Man Blong Agens Hem i Luk Bigfala Laet

SOL i kros tumas long ol man we oli stap folem Jisas. Nating se hem i bin mekem bigfala trabol long ol man blong Jisas long Jerusalem, mo i bin stonem Steven i ded, Sol i no harem gud yet. Hem i wantem go moa, blong blokem olgeta fulwan. “Nao Sol i stap tok strong yet, i stap mekem promes blong kilim ol man blong Masta blong yumi oli ded. Nao hem i girap, i go luk hae pris, i askem long hem blong i raetem sam leta blong talemaot hem insaed long ol haos blong prea long ol laen blong Isrel long Damaskes. Ol leta ya oli givim raet long Sol, se sipos hem i faenem sam man we oli stap folem Rod blong Masta blong yumi, bambae hem i save holem olgeta. Nating we ol man no ol woman, be hem i gat raet blong pulum olgeta evriwan oli kam long Jerusalem.”—Ol Wok 9:1,2.

Taem Sol i wokbaot i go long Damaskes, ating hem i stap tingbaot olsem wanem hem i save mekem promes blong hem i kamtru. I sua se, raet we hae pris i givim long hem, bambae i mekem ol lida blong ol man Jiu oli rere blong wok wetem hem long ol bigfala komuniti blong ol man Jiu. Sol bambae i askem help blong olgeta.

Ating strong tingting blong Sol i stat kam antap moa, taem hem i kam klosap long Damaskes. Blong wokbaot long Jerusalem i go kasem Damaskes hemia samwe long 220 kilometa, mo i save tekem seven no eit dei. Taswe Sol i taed bigwan. Klosap long medel dei, wantaem nomo wan bigfala laet we i saen moa i winim san, i saen long Sol mo ol ples raonabaot long hem, nao hem i foldaon long graon. Hem i harem wan voes i tok long hem long lanwis Hibru i se: “!Sol! !Sol! ?Weswe yu stap mekem i nogud long mi olsem? Fasin ya i stap spolem yu nomo. Yu yu olsem buluk we taem man blong hem i stikim long stik we i sap, be i stap kikbak long stik ya, nao stik ya i stikim hem moa.” Sol i askem, “?Masta, yu yu hu ya?” Voes ya i ansa se: “Mi Jisas ya we yu yu stap mekem i nogud long mi. Be yu girap, yu stanap. Mi mi kamtru long yu olsem blong putumap yu, blong yu kam man blong wok blong mi. Yu yu mas talemaot long ol narafala man, ol samting ya we yu luk long mi tede, mo ol samting we bambae mi soemaot long yu. Mi bambae mi tekemaot yu long han blong ol laen blong Isrel, mo long han blong ol narafala man tu, we bambae mi sanem yu blong go talemaot mi long olgeta.” Nao Sol i askem se: “?Masta, bambae mi mekem olsem  wanem?” Jisas i talem: “Yu girap, yu wokbaot yu go long Damaskes. Nao long ples ya, bambae wan man i talemaot long yu olgeta samting we God i makemaot finis, blong bambae yu yu mekem.”—Ol Wok 9:3-6; 22:6-10; 26:13- 17.

Ol man we oli stap wokbaot wetem Sol, oli harem voes, be oli no luk man we i toktok, mo oli no kasem save long tok blong hem. From we laet ya i saen we i saen, taem Sol i stanap, hem i no moa save luk wan samting, ale ol narafala oli mas tekem han blong hem mo lidim hem. “Hem i stap tri dei we hem i no save luk wan samting. Mo long taem ya, hem i no kakae, mo hem i no dring.”—Ol Wok 9:7-9; 22: 11.

Tri Dei Blong Tingting Dip

Wan man we nem blong hem Judas, * i tekem Sol i kam long haos blong hem we i stap long rod we oli kolem Stret Rod. (Ol Wok 9:11) Rod ya—we long lanwis blong ol man Arab oli talem se Darb al-Mustaqim—i stap yet tede olsem big rod blong Damaskes. Tingbaot wanem tingting we Sol i gat taem hem i stap long haos blong Judas. Samting we i hapen long Sol i mekem se hem i blaen mo hem i sek bigwan. Naoia hem i gat taem blong tingting dip long mining blong ol samting ya.

Sol, we i man blong agens, i jes luk wan samting we hem wan i bin talem se i krangke. Jisas Kraes—man ya we i bin kasem jajmen long ol lida blong ol man Jiu, mo we ol man oli ‘lukluk nogud, mo tanem baksaed long hem’—!hem i laef! Antap long samting ya, !hem i stap stanap long raetsaed blong God long “delaet we i saen we i saen, we man i no save kam klosap long hem”! Jisas, hem nao i Mesaea. Steven mo ol narafala disaepol oli bin talem tru. (Aesea 53:3; Ol Wok 7:56; 1 Timoti 6:16) Sol hem i bin rong olgeta. !Jisas i talemaot se hem i stap wetem olgeta man ya we Sol i stap ronem olgeta! Naoia we samting ya i klia nomo, ?olsem wanem Sol i save gohed blong “kikbak long stik ya”? Nating we wan buluk i stronghed, be wan stik bambae i mas mekem hem i go long rod we masta blong hem i wantem. Taswe, sipos Sol i gohed blong agensem tok blong Jisas, bambae hem i spolem hem wan nomo.

From we Jisas hem i Mesaea, i min se, i no God we i panisim hem blong i ded. Nating se i olsem, Jeova i letem Jisas i safa mo i ded long wan fasin we i daonem hem, mo hem i kam aninit long panis ya blong Loa we i se: ‘Man we ol man oli kilim hem i ded, nao oli hangem bodi blong hem long wan wud, fasin ya i soemaot we Hae God nao i panisim hem.’ (Dutronome 21:23) Jisas i ded taem hem i hang long pos. Hem i no kasem panis ya from sin blong hem, from we hem i no gat sin nating. Be hem i ded from sin blong olgeta man. Biaen, Sol i eksplenem se: “Olgeta we oli ting se bambae oli save kasem laef from we oli stap folem Loa ya, God bambae i panisim olgeta. Baebol i talem se, ‘Ol man we oli no gohed blong obei long evri samting we oli raetem finis long buk blong Loa, God bambae i givim panis long olgeta.’ Nao i klia gud we man i no save kam stret man long fes blong God long fasin ya we hem i stap folem Loa ya . . . Be Kraes, hem i pemaot yumi finis, i tekemaot yumi long panis ya we yumi save kasem long fasin ya blong folem Loa, from hem i kam olsem man we God i panisim hem, mo God i mekem samting ya long hem from yumi. Hemia i olsem tok blong Baebol we i talem se, ‘Man we ol man oli kilim hem i ded, nao oli hangem bodi blong hem long wan wud, fasin ya i soemaot we Hae God nao i panisim hem.’”—Galesia 3:10- 13.

Sakrefaes blong Jisas i gat praes long hem blong pemaot ol man. Taem Jeova i akseptem sakrefaes ya i olsem se hem i nilim Loa ya wetem panis blong hem i go long wud ya. Nao from we Sol i kasem save long samting ya, hem i luksave se, fasin we Jisas i ded long pos, hemia i soemaot “waes blong God,” nating se ol man Jiu “oli harem olsem we i krangke nomo.” (1 Korin 1:18-25; Kolosi 2:14) Taswe, man i no save kam stret man long fes blong God from fasin blong folem Loa, be man i save sef from gladhat blong God nomo, we hem i soem long ol sinman olsem Sol. Ale, from samting ya, ol man we oli no stap aninit long Loa, olgeta tu oli gat jans blong kasem ol gudgudfala samting we God i stap givim. Mo naoia, Jisas i stap sanem Sol i go long ol man we oli no man Isrel.—Efesas 3:3-7.

Yumi no save se Sol i bin kasem save fulwan olgeta samting ya long taem we hem i harem tok blong Jisas mo i tanem tingting blong hem, no nogat. Be, Jisas i toktok wetem hem bakegen, maet i bitim wan taem, long saed blong wok ya we hem i mas go mekem long ol man we oli no laen blong Isrel. Mo tu, sam yia i pas bifo we tabu spirit i pusum Sol blong raetemdaon olgeta samting ya we oli bin hapen. (Ol Wok 22:17-21; Galesia 1:15-18; 2:1,2) Be, sam dei nomo i pas,  nao niufala Masta blong Sol i toktok long hem bakegen blong talem long hem sam narafala samting we hem i mas mekem.

Ananaeas i Visitim Hem

Afta we Jisas i toktok wetem Sol, hem i toktok wetem Ananaeas tu. Hem i talem se: “Yu girap, yu go long rod ya we nem blong hem ‘Stret rod’. Nao yu go long haos blong Judas, yu askem wan man Tasas, nem blong hem Sol. Hem i luk wan vison, mo long vison ya, hem i luk we yu yu go insaed long haos ya, yu putum han blong yu long hem, blong ae blong hem i kamgud bakegen. Mo naoia hem i stap prea.”—Ol Wok 9:11,12.

From we Ananaeas i save finis fasin blong Sol, i stret we hem i sapraes lelebet long ol tok ya blong Jisas. Hem i talem se: “Masta. Plante man oli stori long mi finis long man ya, mo oli talemaot ol rabis fasin we hem i stap mekem long ol man blong yu long Jerusalem. Mo hem i kam long ples ya, be ol jif pris oli givim raet long hem finis blong hem i holem olgeta man we oli stap prea long nem blong yu.” Be Jisas i talem long Ananaeas se: “Yu go, from we mi mi jusumaot hem finis, blong hem i man blong wok blong mi. Hem bambae i talemaot nem blong mi long ol man we oli no laen blong Isrel, mo long ol king, mo long ol laen blong Isrel tu.”—Ol Wok 9:13-15.

Nao tingting blong Ananaeas i kwaet, mo hem i go long haos we Jisas i talem. Afta we hem i faenem Sol mo i talem halo long hem, Ananaeas i putum han blong hem long Sol. Baebol i talem se: “Nao wantaem nomo, samting olsem skal blong fis i kamaot long ae blong Sol, i foldaon, mo ae blong hem i kamgud bakegen.” Nao Sol i rere blong lesin. Ananaeas i talem bakegen mining blong tok we Jisas i talem finis long Sol: “God ya blong ol olfala blong yumi, hem i jusumaot yu finis, blong yu bambae yu save ol samting we hem i wantem, mo blong yu luk Stret Man ya blong hem, mo blong yu harem tok blong hem long maot blong hem nomo. Ol samting ya we yu luk mo we yu harem, bambae yu mas talemaot long olgeta man, blong soemaot hem long olgeta. Mo naoia, i nogud blong yu stap wet. Yu girap, yu prea long Jisas, nao yu baptaes, yu letem hem i wasemaot ol sin blong yu.” Ale, ?Sol i mekem wanem? “Stret long taem ya hem i baptaes. Mo taem hem i kakae finis, hem i kam strong bakegen.”—Ol Wok 9:17-19; 22:12-16.

Baebol i no moa tokbaot Ananaeas bakegen, afta we hem i mekem wok ya we God i wantem hem blong mekem. Be, Sol i gohed blong mekem ol man we oli harem tok blong hem oli sapraes. Man ya, we fastaem hem i man blong agens, mo we i kam long Damaskes blong holem ol disaepol blong Jisas, !naoia hem i stat blong prij insaed long ol haos prea blong ol laen blong Isrel mo pruvum se Jisas i Mesaea!—Ol Wok 9: 20- 22.

“Aposol Blong Ol Man We Oli No Laen Blong Isrel”

Samting we i bin hapen long Sol long rod i go long Damaskes i jenisim tingting blong Sol. Nao, from we Sol i luksave se Jisas i Mesaea, hem i save pruvum se plante bilif mo profet tok we oli kamaot long Hibru haf blong Baebol, oli laenap wetem Jisas. Sol i luksave se Jisas i bin kamtru long hem, mo i ‘mekem hem i kam man blong hem’ mo i givim wok long hem blong kam ‘aposol long ol man we oli no laen blong Isrel.’ Ol samting ya oli jenisim laef blong Sol bigwan. (Filipae 3:12; Rom 11:13) Nao hem i tekem nem ya Pol, mo hem i wan aposol. Hem i kasem blesing mo paoa blong mekem wan nambawan wok we bambae i jenisim laef blong hem mo laef blong olgeta Kristin bifo i kam kasem tede.

Plante yia biaen, i gat sam man we oli tok agensem Pol, oli talem se hem i no gat raet blong stap olsem wan aposol. Be hem i stanap agens long tok ya mo i pruvum raet blong hem, taem hem i talem bakegen samting we i bin hapen long rod we i go long Damaskes. Hem i se: “?Yufala i ting se mi mi no aposol? !Mi mi luk Jisas, Masta ya blong yumi stret long ae blong mi!” Biaen, hem i tokbaot se Jisas i bin soem long sam narafala man we hem i laef bakegen. Ale, Sol (Pol) i talem se: “Nao biaen long olgeta ya, hem i kamtru long mi, we mi mi olsem wan pikinini we i no bon long stret taem blong hem.” (1 Korin 9:1; 15:8) From we Sol i luk vison blong Jisas we i stap long bigfala laet blong heven, i olsem we hem i kasem ona blong bon, no laef bakegen, olsem spirit man long heven finis, nating se i no stret taem blong hem yet.

Sol i luksave nambawan blesing we hem i kasem, mo hem i wok strong blong mekem laef blong hem i laenap wetem blesing ya. Hem i raetem se: “Mi mi daon moa long ol narafala aposol, mo i no stret nating blong ol man oli singaot mi, se aposol, from we fastaem, mi stap spolem ol man blong jos blong God. Be from we God i givhan long mi long gladhat blong hem . . . olsem, hemia i no blong nating nomo, i gat frut blong hem. Mi mi hadwok moa, mi winim ol narafala aposol ya.”—1 Korin 15:9, 10.

Olsem Sol, maet yu tingbaot taem we yu tu yu bin luksave se blong mekem God i glad, yu nidim blong jenisim sam tingting long saed blong skul we yu bin folem longtaem. Ating yu yu glad tumas from we Jeova i bin givhan long yu blong lanem trutok. Taem Sol i luk bigfala laet, mo i luksave wanem we hem i mas mekem, hem i no tektaem blong mekem samting ya. Mo hem i gohed blong mekem ol samting ya wetem strong tingting long ful laef blong hem. !Hemia wan nambawan eksampel blong olgeta man tede we oli wantem se Jeova i glad long olgeta!

[Futnot]

[Tok blong pija long pej 27]

Rod ya we oli kolem Stret Rod, olsem we i stap tede long Damaskes

[Credit Line]

Photo by ROLOC Color Slides