?HU I wantem sik? Sik i save spolem man mo blokem hem blong mekem samting we hem i wantem. Taem yu sik yu harem nogud, be i no hemia nomo. Yu no save go wok, winim mane, go long skul, mo yu no save lukaot long famle blong yu. Mo tu, yu nidim wan man blong i lukaot long yu, mo maet yu spenem bigfala mane blong pem meresin mo tritmen.

Ol man oli stap talem se: “Blokem trabol i gud moa i bitim winim trabol.” Be yumi no save blokem sam sik. Nating se i olsem, i gat plante samting we yumi save mekem blong blokem mo daonem sik. Yu save tingbaot 5 rod we i save givhan long yu blong yu gat gudfala helt.

WAN klinik long Amerika (U.S. Centers for Disease Control and Prevention) i givim advaes ya se, “beswan rod blong blokem sik mo no pasem sik long narafala,” hemia blong wasem gud han blong yu. Sipos yu waepem nos no ae blong yu wetem han we i doti, i isi nomo blong yu kasem sik. Be sipos yu wasem gud han blong yu oltaem, bambae yu save blokem plante sik, olsem numonia mo sitsit wota, we oli kilim bitim 2 milian pikinini i ded evri yia. Mo tu, yu save blokem rabis sik ya Ebola we i stap kilim man i ded.

I gat stret taem we yu mas wasem gud han blong yu blong lukaot gud long yu mo helt blong narafala. Yu mas wasem gud han blong yu:

• Afta we yu kamaot long toelet.

• Afta we yu jenisim napkin blong wan bebi, mo afta we yu tekem wan pikinini i go long toelet.

• Bifo mo afta we yu putum meresin long wan soa.

• Bifo mo afta we yu stap wetem wan sikman.

• Bifo we yu kukum mo rerem kakae, mo bifo we yu kakae.

• Afta we yu snis, yu kof, mo afta we yu waepem nos blong yu.

• Afta we yu tajem wan anamol no wan sitsit blong anamol.

• Afta we yu pikimap doti.

Yu no mas ting se i blong nating nomo we yu stap wasem gud han blong yu blong i klin oltaem. Ol ripot oli soemaot se bighaf blong ol man we oli yusum pablik toelet, oli no stap wasem han blong olgeta, no oli no wasem gud. ?Olsem wanem yu save wasem gud han blong yu?

• Yu wasem gud han blong yu long klin wota wetem sop.

• Yu rabem gud han blong yu long sop, yu klinim gud sel fingga blong yu, mo yu wasem gud tugeta saed blong han blong yu mo bitwin ol fingga blong yu.

• Yu gohed blong rabem han blong yu blong 20 seken.

• Yu rinsem gud wetem klin wota.

• Yu waepem han blong yu long wan kiln kaliko no tawel.

Ol rod ya oli no had, be oli save blokem sik mo sevem laef.

LONG sam kantri, i had blong famle i gat klin wota. Mo long sam narafala ples tu, i had blong gat klin wota taem i gat problem wetem wota saplae blong olgeta. Maet from we bigfala wota i ron long taem blong bigfala ren, hariken, no wan paep i brok, mo sam narafala problem bakegen we i mekem se wota i kam doti. Sipos wota we yumi yusum i no klin, no yumi no putum long wan gudfala ples, hemia i save mekem yumi kasem ol sik olsem, bebet i gru insaed long bodi, kolera, sitsit wota we i save kilim man i ded, fiva ya we oli kolem typhoid, hepataetas, mo sam narafala sik bakegen. Evri yia, i gat bitim 1 bilian man oli sitsit wota from we wota we oli yusum i no klin.

Sik ya kolera i kasem man taem hem i dring wota no i kakae wan kakae we i gat doti blong man we i gat sik ya i stap long hem. ?Yu save mekem wanem blong no kasem sik ya mo sam narafala sik bakegen we oli kamaot from doti wota, long taem we i ren bigwan no long taem blong hariken?

• Yu meksua se wota we yu yusum blong dring, brasem tut, mekem i kam aes, wasem ol kakae, ol plet mo kuk, i mas klin. Maet oli putum meresin long wota ya, no maet wota ya i kamaot long wan kampani blong wota we ol man oli save gud. Mo maet wota ya i stap long ol botel mo plastik we oli sarem gud.

• Sipos i hapen se paep blong wota saplae blong yu i no klin, yu mas boelem wota blong yu bifo we yu dring, no yu save putum wan meresin blong i klinim wota.

• Sipos yu yusum kemikol ya chlorine no wan tablet blong kilim ol jem long wota, yu mas folem gud advaes blong kampani we i mekem kemikol ya.

• Yu mas yusum wan filta blong wota we i gud mo we i no sas tumas.

• Sipos yu no gat wan kemikol blong klinim wota, yu save yusum lotsavel. Yu putum 8 drop blong lotsavel long 4 lita blong wota (2 drop long 1 lita), yu miksim gud, mo yu lego i stap blong 30 minit, biaen yu save yusum.

• Oltaem yu mas putum wota blong yu long wan kontena we i klin gud mo yu kavremap gud blong doti i no go long hem.

• Yu mas meksua se kap no smol kontena we yu yusum blong kasem wota, i klin.

• Han blong yu i mas klin taem yu yusum kontena blong wota. Yu no mas pusum han no fingga blong yu long wota we i blong dring.

SIPOS yu wantem gat gudfala helt yu mas lukaot gud long kakae blong yu. Yu mas kakae defdefren kakae. Yu skelem gud fasin blong yu blong kakae sol, gris, mo suga, mo yu no mas kakae bitim mak. I gud yu kakae sam frut mo legim. Yu no kakae sem kakae evritaem. Sipos yu pem kakae long stoa, yu mas ridim gud samting we oli raetem long kakae ya. Hemia bambae i givhan long yu blong pem ol kakae we oli no ademap wan narafala samting long olgeta, olsem bred, ol sid, pasta no raes we oli mekem long sid nomo. Ol kakae ya oli rij moa long protin we bodi i nidim, i bitim ol kakae we oli ademap sam narafala samting long olgeta. I gud yu kakae smol mit nomo we i no gat tumas gris long hem, blong yu save gat protin we bodi blong yu i nidim. Mo sipos yu naf, i gud yu traem blong kakae fis, tu taem long wan wik. Long sam kantri yumi save faenem protin long ol kakae olsem ol legim.

Sipos yu kakae ol kakae we i gat plante suga long hem no i gat tumas gris, bambae yu kam fatfat. Taswe, yu mas dring plante wota i bitim we yu dring jus. Yu kakae plante frut i bitim ol kakae we i gat tumas suga long hem. Yu no kakae tumas ol kakae we i gat plante gris long hem olsem sosej, mit, bata, kek, jis, mo bisket. Mo tu, yu save yusum oel blong kuk we i no gat gris long hem.

Sipos yu kakae tumas sol, bambae i isi blong blad presa blong yu i kam antap long wan level we i nogud. From samting ya, yu mas ridim gud ol save we i stap long kakae we yu pem long stoa, blong save sipos i gat tumas sol long hem no nogat. I gud yu putum sam lif (Herbs) mo sam samting olsem galik we i mekem tes blong kakae i gud (Spices), i bitim we yu putum sol.

Nomata wanem samting we yu kakae, be yu mas kakae inaf nomo. Mo taem yu stap harem gud long wan kakae, i nogud yu kakae bitim mak.

Wan narafala problem we i kamaot from ol kakae, hemia kakae we i save mekem man i sik. Eni kakae i save mekem man i sik, sipos man i no kukum gud mo i no putum gud long ples we i klin. Wan ripot we Wol Helt Ogenaesesen i mekem, i talem se evri yia plante milian man oli sik from oli kakae wan kakae we i no klin. Plante oli kam gud bakegen be samfala oli ded. ?Yu save mekem wanem blong yu no sik?

• Maet ol legim oli gru long graon we oli putum kemikol long hem, taswe yu mas wasem gud ol legim bifo we yu kukum.

• Bifo we yu rerem kakae blong yu, yu mas wasem gud han blong yu. Yu mas yusum hot wota mo sop blong wasem gud wud blong katem mit, legim, naef mo spun blong kuk, dis, mo ples blong rerem kakae long hem.

• Yu no mas putum kakae long sem plet no sem ples we yu bin putum ol narafala kakae, olsem eg we i no tan, mit blong faol, pig, buluk, mo fis. Yu mas wasem gud plet no ples ya fastaem. Olsem nao, bambae ol jem blong wan kakae i no go long narafala kakae.

• Kakae we yu kukum i mas tan gud. Mo sipos kakae we yu kukum i save nogud hareap, mo man i no kakae long sem taem ya, yu mas putum long aesbokis kwiktaem.

• Sipos kakae we i save nogud hareap i stap afsaed blong bitim 2 aoa, no sipos i stap 1 aoa long wan ples we tempraja i bitim 32 digri selsius, yu mas sakemaot.

NATING se yu yu wan yangfala no wan olfala, be yu nidim blong eksasaes oltaem blong yu save gat gud helt. Tede plante man oli no mekem eksasaes. ?From wanem i impoten blong mekem eksasaes? Taem yu mekem eksasaes oltaem, hemia i save mekem se:

• Yu slip gud.

• Yu muvmuv plante.

• Ol masel mo bun blong yu oli strong.

• Yu no fatfat.

• Yu harem gud long tingting.

• Yu no save ded hareap.

Sipos yu no stap mekem eksasaes oltaem, i isi nomo blong:

• Yu kasem sik blong hat.

• Yu kasem sik blong suga.

• Blad presa blong yu i go antap.

• Yu gat tumas gris long blad.

• Yu save kasem strok.

Eksasaes we i stret blong yu mekem, i dipen long yia blong yu mo helt blong yu, taswe i gud yu toktok wetem dokta blong yu bifo we yu joen long wan program blong eksasaes. Ol man oli gat tingting ya se i gud sipos ol pikinini mo ol yangfala oli mekem eksasaes samwe long 60 minit evri dei. Mo ol bigman oli mekem 150 minit no 75 minit, sipos oli stap mekem bigfala wok evri wik.

Yu save jusum wan eksasaes we i mekem yu harem gud. Maet yu plei basketbol, tenis, futbol, yu wokbaot, yu ron long baskel, yu wok long garen, yu splitim faea wud, yu go swimswim long solwota, yu pul long kenu, yu ronron, mo sam narafala eksasaes we i mekem yu muvum bodi blong yu. ?Olsem wanem blong luksave se wan eksasaes i no strong tumas no i strong? Wan eksasaes we i no strong tumas, hem i mekem yu yu swet, be hemia we i strong, hem i mekem se i had blong yu toktok.

NAMBA blong aoa we man i mas slip, i defdefren. Plante pikinini we oli jes bon oli slip 16 kasem 18 aoa long wan dei, ol pikinini we oli gat 1 kasem 3 yia oli slip 14 aoa, mo ol pikinini we oli gat 3 kasem 4 yia oli slip 11 no 12 aoa. Ol pikinini we oli stap go long skul, oli nidim blong slip 10 aoa. Maet ol yangfala oli slip 9 no 10 aoa, mo ol bigman oli save slip 7 kasem 8 aoa.

Yu mas tinghae long ol aoa we yu mas slip. Wan stadi i soemaot se taem man i slip gud, hemia i impoten from we:

• I givhan long ol pikinini mo ol yangfala blong oli gruap.

• I givhan long pikinini blong i lanem samting mo i holemtaet ol save long tingting.

• I givhan blong mekem se ol homon insaed long bodi oli kontrolem ol kemikol long ol sel blong bodi, blong mekem se oli wok kwik moa no oli wok slo. Mo tu, oli givhan blong tekemaot ol gris we i save mekem man i fatfat.

• I givhan blong blokem sik blong hat.

• I givhan blong blokem ol narafala sik.

Taem man i no slip gud, hem i kam fatfat, hem i harem nogud long tingting, hem i save kasem sik blong hat, sik blong suga, mo hem i save gat wan aksiden.

Taswe, ?yu mas mekem wanem sipos yu save se yu no stap slip gud?

• Yu mas slip mo girap long sem taem evri dei.

• Yu meksua se rum we yu slip long hem i kwaet, i dak, yu harem gud long hem, mo i no hot mo i no kolkol tumas.

• Yu no lukluk video no plei gem taem yu ledaon long bed, blong yu slip.

• Yu mekem se bed blong yu i stret blong yu slip gud long hem.

• Bifo we yu go slip, yu no mas kakae bigwan, dring kofe, mo tekem strong dring.

• Sipos yu folem ol advaes ya, be yu gat sam problem yet blong slip olsem, yu wantem tumas blong slip long dei, no yu sotwin taem yu stap slip, i gud yu go luk wan dokta we i save long problem ya.