Taem sikman i mas go luk plante dokta mo slip long hospital, ol samting ya i save mekem hem i harem nogud moa. Olsem stori blong Mariel i soemaot, sipos wan fren no famle i givhan long sikman, hemia i save mekem hem i harem gud, mo maet i sevem laef blong hem tu. ?Yu yu save mekem wanem blong givhan long wan fren no famle blong yu?

Bifo we yutufala i go luk dokta. Yu givhan long sikman blong i raetemdaon ol sik blong hem mo ol meresin we hem i stap tekem. Mo tu, yu raetemdaon ol kwestin blong askem long dokta. Yu askem long fren blong yu blong eksplenem sik blong hem, mo yu askem sipos i gat sam famle blong hem we oli gat sem sik ya. Yu no mas ting se dokta i save finis ol samting ya, mo maet hem i no askem tu.

Taem yutufala i stap wetem dokta. Yu meksua se yu mo sikman ya i kasem save gud ol tok blong dokta. Yu askem kwestin, be yu no mekem olsem se yu save evri samting finis. Yu no toktok tumas, yu letem sikman tu i askem kwestin mo i toktok. Yu lesin gud, mo yu raetemdaon sam samting. Yu askem long dokta blong i talem ol defdefren meresin we sikman ya i save tekem. Samtaem, maet i waes blong sikman i go luk wan narafala dokta blong save tingting blong hem tu.

Afta we yutufala i luk dokta. Yu tokbaot wetem sikman ol samting we dokta i talem. Yu meksua se hem i kasem stret meresin. Yu pulum hem blong i tekem ol meresin ya, mo blong talemaot long dokta kwiktaem sipos meresin ya i mekem hem i harem nogud. Yu talem ol gudfala toktok long sikman blong i gat strong tingting. Mo yu pulum hem blong i folem ol narafala advaes we dokta i givim, maet blong go luk dokta bakegen no blong go luk wan narafala dokta. Mo yu givhan long hem blong i kasem save moa long sik blong hem.

Yu stap kwaet mo yu jekem gud ol pepa. Taem wan sikman i go slip long hospital, maet hem i wari mo i no moa gat paoa blong mekem wan samting. Sipos yu stap kwaet mo yu givhan long kaen fasin, yu save mekem se evriwan oli no wari tumas, mo oli no mekem plante mastik. Yu jekem gud ol pepa we oli fulumap blong sikman i go slip long hospital. Yu respektem raet blong sikman blong mekem prapa desisen blong hem long ol meresin mo ol samting we oli mekem long hem. Sipos hem i sik tumas blong mekem desisen, yu folem ol tok we hem i raetem finis, mo ol tok blong famle ya no man ya we hem i jusum finis, blong lukaot long ol samting long saed blong helt blong hem. *

Yu no fraet blong toktok. Yu no mas fraet blong talemaot tingting blong yu. From we yu klin mo yu jenis gud mo yu gat gudfala fasin, samting ya i save pulum ol dokta mo nes blong oli intres moa long sikman, mo blong oli mekem sam moa samting blong lukaot gud long hem. Long plante hospital, i no sem dokta oltaem we i luk sikman. Yu save givhan long ol dokta ya taem yu tokbaot ol samting we ol narafala dokta oli talem. Yu yu save gud sikman, taswe sipos yu luk se sam samting long bodi no tingting blong hem i jenis, i gud yu talem long dokta.

Yu talem tangkiu mo yu soemaot respek. Ol dokta mo nes oli gat plante wok blong mekem. Yu kaen long olgeta olsem we yu wantem se narafala i kaen long yu. (Matiu 7:12) Yu soemaot respek long olgeta from save mo waes we oli kasem long trening blong olgeta, yu trastem olgeta, mo yu talem tangkiu from hadwok blong olgeta. Taem yu mekem olsem, oli harem se oli wantem mekem bes blong olgeta blong givhan long sikman.

Yumi evriwan i stap kasem sik. Be sipos yu tingrere mo yu save samting we i stret blong mekem, yu save givhan long wan fren no famle blong i winim trabol we sik i mekem long hem. —Ol Proveb 17:17.