva kilim hem wan i ded. Be samtaem, hem i stap tingbaot se i moa gud hem i ded nomo. Hem i talem se: “Mi wantem tumas sipos mi ded long wan aksiden. Mi mi tingbaot ded olsem wan gudfala fren, be i no wan enemi.”

Plante man oli gat tingting olsem Daena. Be samfala oli gat tingting ya, no oli traem finis blong kilim olgeta i ded. Ol man blong hae save oli talem se ol man ya oli no wantem ded, be oli taed blong harem nogud nao oli ting se sipos oli ded bambae oli no moa harem nogud. Oli ting se oli gat gudfala risen blong ded, be oli no gat wan gudfala risen blong stap laef.

?From wanem mi laef? Bambae yumi tokbaot tri risen we i givhan long yumi blong stap laef.