“Ol Gudgudfala Samting” Oli Stap Kam Fulap Long Haos Blong Jeova

“Bambae mi [Jeova, mi] winim olgeta narafala kantri, nao mi tekemaot ol gudgudfala samting blong olgeta, mi karem i kam, mi fulumap haos ya long hem.”—HAGAE 2:7.

1. ?Taem i gat wan trabol, from wanem yumi tingbaot fastaem olgeta we yumi laekem olgeta tumas?

 ?WANEM gudgudfala samting i fulap long haos blong yu? ?Yu yu gat ol sas jea mo tebel, wan spesel kompyuta, no wan niufala trak? Nomata we yu gat ol samting ya, maet yu yu agri se samting we i sas moa, hemia ol man we oli stap long haos blong yu—ol memba blong famle blong yu. Tingbaot se long wan naet, yu wekap mo yu harem smel blong smok blong faea. !Faea i stap bonem haos blong yu mo yu gat smoltaem nomo blong kamaot long haos ya! ?Bambae yu tingbaot wanem samting fastaem? ?Ol jea mo tebel blong yu? ?Kompyuta blong yu? ?Trak blong yu? ?Bambae yu no tingbaot fastaem olgeta we yu laekem olgeta tumas? Si, bambae yu tingbaot olgeta fastaem, from we laef blong man i sas moa i winim ol narafala samting.

2. ?Ol samting we Jeova i wokem oli plante olsem wanem, mo weswan long ol samting ya we Jisas i laekem moa?

² Naoia, tingbaot Jeova God mo Pikinini blong hem, Jisas Kraes. Jeova nao i “mekem skae mo graon mo solwota, mo evri samting we i stap long wol ya.” (Ol Wok 4:24) Tru long Pikinini blong hem, we i “nambawan man blong wok,” Jeova i wokem olgeta narafala samting. (Ol Proveb 8:30, 31; Jon 1:3; Kolosi 1:15-17) I sua se Jeova mo Jisas, tufala i tinghae long ol samting we tufala i wokem. (Skelem wetem Jenesis 1:31.) ?Be weswan long ol samting ya we tufala i luk se i sas moa? ?Olting no ol man? Jisas, we i nambawan man blong soem waes fasin, i talem se: “Mi hapi tumas blong luk ol man.” Baebol blong William F. Beck i tanem vas ya olsem se, Jisas i “haremgud tumas long ol man.”

3. ?Jeova i yusum Hagae blong talem wanem profet tok?

 ³ I klia se, long lukluk blong Jeova, ol man oli sas tumas. Yumi luk pruf blong samting ya long ol profet tok we hem i talem long yia 520 B.K.T. * Tru long profet Hagae, Jeova i talem se: “Bambae mi winim olgeta narafala kantri, nao mi tekemaot ol gudgudfala samting blong olgeta, mi karem i kam, mi fulumap haos ya long hem. . . . Niufala haos ya blong mi bambae i flas we i flas gud, i winim hemia blong fastaem.”—Hagae 2:7, 9.

4, 5. (a) ?From wanem i no stret blong talem se tok ya “ol gudgudfala samting” i minim ol naesfala samting long saed blong bodi? (b) ?Wanem ya “ol gudgudfala samting,” mo from wanem yu talem olsem?

⁴ ?Wanem ya “ol gudgudfala samting” we bambae oli fulumap mo oli flasem gud haos blong Jeova? ?Hemia ol flas jea mo tebel? ?Gol, silva, mo ol sas ston? Nogat, yumi no save talem se ol samting ya nao oli “ol gudgudfala samting.” Tingbaot olfala tempel we oli dediketem samwe long faef handred yia bifo. !Mane blong tempel ya i kasem plante bilyan vatu! * I sua se bambae Jeova i no askem long smol grup blong ol man Jiu we oli jes kambak long kantri blong olgeta, blong bildim wan tempel we i flas moa i winim tempel blong Solomon.

⁵ ?Nao, wanem ya “ol gudgudfala samting” we bambae oli fulumap haos blong Jeova? I klia se hem i ol man. Tingbaot, i no silva mo gol we i mekem hat blong Jeova i glad. Be hemia ol man we lav i pulum olgeta blong wosipim hem. (Ol Proveb 27:11; 1 Korin 10:26) Yes, long lukluk blong Jeova, ol man, woman, mo pikinini, we hem i agri long wosip blong olgeta, oli sas tumas. (Jon 4:23, 24) Hemia nao “ol gudgudfala samting,” mo long lukluk blong Jeova, ol man oli sas moa i winim ol nambawan samting we oli flasem tempel blong Solomon.

6. ?Tempel blong God bifo i blong mekem wanem?

⁶ Nating se i gat fasin agens, ol man Isrel oli finisim tempel long yia 515 B.K.T. Taem Jisas i givim laef blong hem olsem sakrefaes, tempel blong Jerusalem i stap yet olsem stamba ples we plante “gudgudfala samting” oli stap kam long hem blong mekem klin wosip. “Ol gudgudfala samting” long taem ya, hem i ol prapa man Jiu mo ol Proselaet we oli blong ol narafala nesen. Be tempel ya i pija blong wan samting we i bigwan moa. Bambae yumi luk.

Mining Blong Tempel Long Faswan Handred Yia

7. (a) ?Tempel blong God long Jerusalem bifo i pija blong wanem? (b) Tokbaot wok blong hae pris long Dei blong Stretem Sin.

⁷ Tempel long Jerusalem i pija blong wan plan blong wosip we i bigwan moa. Hemia tempel blong Jeova long saed blong spirit we Jeova i stanemap long yia 29 K.T. * Jisas nao i Hae Pris blong hem. (Hibrus 5:4-10; 9:11, 12) Tingbaot, ol wok we hae pris blong Isrel i mekem oli sem mak long wanem we Jisas i mekem. Evri yia, long Dei blong Stretem Sin, hae pris i go long olta we i stap long bigfala yad blong tempel mo i bonem wan buluk olsem sakrefaes blong tekemaot sin blong ol pris. Biaen, hem i tekem blad blong buluk ya mo i go insaed long tempel. Hem i pastru long doa we i seraotem bigfala yad wetem Tabu ples mo biaen hem i gotru long narafala kaliko, i go insaed long Rum ya we i Tabu we i Tabu. Taem hae pris i go insaed long Rum ya, hem i saksakem blad ya long fran blong bokis blong kontrak. Ale, folem sem rod ya, hem i bonem wan nani blong tekemaot sin blong ol 12 laen blong Isrel we oli no pris. (Levitikas 16:5-15) ?Olsem wanem samting ya i joen wetem tempel blong God long saed blong spirit?

8. (a) ?Olsem wanem Jisas i givim hem olsem sakrefaes stat long yia 29 K.T.? (b) ?Wanem spesel fasin fren we Jisas i gat wetem Jeova taem hem i stap mekem minista wok blong hem long wol ya?

⁸ Long olta ya we i olsem plan blong God, Jisas i givim hem wan olsem sakrefaes taem hem i baptaes mo God i makemaot hem wetem tabu spirit long yia 29 K.T. (Luk 3:21, 22) Yes, samting ya i makem stat blong wan laef we Jisas i givim olsem sakrefaes, we i stap tri yia haf. (Hibrus 10:5-10) Long taem ya, tabu spirit i makemaot Jisas mo hem i haremgud long wan nambawan fasin fren wetem God. I no gat wan man we i naf blong kasem save fulwan long nambawan fasin fren we Jisas i gat wetem Papa blong hem long heven. I olsem we kaliko i blokem ae blong olgeta, nao oli no luksave. Hemia i stret olsem kaliko we i blokem ol man we oli  stap long bigfala yad blong haos tapolen, blong oli no luk Tabu Ples.—Eksodas 40:28.

9. ?From wanem Jisas i no save go insaed long heven taem hem i gat bodi olsem man, mo olsem wanem rod i open blong hem i go long heven?

⁹ Nating se man ya Jisas i kam Pikinini blong God we tabu spirit i makemaot hem, hem i no save go yet long heven. ?From wanem? From we bodi we i gat mit mo blad i no save go insaed long Kingdom blong God long heven. (1 Korin 15:44, 50) Bodi blong Jisas we i gat mit mo blad i olsem samting we i blokem hem blong i no go long heven. Kaliko ya we i seraotem Tabu Ples mo Rum ya we i Tabu we i Tabu insaed long tempel blong God bifo, i pija blong samting ya. (Hibrus 10:20) Be tri dei afta we Jisas i ded, hem i laef bakegen olsem wan spirit man. (1 Pita 3:18) Long taem ya nao, hem i save go insaed long Rum we i Tabu we i Tabu long tempel blong God long saed blong spirit—hemia long heven. Mo hemia nao wanem we i hapen. Pol i raetem se: “Kraes i no go insaed long Rum we i Tabu, we ol man nomo oli stanemap, we i pija nomo blong prapa Rum we i Tabu. Be hem i go insaed long heven stret, mo naoia hem i stap stanap long fes blong God blong toktok long saed blong yumi.”—Hibrus 9:24.

10. ?Jisas i mekem wanem taem hem i go antap long heven?

¹⁰ Long heven, Jisas i ‘saksakem blad’ blong sakrefaes blong hem taem hem i givim praes blong laef blong hem i go long Jeova. Be, Jisas i mekem narafala samting bakegen. Smoltaem bifo we hem i ded, hem i talem long ol man blong hem se: “Bambae mi mi go mekemrere ples blong yufala. Mo from we mi go blong mekemrere ples blong yufala, bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.” (Jon 14:2, 3) Taswe, taem Jisas i go insaed long Rum ya we i Tabu we i Tabu, no heven, hem i openem rod long ol disaepol blong hem blong olgeta tu oli save go long ples ya. (Hibrus 6:19, 20) Namba blong olgeta ya i kasem 144,000. Bambae olgeta oli wok olsem ol pris aninit long Jisas insaed long tempel blong Jeova long saed blong spirit. (Revelesen 7:4; 14:1; 20:6) Long Isrel bifo, hae pris i tekem blad blong buluk, mo i go insaed long Rum ya we i Tabu we i Tabu, blong tekemaot sin blong ol pris fastaem. Jisas i mekem sem mak. Praes blong blad blong hem we i ron, i tekemaot sin blong ol 144,000 man fastaem. Hemia ol man we bambae oli wok wetem hem olsem pris. *

“Ol Gudgudfala Samting” Long Taem Blong Yumi

11. ?Nani we hae pris i givim olsem sakrefaes i blong tekemaot sin blong hu, mo samting ya i pija blong wanem?

¹¹ I luk olsem se wok ya blong hivimap ol tabu man i finis long 1935. * Be Jeova i no stop blong flasem haos blong hem. Bambae “ol gudgudfala samting”  oli gohed yet blong kam insaed long haos ya. Rimemba se hae pris i mas kilim tu anamol blong mekem sakrefaes—wan buluk we i blong tekemaot sin blong ol pris mo wan nani we i blong tekemaot sin blong ol laen blong Isrel we oli no pris. Ol pris oli pija blong ol tabu man we bambae oli stap wetem Jisas long Kingdom blong heven. ?Be ol narafala laen we oli no pris, oli pija blong hu? Yumi faenem ansa blong kwestin ya long tok blong Jisas long Jon 10:16, se: “Mi gat ol narafala sipsip bakegen we oli no blong yad ya. Bambae mi mas tekem olgeta tu oli kam. Olgeta ya tu bambae oli save harem voes blong mi, nao bambae olgeta sipsip ya evriwan oli kam wan kampani nomo, we i gat wan man nomo blong lukaot long olgeta.” Taswe, i gat tu grup blong man we oli kasem blesing from blad blong Jisas we i ron. Faswan grup, hemia ol Kristin we oli gat hop blong rul wetem Kraes long heven mo namba tu grup, hemia olgeta we oli gat hop blong laef foreva long paradaes long wol ya. I klia se, “ol gudgudfala samting” we profet tok blong Hagae i tokbaot i minim namba tu grup ya.—Maeka 4:1, 2; 1 Jon 2:1, 2.

12. ?Olsem wanem God i stap pulum plante “gudgudfala samting” oli kam long haos blong hem tede?

¹² “Ol gudgudfala samting” ya oli stap gohed yet blong fulumap haos blong Jeova. Long ol yia we oli jes pas, ol gavman long Is Yurop, sam haf blong Afrika, mo sam narafala kantri bakegen, oli tekemaot tabu we oli putum long wok blong prij. Olsem nao, gud nius blong Kingdom blong God we i stanap finis, i go kasem ol niufala ples. Taem olgeta we oli olsem ol gudgudfala samting oli kam insaed long plan ya we i olsem tempel blong Jeova, olgeta ya tu oli traehad blong obei long oda blong Jisas blong pulum moa man oli kam disaepol. (Matiu 28:19, 20) Taem oli stap mekem wok ya, oli faenem plante man, ol yangfala wetem ol olfala, we oli gat jans blong kam olsem “ol gudgudfala samting” we bambae i flasem gud haos blong Jeova. Bambae yumi luk sam eksampel we i soem se samting ya i stap kamtru naoia.

13. ?Olsem wanem wan smol gel long Bolivia i soem se hem i gat strong tingting blong talemaot mesej blong Kingdom?

¹³ Long Bolivia, i gat wan gel blong faef yia we  papa mama blong hem, tufala i Witnes blong Jeova. Gel ya i askem long tija sipos hem i save tekem wan wik blong spel from we i gat visit blong seket elda. ?From wanem hem i askem blong spel? Hem i wantem prij long fulwan spesel wik ya. Papa mama blong hem i sapraes tumas, be tufala i glad we hem i gat gudfala tingting olsem. Naoia smol gel ya i stap mekem faef Baebol stadi, mo sam long ol stadi ya oli stap kam long ol Kristin miting. Wantaem, hem i mekem se tija blong hem tu i kam long Haos Kingdom. Maet biaen, sam long ol Baebol studen blong hem bambae oli kam “ol gudgudfala samting” we bambae oli flasem gud haos blong Jeova.

14. ?Long Koria, olsem wanem wan sista i kasem blesing taem hem i gohed blong storeyan wetem wan we i olsem se hem i no intres?

¹⁴ Long Koria taem wan Kristin sista i stap wet long tren, hem i storeyan wetem wan studen we i stap lesin long iafon blong hem. Sista ya i askem long hem i se, “?Yu yu gat wan skul?” Studen ya i ansa, i se: “Mi no gat intres nating long eni skul.” Tok ya i no blokem sista ya. Hem i gohed se: “Taem ol yia oli stap pas, maet wan man i wantem jusum wan skul. Be sipos hem i no gat save long saed blong skul, maet hem i save jusum wan skul we i no stret.” Studen ya i soem intres, ale hem i lesin long sista blong yumi. Sista ya i soem buk ya Is There a Creator Who Cares About You? mo i talem se buk ya i save givhan long hem bigwan sipos hem i wantem jusum wan skul long fiuja. Studen ya i glad blong tekem buk ya. Wan wik biaen, hem i stat stadi wetem ol Witnes blong Jeova mo naoia i stap go long olgeta miting.

15. ?Olsem wanem wan yangfala gel long Japan i statem ol Baebol stadi, mo olsem wanem hem i kasem blesing from ol traehad blong hem?

¹⁵ Long Japan, Megumi we i gat 12 yia, i tingbaot skul olsem wan nambawan ples blong prij mo tijim ol narafala. Hem i bin statem plante Baebol stadi tu long skul. ?Olsem wanem Megumi i mekem samting ya? From we hem i stap ridim Baebol mo rerem miting blong hem long medel dei, plante taem ol fren blong hem long skul oli askem hem se hem i stap mekem wanem. Samfala oli askem Megumi se from wanem hem i no joen long sam pleplei long skul. Megumi i ansa long kwestin blong olgeta mo i talem long olgeta se God i gat wan nem. Plante taem samting ya i pulum intres blong olgeta we oli lesin long hem. Ale, hem i stadi Baebol wetem olgeta. Naoia Megumi i stap mekem 20 stadi—18 long olgeta oli ol fren blong hem long klas.

16. ?Olsem wanem wan brata long Kamerun i save statem Baebol stadi wetem samfala long grup blong ol man we oli jikim hem?

¹⁶ Long Kamerun, wan grup blong eit man we oli stap long ples blong wok oli singaot wan brata we i stap seremaot ol buk we oli tokbaot Baebol long ol man we oli stap pas. Ol man ya oli wantem jikim brata ya. Ale, oli askem long hem se from wanem hem i no bilif long Triniti, helfaea, mo sol we i no save ded. Brata blong yumi i yusum Baebol mo i ansa long ol kwestin blong olgeta. Frut we i kamaot se, tri long ol man ya oli agri blong stadi Baebol. Wan long olgeta, nem blong hem Daniel, i stat blong kam long ol miting mo i sakemaot olgeta samting long haos blong hem we oli joen wetem rabis spirit. (Revelesen 21:8) I no wan yia yet, hem i tekem baptaes.

17. ?Olsem wanem sam brata long El Salvado oli yusum waes fasin blong prij long wan man we bifo, i no wantem harem mesej blong Kingdom?

¹⁷ Long El Salvado, i gat wan man we i no laekem ol Witnes blong Jeova. Taem hem i luk se ol Witnes oli stap kam, hem i fasem dog blong hem we i denja tumas, long doa blong haos blong hem. Taem ol Witnes oli pas finis, hem i jes tekem dog ya i gobak insaed long haos blong hem. From samting ya, ol brata oli neva gat jans blong toktok wetem man ya. Ale wan dei, ol brata oli traem yusum wan rod we i defren. Oli save se man ya i save harem wanem we oli stap talem. Nao, oli mekem disisen blong prij long dog. Oli kam long haos ya,  oli talem halo long dog, mo oli talem se oli glad tumas long jans we oli gat blong toktok wetem hem. Oli tokbaot taem ya we bambae i gat wan paradaes long wol, we bambae i no gat wan man we i save kros—yes, long taem ya we ol anamol tu bambae oli stap long pis. Ale, oli talem tata long dog mo oli stat wokbaot long rod i go. Oli sapraes tumas se man ya i kamaot long haos blong hem mo i talem sore long olgeta from we hem i neva givim jans long ol Witnes blong toktok wetem hem. Hem i tekem sam magasin, mo oli statem Baebol stadi wetem hem. Naoia, man ya i wan brata blong yumi—!hem i wan long “ol gudgudfala samting” ya!

“Yufala i No Fraet”

18. ?Wanem ol problem we plante Kristin oli fesem, be Jeova i tingbaot ol man blong hem olsem wanem?

¹⁸ ?Yu yu stap joen long impoten wok ya blong talemaot Kingdom mo mekem disaepol? Sipos yes, hem i rili wan blesing. Yes, tru long wok ya nao Jeova i stap pulum “ol gudgudfala samting” oli kam long haos blong hem. (Jon 6:44) I tru, maet yu kam taed no tingting blong yu i foldaon. Samtaem, samfala—sam long olgeta ya tu we oli strong long wok blong Jeova—oli stap traehad blong winim filing ya se oli no naf. !Be yu no mas lego! Jeova i tingbaot ol wanwan man blong hem olsem gudfala samting, mo hem i wantem tumas blong mekem rod blong sevem yu.—2 Pita 3:9.

19. ?Tru long Hagae, Jeova i talem wanem tok we i leftemap tingting blong yumi, mo olsem wanem ol tok ya oli save givim paoa long yumi?

¹⁹ Taem yumi harem se tingting blong yumi i foldaon, maet from fasin agens no ol narafala samting oli mekem yumi harem nogud, tok we Jeova i talem long ol man Jiu i save givim paoa long yumi. Long Hagae 2:4-6, yumi ridim se: “‘Be yufala i no mas harem nogud from samting ya. Mi wantem se yufala evriwan i mas wok, from we mi mi stap wetem yufala. Bifo, taem ol olfala bubu blong yufala oli aot long Ijip, mi mi mekem promes wetem olgeta long taem ya, se oltaem bambae mi stap wetem olgeta mo wetem olgeta we bambae oli stap kamaot biaen long olgeta. Mo kam kasem tede, mi stap yet wetem yufala. From samting ya i gud yufala i no fraet. Mi mi Hae God, mi gat olgeta paoa, mo mi talem long yufala, se bambae i no longtaem, mi mekem heven mo wol ya mo solwota, olgeta evriwan i seksek.’” Makemgud se Jeova i no jes givim advaes long yumi blong kam strong, be hem i mekem yumi strong. ?Olsem wanem? Makem tok ya we i leftemap tingting se: “Mi mi stap wetem yufala.” !Bilif blong yumi i kam strong taem yumi luksave se Jeova i stap wetem yumi, nomata wanem traem we yumi fesem!—Rom 8:31.

20. ?Olsem wanem ol samting we oli flas gud oli stap kam fulap long haos blong Jeova long taem blong yumi?

²⁰ Tru ya, Jeova i pruvum se hem i stap wetem ol man blong hem. Yes, hem i mekem stret olsem tok we hem i talem tru long profet Hagae, se: “Niufala haos ya blong mi bambae i flas we i flas gud, i winim hemia blong fastaem . . . Mo bambae mi mekem we yufala i gat plante samting, mo bambae yufala i gat pis.” (Hagae 2:9) Tru ya, yumi save faenem samting we i flas gud insaed long tempel blong Jeova long saed blong spirit. Yes, evri yia, plante handred taosen man oli stap kam insaed long trufala wosip. Olgeta ya oli kakae gud long saed blong spirit, mo nating se wol ya i raf tumas, oli harem gud long pis we i bigwan olgeta. Long niufala wol nomo, bambae i gat pis we i bitim hemia.—Aesea 9:6, 7; Luk 12:42.

21. ?Yumi mas gat strong tingting blong mekem wanem?

²¹ Taem ya we bambae Jeova i seksekem ol nesen long Amageden i klosap nomo. (Revelesen 16:14, 16) From samting ya, i gud yumi yusum taem we i stap yet blong sevem moa man. I gud yumi kam strong mo putum ful tras blong yumi long Jeova. Yumi mas gat strong tingting blong gohed blong wosip long hem long bigfala tempel blong hem long saed blong spirit, mo gohed blong fulumap haos ya wetem “ol gudgudfala samting” go kasem we Jeova i talem se wok ya i finis.

[Ol futnot]

?Yu Yu Tingbaot?

• ?Long lukluk blong Jeova, wanem i sas moa i winim ol samting long wol ya?

• ?Wanem tu grup blong man we oli kasem blesing from blad blong Jisas we i ron?

• ?Hu ya “ol gudgudfala samting” we oli mas flasem gud haos blong Jeova?

• ?Wanem pruf i soem se profet tok blong Hagae i stap kamtru tede?

[Kwestin]

[Tok blong pija long pej 16]

(Lukluk niuspepa)

?Yu yu save wanem we tempel blong Jeova bifo i pija blong hem?

Rum we i Tabu we i Tabu

Kaliko

Rum we i Tabu

Vranda

Olta

Bigfala Yad

[Tok blong pija long pej 17]

Hae pris i givim wan buluk olsem sakrefaes blong tekemaot sin blong ol pris mo wan nani blong tekemaot sin blong ol laen blong Isrel we oli no pris

[Tok blong pija long pej 18]

Wok ya blong talemaot Kingdom long olgeta ples long wol i stap pulum plante man oli kam long haos blong Jeova