!I Gat Rod Blong Save Fiuja!

Plante man oli tinghevi long fiuja. Oli laekem blong mekem plan, yusum mane long waes fasin, mo oli laekem blong harem se oli sef. ?Be i gat rod blong sua gud se tumora bambae i olsem wanem?

OL MAN oli bin traehad long ol defren kaen rod blong faenemaot se bambae fiuja i olsem wanem. I gat ol sayentis we oli kolem olgeta olsem ol man blong stadi long fiuja. Olgeta ya oli lukluk ol smolsmol samting we oli stap hapen naoia mo oli yusum ol samting ya blong talemaot wanem bambae i kamaot long fiuja. Ol man blong ekonomi oli mekem sem mak long wok blong olgeta. Ol man blong stadi long ol sta, mo ol man blong talemaot samting we bambae i hapen, oli yusum ol pija blong rod we ol sta oli stap folem, oli lukluk long ol kristal bol, mo oli wok wetem ol rabis spirit, mo plante man oli stap folem olgeta. Wan eksampel, plante man oli save gud long franis man ya Nostradamus we i stap stadi long ol sta, nating se hem i ded blong plante handred yia finis.

Olgeta man ya oli mekem olsem se oli profet. Be i gat pruf se man i no save dipen long olgeta, mo oli mekem plante man i harem nogud. ?From wanem? From we oli ting nating long Jeova God mo Tok blong hem, Baebol. Taswe oli no naf blong ansa long ol bigfala kwestin olsem se: ‘?From wanem mi save sua se ol samting we Baebol i talemaot finis bambae oli mas kamtru? ?Olsem wanem ol samting ya oli joengud wetem stamba tingting we God i gat long ol man? ?Wanem gudfala samting we mi, mo famle blong mi, mifala i save kasem from ol profet tok ya?’ Baebol i ansarem ol kwestin ya.

I gat plante narafala samting tu, we i mekem se ol profet tok blong Baebol oli moa gud. Hem i no olsem ol stadi blong sta we man i mekem blong faenemaot samting we bambae i hapen long fiuja. Hem i letem man i fri blong jusum samting we hem i wantem blong mekem. Taswe, i no gat man we i kalabus long fasin ya se, fiuja blong hem oli makemaot finis. (Dutronome 30:19) Ol hanraet olsem hemia blong Nostradamus oli no gat mining. Mo antap long ol tok ya we oli no gat mining, i gat ol tokhaed mo ol tok blong pulum tingting mo filing blong man. Be profet tok blong Baebol i gat wan fandesen we i strong. Hem i eksplenem from wanem God bambae i mekem samting we hem i stap tingbaot blong mekem. (2 Kronikel 36:15) Mo ol profet tok blong God oli neva mestem, from we, “God . . . i no save giaman.’’ (Taetas 1:2) Taswe, ol man we oli letem tok blong God i lidim olgeta, oli gat wan laef we i fri long ol kaen giaman stori. Oli gat wan hapi laef we i gat mining. Oli no westem ol sas taem mo samting we oli gat blong ronem ol samting we oli no karem gudfala frut.—Ol Sam 25:12,13.

Olgeta samting ya, wetem sam narafala poen bakegen, oli bin kamaot long ol Distrik Asembli blong 1999/2000 we stamba blong hem se “Profet Tok We i Kamaot Long God.” Ol Witnes blong Jeova oli holem ol asembli ya long olgeta ples blong wol. Ol tok, ol inteviu, ol pleplei, mo wan drama blong Baebol, oli pulum tingting blong evriwan i go long nambawan presen long saed blong spirit we ol man oli kasem from we oli stadi long ol profet tok blong God, mo mekem i wok long laef blong olgeta. Haf we i kam biaen bambae i mekem yumi tingtingbak long sam bigfala poen blong asembli ya.