?OL MAN OLI TALEM WANEM?

Plante man oli talem se sipos loa blong gavman i no putum tabu long plei laki, i oraet nomo blong plei laki. Sam plei laki we loa i no blokem, olsem ol tikit blong lotri, oli blong winim mane blong mekem sam samting blong givhan long ol man.

?BAEBOL I TALEM WANEM?

Baebol i no tokbaot nating plei laki. Nating se i olsem, hem i givim sam rul we i soemaot tingting blong God long plei laki.

Tingting biaen long plei laki, i blong winim mane we ol narafala oli lusum. Be hemia i go agensem woning we Baebol i talem se yumi no mas “wantem samting blong narafala man.” (Luk 12:15) Taem man i griri, fasin ya nao i pulum hem blong i plei laki. Ol kasino mo ol narafala ples olsem, oli talemaot ol bigfala praes (jackpots) we man i save winim, be long semtaem oli no talem stret hamas raon blong man i plei, blong i save winim mane ya. Oli save se ol man we oli kam long kasino, oli wantem tumas blong winim bigfala mane kwiktaem. Be blong win olsem, oli mas putum bigfala mane tu. Yes, ol ples olsem oli pulum man blong oli wantem moa mane mo oli griri.

Man we i plei laki, hem i tingbaot hem wan nomo. Hem i wantem winim mane we ol narafala oli lusum. Be Baebol i talem se man i no mas ‘lukaot rod we i save givhan long hem nomo. Hem i mas lukaot rod we i save givhan long ol narafala man tu.’ (1 Korin 10:24) Mo wan long ol loa blong Tenkomanmen i talem se: “Bambae yufala i no mas letem tingting blong yufala i stap long ol samting blong narafala man.” (Eksodas 20:17) Taem wan man i wantem tumas blong win, i olsem we hem i wantem se ol narafala oli lus, blong bambae hem i save winim mane blong olgeta.

Baebol i agensem fasin ya we man i bilif strong se bambae hem i laki. Long Isrel bifo, i gat samfala we oli no moa bilif long God, nao oli stat blong “stanemap wan tebel blong god blong Laki.” ?God i glad long fasin ya? Nogat. Hem i talem long olgeta se: “Oltaem yufala i stap brekem tok blong mi, mo yufala i stap mekem ol fasin we i nogud olgeta.”—Aesea 65:11, 12, NW.

Long sam ples, ol bigfala mane we gavman i kasem long ol plei laki, hem i yusum blong givhan long ol skul, blong leftemap ekonomi blong kantri, mo blong mekem sam narafala samting blong givhan long ol man. Be nating se i olsem, rod we hem i kasem ol mane ya long hem, i pulum ol man blong oli griri, oli tingbaot olgeta nomo, mo oli wantem kasem wan samting we oli no wok from.

“Bambae yufala i no mas letem tingting blong yufala i stap long ol samting blong narafala man blong tekem i blong yufala.”—Eksodas 20:17

?BAEBOL I TALEM WANEM?

Baebol i givim woning se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.” (1 Timoti 6:9) Man i plei laki from we hem i griri, mo fasin ya i save spolem narafala. Taswe, Baebol i joenem “fasin blong man we i wantem evri samting” no i griri, wetem ol narafala rabis fasin we yumi mas sakemaot.—Efesas 5:3.

Plei laki i pulum man blong kasem mane long fasin we i isi nomo, mo hemia i mekem se man i laekem mane tumas. Be Baebol i talem se fasin ya i “stamba blong olgeta fasin nogud.” Taem man i wantem mane tumas, hem i wari tumas mo hem i no moa bilif strong long God. Baebol i tokbaot ol man we oli laekem mane tumas se “oli stap mekem ol samting we olgeta tu oli harem nogud tumas from.”—1 Timoti 6:10.

Man we i griri, hem i no save harem gud long ol samting we hem i gat, mo long mane blong hem tu. Baebol i talem se: “Sipos yu laekem mane tumas, nating we mane blong yu i plante olsem wanem, be neva yu save talem se yu harem gud, mane blong yu i naf. Mo sipos yu wantem tumas blong kam rijman, neva yu save kasem ol samting we yu yu wantem. Tingting ya i blong nating nomo.”—Prija 5:10.

Plante man we oli stap plei laki oli kam slef blong hem. Problem ya i stap kam bigwan moa long plante ples. Wan stadi i soemaot se long Amerika nomo, plante taosen man oli plei laki oltaem.

Be Baebol i talem se: “Sipos yu faenem i isi blong winim plante samting blong mekem yu yu kam rijman, ol samting ya bambae oli no save givhan gud long yu.” (Ol Proveb 20:21) Plante man we oli plei laki oli gat ol bigfala kaon, oli no moa gat mane, mo plante long olgeta oli lusum wok, oli gat problem long mared, mo oli no moa fren gud wetem narafala. Yes, taem man i folem ol rul blong Baebol, hem i save harem gud mo hem i no save kasem ol trabol we oli kamaot from plei laki.

“Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.”—1 Timoti 6:9.