Yumi Nidim Ogenaesesen Blong Jeova

?YU YU harem samtaem we wan man i talem se, “Mi mi bilif long God be mi no bilif long wan ogenaesesen blong skul”? Sam man we bifo oli go long jos oltaem, naoia oli gat tingting olsem. Ol man ya oli harem nogud from we jos blong olgeta i no givim ol samting we oli nidim long saed blong spirit. Plante man, nating se fasin blong ol man blong skul i mekem oli harem nogud, oli wantem gohed yet blong wosipim God. Be, oli jusum prapa rod blong olgeta blong wosipim God. Oli bilif se rod ya i moa gud i bitim we oli folem wan jos no wan narafala ogenaesesen.

?Baebol i talem wanem long saed ya? ?God i wantem se ol Kristin oli folem wan ogenaesesen?

Ol Faswan Kristin Oli Kasem Blesing Taem Oli Joen Long Wan Ogenaesesen

Long Pentekos long yia 33 K.T., * Jeova i givim tabu spirit blong hem long sam Kristin man mo woman. Ol Kristin ya oli no stap wanwan olbaot long ol smosmol grup, nogat. Oli kam tugeta mo “oli stap wanples” antap long wan rum long taon blong Jerusalem. (Ol Wok 2:1) Long taem ya, Kristin kongregesen i stanap mo biaen hem i kam wan bigfala ogenaesesen long wol. Samting ya i rili wan blesing long ol faswan disaepol. ?From wanem? From we oli kasem wan impoten wok blong mekem—oli mas talemaot gud nius blong Kingdom blong God “long olgeta ples long wol.” (Matiu 24:14) Insaed long kongregesen, ol niufala disaepol oli save folem eksampel blong ol Kristin we oli gat ekspiryens long saed blong wok blong prij.

Kwiktaem nomo mesej blong Kingdom i go kasem ol ples we oli stap farawe long taon blong Jerusalem. Bitwin 62 mo 64 K.T., aposol Pita i raetem faswan leta blong hem mo i sanem i go long ol Kristin we oli “stap wanwan olbaot olsem strenja nomo, long ol provins ya Pontas mo Galesia mo Kapadosia mo Esia mo Bitinia.” Hemia ol ples we oli stap long kantri ya we tede yumi kolem Teki. (1 Pita 1:1) Mo tu, i gat sam Kristin long Palestaen, Lebanon, Siria, Saepras, Gris, Krit, mo Itali. Long yia 60-61 K.T., taem Pol i raet i go long ol Kristin long Kolosi, hem i talem se gud nius i go finis long olgeta ples “long wol.”—Kolosi 1:23.

Seken blesing we ol Kristin oli save kasem taem oli joen olsem wan ogenaesesen, hemia se oli save leftemap tingting blong olgeta. Taem oli joenem wan kongregesen, oli save harem ol tok we i mekem man i haremgud, oli stadi tugeta long Tabu Tok blong God, oli serem ol ekspiryens we oli mekem bilif blong narafala i kam strong mo oli prea wanples wetem ol narafala Kristin.—(1 Korin, japta 14)

Ol Kristin oli olsem ol memba blong wan kongregesen. Oli mas save gud wanwan long olgeta mo laeklaekem olgeta. Taem ol faswan Kristin oli  joen wetem kongregesen blong olgeta, oli no harem olsem wan baden be kongregesen i givhan long olgeta mo i mekem oli kam strong.—Ol Wok 2:42; 14:27; 1 Korin 14:26; Kolosi 4:15, 16.

Wan narafala risen from wanem yumi nidim blong joen long wan kongregesen no wan ogenaesesen, hemia blong leftemap fasin joengud. Ol Kristin oli lanem blong mekem ‘tingting blong olgeta i kam wan nomo.’ (1 Korin 1:10) Samting ya i impoten tumas. Ol memba blong kongregesen oli kasem ol defdefren edukesen mo oli kamaot long ol defren kantri. Oli toktok ol defren lanwis mo oli gat ol defdefren stamba fasin. (Ol Wok 2:1-11) Samtaem, oli gat ol defren tingting long saed blong wan bisnes. Be, kongregesen i halpem ol Kristin blong stretem samting ya.—Ol Wok 15:1, 2; Filipae 4:2, 3.

Sipos ol elda oli no save stretem wan bigfala problem, oli askem help long ol elda we oli stap visitim ol kongregesen, olsem Pol. Mo sipos oli gat ol bigfala kwestin long saed blong bilif, oli askem help long hed kampani we i stap long Jerusalem. Taem hed kampani i stat, ol aposol blong Jisas Kraes nomo oli memba blong hem, be biaen ol elda long kongregesen blong Jerusalem oli joen long hem. Evri kongregesen i akseptem se God i givim paoa long hed kampani mo ol man we oli wok long nem blong hed kampani blong lidim wok blong prij, blong putumap ol man blong mekem wok long kongregesen, mo blong tekem sam disisen long saed blong ol stamba tijing. Taem hed kampani i tekem wan disisen blong stretem wan problem, ol kongregesen oli akseptem disisen ya mo “oli harem gud, from we tok blong hem i leftemap tingting blong olgeta.”—Ol Wok 15:1, 2, 28, 30, 31.

Yes, long faswan handred yia, Jeova i yusum wan ogenaesesen. ?Be olsem wanem tede?

Tede Yumi Nidim Wan Ogenaesesen

Olsem ol disaepol long faswan handred yia, tede ol Witnes blong Jeova oli obeigud long oda ya blong talemaot gud nius blong Kingdom. Wan rod we oli folem blong mekem wok ya, hemia blong seremaot Baebol mo ol buk we oli givhan blong stadi Baebol. Be blong mekem samting ya, i nidim wan ogenaesesen.

Ol Witnes oli mas raetem ol Kristin buk, oli jekemap gud blong luk se i no gat mastik, oli prentem, mo oli sanem long ol kongregesen. Biaen, ol wanwan Kristin oli save givhan blong karem ol buk ya i go long ol man we oli wantem ridim. Long rod ya, mesej blong Kingdom i kasem plante milyan man. Ol man ya blong talemaot gud nius oli traehad blong mekem wok blong prij long wan fasin we i gat oda long hem. Oli mekem sua se oli prij long evri teritori. Blong mekem olsem, i nidim wan ogenaesesen.

From we “God i stap mekem i sem mak nomo long olgeta man,” ogenaesesen blong hem i mas tanem Baebol mo plante buk we oli tokbaot Baebol long defren lanwis. (Ol Wok 10:34) Naoia, yu save faenem magasin ya Wajtaoa long 132 lanwis mo fren blong hem Wekap! long 83 lanwis. Blong tanem ol buk ya, i nidim ol grup blong man raonabaot long wol we oli folem gudfala ogenaesesen.

Taem ol memba blong kongregesen oli go long ol miting mo ol asembli, oli kasem ol samting we i leftemap tingting blong olgeta. Long ol miting ya, oli harem ol tok blong Baebol we oli pulum intres, oli stadi Tok blong God tugeta, oli talem ol ekspiryens we i leftemap tingting, mo oli joen wetem ol narafala man blong God long prea. Mo olsem ol brata long faswan handred yia, oli harem gud tumas taem ol elda we oli stap goraon, oli visitim olgeta. Visit blong ol elda ya i mekem oli kam strong long saed blong bilif. Taswe, olgeta Kristin tede oli olsem ol sipsip blong “wan kampani nomo, we i gat wan man nomo blong lukaot long olgeta.”—Jon 10 :16.

I tru, olsem ol faswan Kristin, ol Witnes blong Jeova oli no stretgud olgeta. Nating se i olsem, oli traehad blong joengud mo wok tugeta. From samting ya, wok blong talemaot Kingdom i go kasem olgeta ples long wol.—Ol Wok 15:36-40; Efesas 4:13.

[Futnot]

[Tok blong pija long pej 31]

Olgeta Kristin tede oli olsem ol sipsip blong “wan kampani nomo we i gat wan man nomo blong lukaot long olgeta”