BAEBOL I TALEM WANEM
Yumi Mas Klin
?God i wantem se yumi klin long bodi?
“Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot.” —2 Korin 7:1.
?BAEBOL I TALEM WANEM?
God i lavem yumi mo i wantem se laef blong yumi i longfala mo yumi no sik. Hem i talem se: “Oltaem yu mas tingbaot ol tok blong mi. Sipos yu mekem olsem, bambae yu no save sot long wan samting long laef blong yu, mo bambae yu gat longfala laef.” (Ol Proveb 3:1, 2) Ol loa we God i givim long ol man Isrel oli soemaot se hem i lavem olgeta. Sam long ol loa ya oli talem ol samting we oli mas mekem blong stap klin long bodi. (Dutronome 23:12-14) Taem ol man Isrel oli obei long ol loa ya, oli no kasem ol sik we ol narafala neson oli kasem, olsem Ijip we i no gat ol loa olsem.—Dutronome 7:12, 15.
Tede tu, taem man i ‘sakemaot ol samting we oli mekem bodi blong hem i doti long fes blong God,’ hem i blokem plante sik long bodi mo tingting, mo laef blong hem i longfala moa. Hemia from we hem i sakemaot ol samting olsem smok tabak, dring bitim mak, mo tekem drag. Mo tu, taem hem i folem loa blong God we i talem se i mas klin, hem i soemaot se i tingbaot ol man we oli stap raonabaot long hem.—Mak 12:30, 31.
?God i wantem we yumi klin long fasin mo tingting?
‘Yufala i mas kilimaot ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting, be fasin ya i olsem we oli stap mekem wosip long ol narafala god. Mo from ol fasin ya, God bambae i jajem ol man we oli no save obei long hem.’ —Kolosi 3:5, 6.
?BAEBOL I TALEM WANEM?
Olsem yumi tokbaot finis, Baebol i talem se yumi mas ‘sakemaot olgeta samting we oli mekem bodi mo tingting blong yumi i doti long fes blong God.’ Long taem blong Jisas Kraes, plante man wetem ol lida blong skul blong ol man Jiu tu, oli strong blong folem ol loa blong stap klin long bodi. Be oli sakemaot ol loa we oli mas folem blong stap klin long tingting mo fasin blong olgeta. (Mak 7:1-5) Jisas i gat stret tingting, i se: ‘Ol samting we man i kakae, i no save mekem hem i doti long fes blong God. Ol samting olsem i go long bel blong hem nomo, nao biaen i goaot long bodi blong hem bakegen. Be ol samting ya we i kamaot long insaed blong man, hemia nao i save mekem man i doti long fes blong God. Man i save gat rabis tingting, i save mekem nogud wetem gel, i save stil, mo i save kilim man i ded. Man i save stilim woman blong narafala man, mo woman we i mared finis i save go slip wetem narafala man. Man i save wantem tumas ol samting blong narafala man, i save mekem ol fasin we i no stret, i save giaman, i save mekem doti bisnes, mo i save jalus. Man i save tok nogud blong spolem nem blong narafala man, i save flas, i save mekem ol krangke fasin. Ol rabis fasin ya oli mekem man i doti long fes blong God.’—Mak 7:18-23.
Jisas i talem se man we i strong blong stap klin long bodi, be i sakemaot ol loa blong stap klin long tingting mo fasin, hem i olsem wan kap we i klin afsaed be insaed i doti.—Matiu 23:25, 26.
?Tok blong Baebol i strong tumas?
“Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”—1 Jon 5:3.
?BAEBOL I TALEM WANEM?
Maeka 6:8 i talem se: “Hae God . . . i wantem blong yumi stap mekem ol fasin we i stret gud, mo blong yumi stap soemaot we yumi lavem ol man tumas, mo blong yumi stap fren gud wetem hem long evri haf blong laef blong yumi, we tingting blong yumi i stap daon.” ?Olsem wanem? ?Hemia i strong tumas? Nogat. God i wantem se yumi obei long hem from we yumi lavem hem. Sipos yumi mekem olsem, bambae yumi glad tumas. (Ol Sam 40:8) Taem yumi mestem, God i sore long yumi nao yumi harem gud. Jehova “i stap mekem i gud tumas long olgeta we oli stap ona long hem, olsem we ol papa oli stap mekem long ol pikinini blong olgeta. Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo,” yumi gat ol slak fasin, mo yumi save mestem.—Ol Sam 103:13, 14.
Tru ya, ol loa blong God we yumi folem blong stap klin long bodi, mo fasin, mo tingting blong yumi, oli soemaot se hem i gud tumas mo hem i lavem yumi. Taem yumi glad blong obei long ol loa ya, yumi soemaot se yumi waes mo yumi lavem God.
Maet Yu Laekem Hemia Tu
WAJTAOA
?Wanem Tingting Blong God Long Man We i Smok?
Baebol i neva tokbaot sigaret. ?Be olsem wanem yumi save samting ya?
