Bilif i Save Jenisim Laef Blong Yu

“I TRU, man i save gat ol gudgudfala fasin, nating sipos hem i no gat wan God.” Hemia tok blong wan woman we i bilif se i no gat God. Woman ya i talem se hem i bin tijim ol pikinini blong hem blong oli folem ol gudfala fasin, mo ol pikinini blong hem tu oli tijim ol pikinini blong olgeta blong folem ol gudfala fasin—nating se olgeta evriwan oli no bilif long God.

?Hemia i minim se i no nidim blong bilif long God? I klia se woman ya i gat tingting olsem. Mo i tru, ol man we oli no bilif long God, i no evriwan we fasin blong olgeta i nogud. Aposol Pol i tokbaot “ol man blong ol nesen” se oli no save God be “oli stap mekem ol samting olsem we loa i talem.” (Rom 2:14, NW) Yumi evriwan—wetem olgeta ya tu we oli bilif se i no gat God—yumi bon wetem tingting we i stap jajem yumi. Plante man, oli traem blong folem wanem we gudfala tingting ya i stap pulum olgeta blong mekem. Be oli no bilif se God nao i givim tingting ya we i mekem oli save wanem i stret mo wanem i no stret.

Be wan strongfala bilif long God—bilif we i stanap long Baebol—i gat moa paoa blong pulum man blong mekem i gud. Paoa blong bilif ya i strong moa i bitim wanem we tingting nomo i stap lidim yumi blong mekem. Bilif we i stanap long Tok blong God, Baebol, i lidim tingting ya we i stap jajem yumi, nao i mekem i moa isi long yumi blong luksave wanem i stret mo wanem i no stret. (Hibrus 5:14) Mo tu, bilif i givim paoa long yumi blong holemtaet ol gudfala fasin taem yumi fesem bigfala traem. Eksampel, long ol yia 1900, plante kantri oli kam aninit long paoa blong ol politik gavman we oli gat kruked fasin. Ol gavman ya oli fosem ol man we oli gat gudfala fasin blong mekem ol fasin we oli nogud bitim mak. Be, olgeta we oli gat trufala bilif long God oli no wantem lego ol rul we oli stap folem, nating se oli save lusum laef blong olgeta from. Antap long hemia, bilif we i stanap long Baebol i save jenisim laef blong man. Bilif ya i save sevem laef blong ol man we i olsem se oli lus, mo hem i save halpem ol man blong no  mekem ol bigfala mastik. Bambae yumi luk sam eksampel.

Bilif i Save Jenisim Laef Blong Famle

“Bilif blong yu i mekem se yu winim wan bigfala samting.” Wan jaj blong Inglan i talem tok ya taem hem i tekem disisen blong putum ol pikinini blong John mo Tania i gobak long han blong tufala. Taem sam man we oli wok blong gavman oli stat lukluk long bisnes blong John mo Tania, oli faenem se tufala i no mared folem loa mo famle laef blong tufala i nogud we i nogud. From we John i gat fasin blong yusum drag mo plei laki, ale hem i yusum olkaen rod we oli brekem loa blong gohed long ol nogud fasin ya. Hem i no keagud long ol pikinini mo woman blong hem. ?Nao, wanem “merikel” i kamaot?

Wan dei, John i harem we yangfala nefiu blong hem i stap tokbaot Paradaes. Samting ya i pulum intres blong hem bigwan. Ale, hem i go long papa mama blong boe ya, mo i askem sam kwestin long tufala. Papa mama ya, tufala i Witnes blong Jeova mo tufala i givhan long John blong save wanem we Baebol i talem long saed blong paradaes. Sloslou, John mo Tania, tufala i wokem wan bilif we i stanap long Baebol mo bilif ya i jenisim laef blong tufala. Tufala i stretem mared blong tufala folem loa mo tufala i winim ol nogud fasin blong tufala. Ol man ya we oli bin jekemap famle blong tufala, oli faenem wan samting we, smoltaem bifo, oli neva ting se bambae i save hapen. Oli faenem wan hapi famle long wan haos we i klin, mo we narafala i save agri se i wan gudfala ples blong pikinini i gruap long hem. Samting we jaj ya i talem i stret. Hem i talem se “merikel” ya i kamaot from niufala bilif blong John mo Tania.

Long Saot Wes Esia, hemia plante taosen kilometa longwe long Engglan, klosap wan yangfala waef i joenem olgeta we nem blong olgeta i stap long ripot we i mekem yumi sore. Hem i stap plan blong joenem plante milyan man we oli mekem divos evri yia. Waef ya i gat wan pikinini, be hasban blong hem i olfala moa long hem. From samting ya, ol famle blong hem oli stap fosem hem blong mekem divos, mo hem i stap mekem rod finis blong divos. Be, hem i stap stadi Baebol wetem wan Witnes blong Jeova. Taem Witnes ya i kasem save long plan ya, hem i eksplenem wanem we Baebol i talem long saed blong mared—eksampel, mared i wan presen we God i givim mo yumi mas tinghevi long hem. (Matiu 19:4-6, 9) Woman ya i stap tingting hem wan se, ‘I narakaen se Witnes ya we i wan strenja i wantem sevem mared blong mi, be olgeta ya we oli stret famle blong mi oli wantem brekem mared blong mi.’ Niufala bilif we woman ya i kasem i halpem hem blong sevem mared blong hem.

Wan ripot we i mekem yumi harem nogud, hem i long saed ya we woman i kilim bebi long bel. Wan ripot blong Yunaeted Nesen i soem se evri yia, i gat samwe long 45 milyan bebi we mama blong olgeta i kilim olgeta oli ded long bel. Evritaem we wan mama i mekem fasin ya, hem i olsem wan bigfala trabol. Save blong Baebol i givhan long wan woman long Filipin blong no kam wan long ol mama ya.

Ol Witnes blong Jeova oli toktok wetem woman ya, mo hem i tekem buk ya we i blong stadi Baebol, nem blong hem ?Wanem Samting We God i Wantem Yumi Blong Mekem?, * mo hem i stat blong stadi Baebol. Sam manis biaen, woman ya i eksplenem from wanem hem i akseptem Baebol stadi. Hem i gat bel taem ol Witnes oli visitim hem fastaem, be hem mo hasban blong hem, tufala i mekem disisen finis blong kilim i ded bebi ya we i stap long bel blong hem. Be pija we i stap long pej 24 blong buklet ya, we i soem wan bebi we i no bon yet, i kasem hat blong woman ya. Ol tok blong Baebol long haf ya we oli talem se laef i tabu mo se ‘God i stamba blong laef’ oli jenisim tingting blong woman ya, nao hem i no kilim bebi blong hem i ded. (Ol Sam 36:9) Naoia hem i mama blong wan naesfala pikinini we i gat gudfala helt.

Bilif i Halpem Olgeta We Narafala i Ting Nating Long Olgeta

Long Itiopia, tu man we klos blong tufala i brobrok, tufala i kam long wan miting we ol Witnes blong Jeova oli stap mekem blong wosip. Taem miting i finis, wan Witnes i kam talem halo long tufala long kaen fasin. Tufala i askem Witnes ya sipos hem i save givim sam mane long tufala. Witnes ya i no givim mane long tufala, be i givim wan samting we i moa gud. Hem i leftemap tingting blong tufala blong wokem wan strongfala bilif long God, wan samting we “i gud moa i winim gol.” (1 Pita 1:7) Wan long tufala i folem tok ya mo i stat stadi Baebol. Samting ya i jenisim laef blong hem. Taem bilif blong hem i stap gru, hem i lego fasin blong smok, fasin blong dring alkol, fasin blong slip olbaot, mo hem i no moa tekem drag ya we oli kolem kat. Hem i lanem olsem wanem blong wokhad blong kasem olting we hem i nidim blong laef. Hem i no moa asaskem olting olbaot mo naoia laef blong hem i klin mo i karem gudfala frut.

Long Itali, oli putum wan man we i gat 47 yia long kalabus blong 10 yia. Mo oli tekem hem i go long wan  spesel hospital we i blong stretem tingting mo givhan long man blong gat gudfala fasin. Wan Witnes blong Jeova we oli givim raet long hem blong go insaed long kalabus blong givhan long ol man long saed blong spirit, i stadi Baebol wetem hem. Man ya i gohedgud long saed blong spirit. Bilif i jenisim laef blong hem bigwan, mekem se biaen ol narafala presina oli stap askem advaes long hem blong winim ol problem blong olgeta. Bilif blong hem we i stanap long Baebol, i mekem se ol gad long kalabus oli respektem hem, tinghae long hem, mo oli trastem hem.

Long ol yia we oli jes pas, ol niuspepa oli givim ripot long saed blong ol faet bitwin ol manples long Afrika. Samting we i moa nogud hemia ol stori long saed blong ol smol boe we oli stap tren blong kam soldia. Ol man oli pulum ol pikinini ya long graon, oli kilim nogud olgeta, mo fosem olgeta blong mekem ol fasin we oli nogud we i nogud long stret famle blong olgeta blong meksua se taem ol pikinini ya oli kam soldia, bambae oli stap tru nomo long wanem we oli stap faet from. ?Olsem wanem long ol yangfala ya? ?Bilif we i stanap long Baebol i naf blong jenisim laef blong olgeta? Yes, i gat tu stori oli soem samting ya.

Long Liberia, Alex i wan boe we i stap givhan long pris blong mekem ol wok klosap long olta insaed long Katolik Jos. Be taem hem i gat 13 yia, hem i joenem wan grup blong ol man blong faet mo hem i kam wan pikinini soldia we fasin blong hem i nogud we i nogud. Blong mekem se hem i strong long faet, hem i go luk wan man blong wokem nakaemas. Alex i luk plante long ol fren blong hem oli ded taem ol man oli kilim olgeta, be hem i no ded. Long 1997, hem i mitim ol Witnes blong Jeova mo hem i kasem save se oli no luk hem olsem nating. Be, oli halpem hem blong save wanem we Baebol i talem long saed blong raf fasin. Alex i lego ami. Taem bilif blong hem i stat blong gru, hem i folem oda ya blong Baebol se: “Hem i mas lego ol fasin nogud, mo i mas mekem ol samting nomo we i gud. Long olgeta tingting blong hem, hem i mas wok had blong mekem pis.”—1 Pita 3:11.

Long sem taem ya, wan man we bifo i wan pikinini soldia, nem blong hem Samson, i kam long taon we naoia Alex i stap long hem. Samson i wan boe blong singsing insaed long jos, be long 1993 hem i kam wan soldia mo i joen long fasin blong yusum drag, i wok wetem rabis spirit, mo i mekem nogud long saed blong seks. Long 1997, hem i finis long ami. Samson i stap long rod blong hem blong go long Monrovia blong joen long wan spesel sekiuriti fos. Long taem ya nao, wan fren i pulum hem blong stadi wetem ol Witnes blong Jeova. Risal we i kamaot se Samson i wokem wan bilif we i stanap long Baebol. Samting ya i givim strong tingting long hem blong lego fasin blong faet. Naoia Alex mo Samson, tufala tugeta i stap long pis mo tufala i no moa mekem ol rabis fasin. ?Yu ting se i gat wan narafala samting we i save jenisim laef blong ol man we narafala i spolem olgeta? Nogat, Baebol nomo i save mekem olsem.

Bilif We i Stret

Hemia sam nomo long plante eksampel we yumi save talem blong soem paoa blong trufala bilif we i stanap long Baebol. I tru, ol man we oli stap talem se oli bilif long God, i no evriwan we oli folem ol hae rul blong Baebol. Yes, sam man we oli no bilif long God, maet laef blong olgeta i moa gud i bitim samfala we oli talem se oli Kristin. Hemia from we bilif we i stanap long Baebol i joen wetem wan samting we i bitim fasin ya we man i talem nomo se hem i bilif long God.

Aposol Pol i talem se “fasin ya we yumi bilif strong long God, hem i soemaot long yumi we olgeta samting ya we yumi stap putum tingting blong yumi i strong long hem, olgeta oli tru. Mo hem i soemaot long yumi we olgeta samting ya we yumi no save luk, be oli stap.” (Hibrus 11:1) Taswe, bilif i joen wetem fasin ya we yumi putum tingting blong yumi i strong long wan samting we yumi no luk—be i gat pruf se samting ya i stap. Hem i minim se man i no gat tu tingting se God i stap, se hem i intres long yumi, mo se hem bambae i blesem olgeta we oli stap mekem ol samting we hem i wantem. Aposol Pol i talem tu se: “Sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.”—Hibrus 11:6.

Bilif ya nao i jenisim laef blong John, Tania, mo sam narafala man we yumi tokbaot long haf ya. Bilif ya i lidim olgeta blong trastem fulwan Tok blong God, Baebol, taem oli mekem ol disisen blong olgeta. Hem i halpem olgeta blong no tekem sot kat blong folem wan rod we i no stret, mo i moa isi blong folem. Nating se ol trufala ekspiryens ya oli no sem mak, stat blong olgeta i sem mak nomo. Wan Witnes blong Jeova i bin stadi Baebol wetem ol wanwan man ya, nao oli luk trutok we Baebol i talem, se: “Tok blong God i wan samting we i laef, mo i stap wok.” (Hibrus 4:12) Paoa blong Tok blong God i halpem ol wanwan man ya blong wokem wan strongfala bilif we i jenisim laef blong olgeta, i mekem laef blong olgeta i kam moagud.

Ol Witnes blong Jeova oli stap wok strong long bitim 230 kantri mo aelan. Oli singaot yu blong stadi Baebol. ?From wanem? From we oli savegud se wan bilif we i stanap long Baebol i save jenisim laef blong yu tu, blong mekem i kam moagud.

[Futnot]

[Tok blong pija long pej 3]

Wan bilif we i stanap long Baebol i save jenisim laef blong man blong i kam moagud.