Laef Store

Tingbaot Man We i Wokem Yumi Taem Yumi Yang Yet

DAVID Z. HIBSHMAN I TALEM STORI YA

“Sipos mi mi kasem en blong laef blong mi, mi rili hop se mi bin stap tru long Jeova. Mi askem strong long Jeova blong lukaotgud long David. Tangkiu tumas long Jeova from mared blong mitufala we i nambawan mo i gud tumas.”

TINGBAOT ol filing mi gat afta we mi berem waef blong mi long Maj 1992. Long taem ya nao mi jes faenem laswan tok we hem i bin raetem long wan smol buk blong hem. Jes faef manis we i pas, mifala i bin makem 60 yia we Helen i bin mekem minista wok fultaem.

Mi rimemba gud dei ya long 1931, we mi mo Helen, mitufala i sidaon tugeta long bigfala asembli long Columbus, Ohio, U.S.A. Helen i no kasem 14 yia yet, be hem i bin luksave se asembli ya i impoten tumas i bitim tingting blong mi. I no longtaem biaen, Helen i soemaot strong tingting blong hem long saed blong minista wok. Hem wetem mama blong hem, we i wan wido, tufala oli statem wok blong paenia, hemia nem we ol Witnes blong Jeova oli kolem olgeta we oli mekem minista wok fultaem. Oli lego naesfala haos blong tufala blong go prij long ol eria afsaed long ol taon, long saot long Yunaeted Stet.

Kristin Histri Blong Mi

Long 1910, papa mama, wetem tu smol pikinini, oli lego ples blong olgeta. Oli aot long is long Pennsylvania, oli go long Grove City, hemia long wes haf long Pennsylvania. Long ples ya oli putum haf mane blong pem wan smol haos, mo oli kam strong memba blong Rifom Jos. I no longtaem biaen, William Evans i visitim tufala. Man ya i wan Baebol Studen, hemia nem we ol Witnes blong Jeova oli bin karem bifo. Long taem ya, papa i kasem samwe long 25 yia, mo mama hem i gat samwe long 20 yia. Tufala oli lesingud long naesfala man ya, we hem i kamaot long kantri ya Wales, mo oli askem hem blong  kakae wetem tufala. Kwiktaem nomo oli bin tekem mo folem ol trutok we oli lanem.

Blong stap klosap moa long kongregesen, Papa i tekem ful famle i muf 40 kilometa i go long taon ya Sharon. Sam manis biaen, long 1911 no 1912, papa mama tufala tugeta oli tekem baptaes. Charles Taze Russell, hemia faswan presiden long Wajtaoa Sosaeti, hem i bin mekem tok long saed blong baptaes. Mi mi bon long Desemba 4, 1916, afta we papa mama oli gat fo pikinini finis. Long taem we mi bon, oli talem: “Wan moa brata blong lavem tumas.” Taswe oli putum nem long mi se, David, from i minim “Hemia We Yumi Lavem.”

Taem mi gat fo wik nomo, papa mama oli tekem mi long faswan bigfala asembli blong mi. Long taem ya bifo, papa wetem ol bigfala brata blong mi oli bin wokbaot plante kilometa blong go long ol miting blong kongregesen. Mama i tekem mi wetem bigfala sista blong mi long wan pablik transpot. Long ol miting i gat program blong moning mo blong aftenun. !Long haos, plante taem famle i stap tokbaot ol atikol long Wajtaoa mo The Golden Age, hemia nem blong Wekap! bifo.

Kasem Gudfala Frut From Ol Gudfala Eksampel

Plante pilgrim, hemia nem blong ol spika we i goraon, oli bin visitim kongregesen blong mifala. Plante taem oli stap wetem mifala wan no tu dei. Wan spika we mi rimemba gud hem, hemia Walter J. Thorn. Hem i bin tingbaot Man We i Wokem Hem ‘taem hem i yangfala yet.’ (Prija 12:1) Taem mi wan yangfala boe yet, mi bin go wetem papa blong luk “Photo-Drama of Creation.” Hemia wan samting we i gat pija i muvmuf mo noes tu, we i soemaot histri blong man.

Nating se Brata Evans mo waef blong hem, Miriam, tufala i no gat pikinini, oli bin kam olsem papa mama mo bubu long saed blong spirit long famle blong mifala. Oltaem William i singaot papa blong mi se “Boe blong mi.” Hem wetem Miriam oli pulum famle blong mi blong gat strong tingting blong talemaot gud nius. Long fas haf long ol yia 1900, samtaem Brata Evans i bin gobak long eria blong Swansea, long kantri blong hem Wales, blong serem ol trutok blong Baebol. Ol man long ples ya oli bin kolem hem prija blong Amerika.

Long 1928, Brata Evans i lego wok blong hem mo i stat prij long ol hil blong West Virginia. Tu bigfala brata blong mi, Clarence we i gat 21 yia, mo Carl we i gat 19 yia, oli go wetem hem. Evriwan long mifala fo pikinini boe i bin spenem plante yia long fultaem minista wok. Antap moa, evriwan long mifala fo pikinini boe i bin mekem wok blong Elda We i Goraon, taem mifala i yang. I no longtaem i pas we smol sista blong Mama, Anti Mary, we hem i kasem 90 yia finis, i bin raet long mi mo i talem: “!Yumi evriwan i talem bigfala tangkiu from we Brata Evans i bin gat strong tingting blong prij, mo i bin visitim Grove City!” Anti Mary, hemia wan moa bakegen we i bin tingbaot God stat long taem we hem i yang yet.

Go Long Ol Bigfala Asembli

Papa wetem Clarence, tufala nomo oli save go long bigfala asembli long Cedar Point, Ohio long 1922. Be long 1924, mifala i gat wan trak, mo ful famle i bin go long bigfala asembli long Columbus, Ohio. Mifala ol pikinini i bin yusum ol mane blong mifala nomo blong pem ol kakae blong mifala long ol eit dei blong asembli ya. Long tingting blong papa mama, evri memba blong famle oli mas lan blong sapotem olgeta nomo. Taswe, blong winim mane mifala i bin lukaotem ol faol mo rabet, mo ol sugabag. Mifala ol boe i seremaot ol niuspepa tu blong winim mane.

Long taem blong bigfala asembli long Toronto, Kanada, long 1927, mifala i gat wan smol brata we  i gat sikis manis nomo, nem blong hem Paul. Mi kasem wok blong stap long haos blong lukaot long Paul, mo Anti Mary i givhan long mi. Papa mama wetem ol narafala pikinini oli go long Toronto. From we mi bin stap lukaot smol brata ya, oli givim ten dola long mi. Mi putum mane blong pem wan niufala klos blong miting, from we papa mama oli trenem mifala oltaem blong jenis gud mo lukaotgud long klos blong mifala.

Taem we bigfala asembli long 1931 i gohed long Columbus, Ohio, Clarence mo Carl tufala oli mared mo oli mekem wok blong paenia wetem tufala waef blong tufala. Tufala tugeta oli laef long trak we i gat smol haos biaen. Carl i mared wetem Claire Houston blong Wheeling, West Virginia, mo hemia risen from wanem mi stap sidaon klosap long smol sista blong Claire, Helen, long bigfala asembli long Columbus.

Fultaem Minista Wok

Mi bin kasem stefeket long haeskul long 1932, taem mi gat 15 yia. Long yia biaen mi givim wan sekenhan trak i go long brata blong mi Clarence, long South Carolina we hem i stap paenia. Mi tu mi aplae from wok blong paenia, mo mi joenem Clarence mo waef blong hem. Long taem ya Helen i stap paenia long Hopkinsville, Kentucky, mo hem i fastaem we mi raet i go long hem. Long leta blong hem i kam long mi, hem i askem: “?Yu yu wan paenia?”

Long leta blong mi—Helen i bin kipim kasem taem we hem i ded, klosap 60 yia biaen—mi mi ansa: “Mi wan paenia, mo mi hop se mi save paenia olwe.” Long leta ya, mi talem long Helen we mi stap seremaot buklet ya The Kingdom, the Hope of the World long ol pris mo ol jaj tu.

Long 1933, Papa i bin wokem blong mi wan haos tapolen we i sidaon antap long wil—wan kat we longfala blong hem 2.4 mita, mo bigfala blong hem 2 mita. Ol saed blong kat ya i gat tapolen we i goraon long ol smol wud mo i gat windo long fored mo biaen. Long nekis fo yia we mi mekem wok blong paenia, mi laef long smol haos ya we i no flas.

Long Maj 1934, Clarence mo Carl, wetem tufala waef blong tufala, Helen mo mama blong hem, mo sista blong waef blong Clarence mo mi—mifala eit—i go wes blong go long bigfala asembli long Los Angeles, California. Sam oli sidaon mo slip long kat blong mi. Mi bin slip long trak, mo sam narawan oli rentem ples blong slip. From we i gat problem wetem trak, mifala i kasem Los Angeles long seken dei blong sikis-dei asembli ya. Long ples ya nao, long Maj 26, mi mo Helen i soemaot we mifala i givim laef i go long Jeova mo mifala i tekem baptaes.

Long asembli ya Joseph F. Rutherford, we hem i presiden long Wajtaoa Sosaeti long taem ya, hem i mitim ol paenia. Hem i leftemap tingting blong mifala, mo i talem se mifala ol man we i no fraet blong faet from trutok blong Baebol. Long taem ya, oli mekem rod blong givim smol mane long ol paenia blong oli save gohed long minista wok blong olgeta.

Wan Edukesen Blong Laef

Taem mifala i gobak long asembli ya long Los Angeles, mifala evriwan i serem Kingdom mesej wetem ol man long ful eria blong South Carolina, Virginia, West Virginia, mo Kentucky. Plante yia biaen, Helen i raet long saed blong taem ya: “I no gat kongregesen blong givhan, i no gat ol fren blong help, from we mifala i rili olsem ol strenja long narafala ples. Be nao mi save se mi bin kasem wan edukesen. Mi mi stap kam rij.”

Hem i askem: “?Wan yangfala gel i mekem wanem taem hem i stap longwe long ol fren mo famle blong hem? Be mi no harem nogud tumas. Mi no save tingbaot se mi bin les. Mi bin rid plante. Neva mifala i mestem blong ridim ol buk long saed blong Baebol mo mekem ol Baebol stadi wanwan. Mi bin stap klosap long mama blong mi, mo  hem i tijim mi olsem wanem blong spenem mane long waes fasin, blong pem ol samting, blong jenisim ol wil we oli flat, blong kuk, somap mo prij. Mi mi glad from we laef blong mi i olsem, mo mi no wantem jenisim nating.”

Long ol yia ya, Helen mo mama blong hem oli glad blong stap laef long wan smol haos, nating se mama blong hem i bin gat wan naesfala haos. Afta long asembli long Columbus, Ohio long 1937, helt blong mama blong Helen i kam nogud, mo hem i mas slip long hospital. Biaen, hem i ded long Novemba 1937 long ples we i mekem wok blong Jeova long Philipi, West Virginia.

Mared Mo Gohed Long Wok Blong Jeova

Long Jun 10, 1938, mi mo Helen i mared long wan smol seremoni long haos we hem i bon long Elm Grove klosap long Wheeling, West Virginia. Gudfala fren blong mifala Brata Evans i mekem tok blong mared blong mifala. Hem nao i bin serem trutok wetem famle blong mi plante yia bifo mi mi bon. Afta long mared blong mifala, mi mo Helen i bin plan blong gobak long wok blong paenia long East Kentucky be mifala i sek we mi kasem invetesen blong mekem wok blong Zon Elda. Wok ya i min se mifala i goraon mo visitim ol grup blong Witnes blong Jeova long West Kentucky mo haf long Tennessee, blong givhan long olgeta long minista wok. Long taem ya i gat samwe long 75 man nomo we oli talemaot gud nius long ol ples we mifala i visitim.

Long taem ya, ol man oli joen bigwan long fasin blong soemaot sapot blong kantri mo samting ya i tanem tingting blong fulap man. From we mi Kristin mo mi no joen long ol bisnes ya, mi ting se i no longtaem bambae oli sakem mi long kalabus. (Aesea 2:4) Be from mi bin prij plante go kasem taem ya, mi kasem wan pepa we i kamaot long ofis blong ami we i letem mi mi gohed blong mekem minista wok fultaem.

Taem mifala i statem wok blong goraon blong visitim ol grup, fulap man oli makem se mifala i yang yet. Long Hopkinsville Kentucky wan Kristin sista i welkamem Helen mo i holem hem, mo i askem: “?Yu save rimemba mi?” Long 1933, Helen i bin prij long hem long smol stoa blong hasban blong hem. Woman ya i bin tij long Sande skul, be afta hem i ridim buk we Helen i bin givim, hem i stanap fored long klas we hem i tij mo i talem sore from we hem i bin tijim ol samting we i no laenap wetem Baebol. Biaen hem i lego Jos blong hem, mo i stat blong talemaot trutok blong Baebol long taon we hem i stap laef long hem. Mi mo Helen i bin mekem wok blong goraon long West Kentucky blong tri yia, mo plante taem mitufala i bin stap long haos blong sista ya mo hasban blong hem.

Long taem ya, i gat ol smol lokol asembli, mo wan taem A. Macmillan i bin visitim mifala. Hem i bin stap long haos blong papa mama blong Helen taem Helen i pikinini. Taswe long asembli ya, hem i wantem stap wetem mifala long haos kat blong mifala. Longfala blong haos kat ya i 5 mita, mo mifala i bin gat wan narafala bed long hem. Hem tu i bin tingbaot Man We i Wokem Hem, taem hem i yangfala yet. Hem i bin givim laef blong hem i go long Jeova long 1900, taem hem i gat 23 yia.

Long Novemba 1941, wok blong ol brata we i goraon i finis blong smol taem, mo Sosaeti i sanem mi blong mekem wok blong paenia long Hazard, Kentucky. Mifala i wok bakegen wetem brata blong mi Carl, mo waef blong hem Claire. Long ples ya nao, Joseph Houston, hemia boe blong brata blong Helen, i joenem mifala mo i statem wok blong paenia. Hem i gohed long fultaem minista wok klosap 50 yia. Biaen hem i ded from wan hat atak long 1992, taem hem i stap mekem nambawan wok long wol hedkwota blong Witnes blong Jeova long Brooklyn, New York.

Long 1943, Sosaeti i sanem mifala long Rockville, Connecticut. Ples ya i defren olgeta long ples blong mifala, from mifala i lan blong prij long ol man long saot Yunaeted Stet nomo. Long Rockville, evri wik Helen i mekem bitim 20 Baebol stadi. Biaen mifala i rentem wan smol rum blong kam Haos Kingdom blong mifala, mo statem wan smol kongregesen.

Taem mifala i stap wok yet long Rockville, mifala i kasem invetesen blong go long namba faef klas blong Wajtaoa Baebol Skul blong Gilead long South Lansing, New York. Long skul mifala i glad tumas blong faenemaot we bambae Aubrey mo Bertha Bivens oli joen long klas blong mifala. Tufala oli fren blong mifala bifo, long taem we mifala i bin paenia long Kentucky.

Skul mo Niufala Wok

Nating se mifala i yang yet, plante long olgeta insaed long klas oli yang moa i bitim mifala. Yes,  olgeta oli stap tingbaot Man We i Wokem Yumi taem oli yang yet. Graduesen blong mifala hem i long Julae 1945, long sem taem we Namba Tu Bigfala Faet Blong Wol klosap i finis. Taem mifala i wet blong faenemaot se mifala i go wea blong mekem misinari wok, mifala i gohed blong wok wetem Flatbush Kongregesen long Brooklyn, New York. Long Oktoba 21, 1946, mifala i tekem plen blong go long niufala kantri blong mifala long Guatemala City, i gat sikis moa brata sista tu we oli kam, tu long olgeta oli fren blong mifala, Brata mo Sista Bivenses. Long taem ya, i no kasem 50 Witnes blong Jeova long ful kantri ya, Central America.

Long Epril 1949, Sosaeti i sanem sam long mifala ol misinari i go long namba tu bigfala taon ya Quetzaltenango. Taon ya i stap bitim 2,300 mita antap long solwora, mo win antap long bigfala hil ya i klingud. Helen i bin raetem sam samting long saed blong wok blong mifala long ples ya: “Hemia wan sas samting blong gat jans blong prij long plante taon mo vilej. Mifala i wekap long fo klok long moning mo kasem wan bas blong go long wan taon farawe. Plante taem bas ya i no gat windo, be i gat tapolen nomo blong blokem san. Mifala i prij eit aoa bifo mifala i gobak long sapa.” Tede i gat plante kongregesen i stap long ol taon ya, mo i gat sikis kongregesen long Quetzaltenango.

I no longtaem, Sosaeti i singaot sam misinari blong go wok long Puerto Barrios long Caribbean Coast, hemia namba tri bigfala taon long Guatemala. Gudfala fren blong mifala, Brata mo Sista Bivenses, tufala oli go wetem sam moa bakegen blong mekem wok long niufala ples ya. Mifala i bin wok wetem tufala blong faef yia long Guatemala. I no isi blong talem tata long tufala, mo mifala i harem se wan bigfala samting long laef blong mifala i lus. Naoia, from mi mo Helen nomo i stap long misinari hom, mifala i muf i go long wan smol haos. Long 1955, mitufala i akseptem wan niufala wok long wan taon we i moa hot, Mazatenango. Smol brata blong mi Paul, mo waef blong hem Dolores, we oli go long Gilead Skul long 1953, oli bin wok long ples ya i no longtaem bifo we mifala i kam.

Long 1958 i gat bitim 700 Witnes blong Jeova, 20 kongregesen, mo tri seket long Guatemala. Mi mo Helen i mekem wok blong goraon blong visitim ol smol grup blong ol Witnes mo ol kongregesen bakegen, mo mifala i visitim kongregesen long Quezaltenango. Ale, long Ogis long 1959, mifala i kasem invetesen blong gobak bakegen long Guatemala City, mo mifala i stap laef long Branj Ofis. Mi mi wok long branj ofis, mo Helen i gohed blong mekem misinari wok blong 16 yia bakegen. Biaen, hem tu i stat wok long branj ofis.

Sam Moa Blesing Bakegen

Oltaem bifo i luk olsem se mi nao mi wan we i moa yang we i stap mekem wok blong Jeova. Naoia mi nao mi moa olfala i bitim ol narawan taem mi go long branj skul long Patterson, New York, long 1996. Taem we mi yang, mi bin kasem plante help we ol olfala oli givim. Nao mi glad tumas blong gat jans blong halpem ol yangfala we oli wantem tumas blong tingbaot Man We i Wokem yumi taem oli yangfala yet. Afta fifti-tri yia i pas, stat long taem we mifala i bin kasem Guatemala, namba blong pablisa i go antap i bitim 19,000!

Plante Samting Blong Gat Fasin Tangkiu From

I no gat wan man i gat wan laef we i no gat ol problem, be oltaem yumi save putum “ol trabol long Jeova.” (Ol Sam 55:22) Plante taem hem i yusum ol gudfala fren blong yumi blong sapotem yumi. Eksampel, sam yia bifo we Helen i ded, hem i givim wan presen long mi. Presen ya i wan smol brasplet we oli raetem wan vas long Baebol long hem. Vas ya hemia Hibru 6:10: “Oltaem God i mekem i stret nomo. Mo hem i no save fogetem ol wok ya we yu mekem. Hem bambae i stap tingbaot we yu lavem nem blong hem, mo we yu givhan finis long ol narafala Kristin man, mo we yu stap givhan long olgeta yet.”—Weymouth.

 Hem i raetem long wan smol not we i go wetem presen ya: “Daling blong mi, mi no gat plante samting blong givim long yu, be mi save givim FULWAN LAV BLONG MI nomo... Vas ya i stret long yu, mo mi askem yu blong putum long tebel blong yu. Mi no askem jes from we mi givim presen long yu, be from vas ya i stret long ol wok we yu bin mekem long ol yia we i pas.” Kam kasem tede, brasplet ya i stap long tebel blong mi long ofis blong branj long Guatemala.

Mi bin mekem wok blong Jeova stat long taem we mi yang. Mo nao, taem mi stap kam olfala, mi talem tangkiu long Jeova from gudfala helt blong mi we i letem mi mi gohed wetem ol wok we Sosaeti i givim long mi. Plante taem we mi mekem Baebol riding blong mi, mi stap faenem ol vas we mi sua se gudfala waef blong mi bambae i makem long Baebol blong hem, sipos hem i stap laef yet. Mi stap tingting olsem taem mi bin ridim bakegen Ol Sam 48:14: “God ya bambae i God blong yumi oltaem, mo hem bambae i lidim yumi gogo i no save finis.”

Mi mi glad tumas blong serem hop long saed blong ol dedman bambae oli laef bakegen long fiuja. Long taem ya nao, ol man we oli kamaot long olgeta nesen bambae oli welkamem ol fren mo famle we oli ded, blong laef long niufala wol. !Hemia wan nambawan samting! Bambae yumi krae bigwan from glad taem yumi tingbaot we Jeova hem i rili wan God we “i save leftemap tingting blong man we i stap harem nogud”!—2 Korin 7:6.

[Tok blong pija long pej 25]

Stat long top lef i kam: Mama, Papa, Anti Eva, mo tufala brata blong mi Carl mo Clarence, 1910

[Tok blong pija long pej 26]

Helen mo mi long 1947, mo long 1992