Profet Tok We i Kamaot Long God i Givim Hop Long  Saed Blong Fiuja

FROM Tok blong God, Tabu Baebol, ol trufala Kristin oli save lukluk i go long fiuja wetem bilif, hop, mo tingting ya se evri samting bambae i kam gud. Fasin fren blong olgeta wetem Jeova God i mekem se oli stap sef, oli wet blong lukluk wanem bambae i hapen. Tok we i openem Distrik Asembli ya “Profet Tok We i Kamaot Long God” i eksplenem se, blong plante yia, ol Witnes blong Jeova oli gat bigfala intres blong stadi long ol profet tok blong Baebol. Taswe, ?Jeova i rerem wanem i stap blong ol man blong hem long ol distrik asembli ya? Olgeta we oli kam, oli rere wetem Baebol blong olgeta, we oli rili wantem faenemaot samting ya. Ol haf we oli kam biaen oli karem stamba tok blong ol wanwan dei blong distrik asembli ya.

FASWAN DEI: Wokbaot Long Laet Blong Tok Blong God

Tok ya “Tok Blong God i Lidim Yumi Finis” i eksplenem se ol man blong Jeova oli olsem wan man we i statem wan trep long tudak blong naet. Taem san i stat kam antap, hem i save luk ol sado nomo, be taem san i saen bigwan stret antap long hem, hem i lukluk klia ol samting. Olsem we Ol Proveb 4:19 i talem finis, ol man blong Jeova oli save lukluk gud rod blong olgeta, aninit long laet blong san we hemia trutok we i kamaot long ol profet tok blong God. God i no letem olgeta blong oli foldaon long tudak long saed blong spirit.

Bigfala tingting long tok ya, “Lesingud Long Profet Tok Blong God” i mekem ol man we oli lesin oli tingbaot se, olgeta we oli stap dipen long Jeova oli no save harem nogud mo oli no blaen olsem ol man ya we oli stap folem ol giaman mesaea mo ol giaman profet. Hemia i defren olgeta wetem ol trufala man blong Mesaea, Jisas Kraes, we oli gat plante samting blong mekem tras blong olgeta i strong. Wan eksampel, merikel ya we bodi blong Jisas i jenis i kam narafala, i soemaot taem we bambae hem i King long Kingdom blong God. From we Jisas i kasem paoa long Kingdom long 1914, hem i “moningsta” we 2 Pita 1:19 i stap tokbaot. Brata we i givim tok i talem se: “Mesaea we hem i moningsta, i talemaot wan niufala dei, no wan taem, we i stap kam klia moa long olgeta we oli gat fasin obei.”

Program blong aftenun i stat wetem tok ya “Saenaot Olsem Ol Laet.” Hem i tokbaot bigwan Efesas 5:8, hemia we aposol Pol i givim advaes long yumi se “oltaem yufala i mas holem fasin blong man blong delaet long laef blong yufala.” Ol Kristin oli olsem laet, taem oli serem tok blong God wetem narafala, be tu, taem oli mekem ol tok blong Baebol i wok long laef blong olgeta olsem we Jisas i mekem.

Blong kam wan laet olsem, samting ya i minim se “Yumi Haremgud Blong Ridim Tok Blong God.” Hemia wan tok we i gat tri haf blong hem. Brata we i mekem faswan haf blong tok ya, i talem tok blong Abraham Lincoln, we i tokbaot Baebol se hem i “beswan presen we God i givim long man.” Biaen, brata ya i askem wan kwestin long olgeta we oli stap lesin. Hem i askem se fasin blong olgeta blong ridim Baebol i soemaot bigfala tangkiu we oli gat long Tok blong Jeova olsem wanem. Brata ya i leftemap tingting blong olgeta we oli stap lesin blong oli ridim gud Baebol, tekem taem blong mekem klia pija blong ol stori insaed long ol vas, mo blong joenem ol niufala poen wetem ol samting we oli lanem finis.

Seken haf blong tok ya i mekem poen ya i kam klia se yumi nidim blong stadi, i no blong stap rid nomo, sipos yumi wantem tekem “strong kakae” i go insaed long tingting blong yumi. (Hibrus 5:13,14) Brata we i givim tok ya i talem se fasin blong stadi i rili save bildimap yumi, sipos yumi ‘mekem hat blong yumi i rere’ fastaem, olsem Esra we i wan pris blong Isrel. (Esra 7:10, NW) ?Be from wanem nao stadi i impoten? Hemia from we fasin fren blong yumi wetem Jeova i dipen bigwan long samting ya. Taswe, Baebol stadi i mas wan samting we i impoten tumas, i mekem yumi glad, mo i mekem tingting i kam niuwan bakegen, nating se i nidim blong stretem tingting mo i nidim fasin traehad blong mekem. ?Olsem wanem yumi faenem taem blong mekem wan stadi we i gat mining? Brata we i givim namba tri haf blong tok ya i talem se hemia taem yumi ‘pemaot taem we yumi gat’ long ol narafala samting we oli no impoten tumas. (Efesas 5:16, NW) Yes, rod blong faenem taem hem i blong yusum gud ol taem we yumi gat finis.

Tok ya “God i Givim Paoa Long Man We i Taed” i makemgud se plante man oli taed tede. Taswe, blong kasem “paoa ya we i bigwan tumas” blong mekem Kristin minista wok blong yumi, yumi nidim blong dipen long Jeova. Hem i ‘stap givim paoa long olgeta we oli taed.’ (2 Korin 4:7; Aesea 40:29) Ol narafala samting we oli save halpem yumi blong kasem paoa, hemia Tok blong God, prea, Kristin kongregesen, fasin blong joen oltaem long wok blong prij, ol Kristin elda, mo eksampel blong ol narawan we oli holem strong long bilif. Stamba tok ya “Naoia i Stret Taem Blong Mekem Wok Olsem Tija” i soemaot klia se i nidim ol Kristin tija mo ol man blong prij. Yumi mas wok had blong bildimap fasin blong yumi blong “tijimgud olgeta” man.—2 Timoti 4:2.

Laswan tok blong dei ya, “Ol Man We Oli Agens Long God Bambae Oli No Save Win,” i tokbaot ol traehad we sam man oli mekem long samfala kantri blong giaman long ol man se ol Witnes blong Jeova oli wan grup we i denja. Be yumi no mas fraet, from we Aesea 54:17 i talem se: “Ol samting ya blong mekem faet oli no save mekem yufala i karekil. Mo bambae yufala i gat ansa tu blong givim long olgeta we oli gat poen long yufala. Yufala i man blong wok blong mi, mo bambae mi blokemgud yufala, mi mekem yufala i win. Mi mi Hae God, mo hemia tok blong mi.”

NAMBA TU DEI: Ol Samting We Oli Kam Klia Tru Long Profet Tok

Afta we oli storeyan long vas blong dei, evriwan oli glad blong harem wan narafala tok we i gat tri haf long hem, we taetel blong hem se “Leftemap Jeova Olsem Man Blong Karem Laet.” Faswan haf blong tok ya i soemaot se mak blong wan Kristin i blong leftemap Jeova taem hem i prij long evri ples. Seken  haf we i kam biaen i tokbaot nid blong pulum olgeta we oli intres i go long ogenaesesen blong Jeova. ?Olsem wanem blong mekem samting ya? Hemia taem yumi tekem faef no ten menet bifo no afta long stadi, blong soem olsem wanem ogenaesesen blong God i wok. Namba tri haf blong tok ya i makem klia se i impoten blong leftemap God, tru long ol gudfala wok we yumi mekem.

Tok ya “Yumi Laekem Tumas Ol Tok We Jeova i Talem Bakegen Mo Bakegen” i stanap long ol vas we oli stap long Ol Sam 119. I tru, yumi nidim blong harem samting bakegen mo bakegen, from we i isi blong yumi fogetem samting. !Taswe i impoten tumas se yumi laekem blong harem ol tok we Jeova i talem bakegen mo bakegen olsem man blong raetem Sam i mekem!

Biaen i gat wan spesel samting we i mekem plante oli glad—hemia tok blong baptaes we taetel blong hem “Obei Long Profet Tok i Lidim Man Long Baptaes.” Olgeta long grup blong baptaes oli harem bakegen se oli mas mekem i sem mak olsem Kraes, i no long baptaes nomo, be taem oli folem gud ol rod blong Kraes long laef blong olgeta tu. (1 Pita 2:21) Hemia wan bigfala jans we olgeta niuwan ya oli gat blong joen blong fulumap profet tok long Jon 10:16. Long vas ya, Jisas i talem se bambae hem i hivimap “ol narafala sipsip” blong wok klosap long ol disaepol blong hem we tabu spirit i makemaot olgeta.

Tok ya “Lesingud Long Tok We Tabu Spirit i Talem” we i statem program blong aftenun, i eksplenem gud se spirit blong Jeova i toktok long yumi tru long Baebol, “slef we i stret mo waes,” mo voes blong hat mo tingting we yumi trenem folem Baebol. (Matiu 24:45, NW) Taswe, ol Kristin oli no nidim blong harem wan voes we i kamaot stret long heven blong save olsem wanem blong mekem Jeova i glad. Narafala tok we i karem nem ya, “Stanap Strong Long Tijing We i Laenap Wetem Fasin Fasgud Long God,” i givim strong advaes long ol Kristin blong oli no traem faenemaot ol rabis tingting we wol i leftemap bigwan tede. I tru tumas, taem man i no bos long tingting blong hem mo i wantem tumas blong kasem save long evri samting we i stap kamaot raonabaot long hem, samting ya i save lidim hem blong kasem ol rabis tingting we ol man blong apostasi mo ol narafala man blong Setan oli stanemap. I moa gud blong ridim Baebol mo olgeta haf insaed long Wajtaoa mo Wekap! evri dei.

“Holemstrong Long Ol Gudfala Toktok,” hem i taetel blong nekis tok we i soemaot se i impoten blong save gud “stret toktok,” no stamba, blong trutok. (2 Timoti 1:13, Niutesteman Long Bislama) Kasem save long stret toktok ya i wan rod blong gat wan laef we God i glad long hem, be tu, hem i rod blong makemaot ol samting we oli no laenap wetem trutok.

Traem tingbaot se Jeova i lukluk yumi olsem we yumi naes tumas. !Hemia wan bigfala ona ya! Tok ya “Ol ‘Gudgudfala Samting’ Oli Fulumap Haos Blong Jeova” i stanap long profet tok blong Hagae. Hem i leftemap tingting bigwan, from we hem i mekem olgeta we oli lesin oli sua gud se, wanwan memba blong “bigfala kampani” oli naes long ae blong Jeova. (Revelesen 7:9) From samting ya, Jeova i no save spolem olgeta, taem we bambae hem i “seksekem” ol nesen long “bigfala trabol” we i stap kam. (Hagae 2:7, 21, 22; Matiu 24:21) Be naoia yet, ol man blong Jeova oli mas lukaot gud long saed blong spirit, olsem tok ya “Profet Tok i Givim Woning Blong Yumi Stap Wekapgud” i eksplenem. Brata we i mekem tok ya i talemaot tok blong Jisas we i se: “Nao from samting ya, yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem.” (Matiu 24:42) ?Olsem wanem yumi save stap wekap long saed blong spirit? Hemia taem yumi bisi long ol wok blong Jeova, gohed blong prea oltaem, mo stap wet blong luk bigfala dei ya blong Jeova.

Laswan tok blong dei ya taetel blong hem se “Profet Tok Long Taem Blong En.” Bambae yumi rimemba tok ya blong plante yia we i kam.?From wanem? From we brata we i givim tok ya i tokbaot niufala buk ya—Pay Attention to Daniel’s Prophecy! Brata ya i talem se: “Buk ya blong 320 pej wetem ol naesfala pija, i kavremap evri haf blong buk blong Daniel.” Bilif blong yumi i kam strong from we buk ya i pruvum se, Jeova i stap saenem laet long ol profet tok blong hem blong mekem oli kam klia.

NAMBA TRI DEI: Oltaem Profet Tok Blong God i Kamtru

Laswan dei blong asembli ya i stat wetem tok ya we i gat tri haf long hem, “Ol Profet Tok Long Stret Taem We God i Makemaot.” Trifala haf blong tok ya oli eksplenem trifala mesej we profet Habakuk i talemaot long saed blong jajmen we Jeova bambae i mekem. Faswan mesej i go agensem stronghed laen blong Juda, mo seken wan i go agensem Babilon we i stap mekem i strong tumas long narafala. Mo laswan mesej we bambae i mas kamtru yet, i go  agensem olgeta rabis man we i no longtaem bambae oli lus. Las haf blong ol tok ya we i gat tri haf blong hem, i tokbaot Amageden. Brata we i mekem tok ya i putum fasin blong fraetgud long Jeova i go insaed long tingting blong olgeta we oli lesin. Hem i talem se: “Tru tumas, i wan samting blong fraet mo blong sapraes, taem we Jeova bambae i soemaot fulwan bigfala paoa blong hem.”

“Gat Tangkiu From Presen We Yumi Kasem Long Saed Blong Spirit” hemia taetel blong drama ya we i kamaot long Baebol. Drama ya we i traem faenemaot samting we i stap dip insaed long yumi, i soemaot defren tingting we Jekob mo Esau tufala i soemaot long ol samting long saed blong spirit. Esau i ting nating long ol presen blong hem long saed blong spirit, taswe Jekob i kasem presen ya, from we hem i tinghevi long hem. Brata we i givim tok ya i askem long olgeta we oli stap long asembli se “?Wanem [ol presen long saed blong spirit] we Jeova i givim long yumi?” Hem i ansa se: “Trutok we i stap long Tok blong hem, Baebol; hop blong laef we i no save finis; mo ona we yumi gat blong mekem wok blong hem olsem ol man blong talemaot gud nius.”

Nekis tok i karem taetel ya se “?Presen Blong Yumi i Minim Wanem Long Yu?” Yumi soemaot stret tingting long ol presen long saed blong spirit, taem yumi putum wok blong Jeova mo ol blesing we yumi kasem long saed blong spirit, oli stap fastaem long prapa bisnes blong yumi no ol samting long saed blong bodi. Long rod ya yumi stanemap laef blong yumi long fasin fren blong yumi wetem Jeova. Samting ya i defren olgeta long Adam, Esau, mo ol man Isrel we oli no stap tru long God.

Pablik tok ya, “Wokem Ol Niufala Samting—Olsem Baebol i Bin Talemaot,” i joenem tugeta fo stamba profet tok we i tokbaot “niufala heven” mo “niufala wol.” (Aesea 65:17-25; 66:22-24; 2 Pita 3:13; Revelesen 21:1,3-5) I klia se, Jeova i stap tingbaot blong mekem ol profet tok ya oli kamtru bigwan moa. Hemia i bitim wanem we hem i bin mekem long ol man blong hem taem hem i sevem olgeta long 537 B.K.T. Yes, hem i stap tingbaot Kingdom gavman blong hem (“niufala heven”), mo ol man long wol we oli stap aninit long hem (“niufala wol”), we bambae oli save stap long wan naesfala paradaes we i kavremap ful wol.

Laswan tok we i finisim asembli ya, “Ol Samting We Yumi Wet Long Olgeta—Taem Tok Blong God i Lidim Yumi” i gat paoa we i wekemap tingting blong evriwan mo mekem oli glad bigwan. Hem i mekem evriwan i tingbaot bakegen se “yumi no gat plante taem i stap” blong finisim wok ya blong talemaot Kingdom. (1 Korin 7:29) Yes, yumi stap klosap nomo long taem ya we Jeova bambae i mekem strongfala jajmen blong hem i kamtru fulwan agensem Setan mo rabis wol blong hem. I gud we filing blong yumi i olsem man blong raetem Sam, we i singsing se: “Yumi ya, yumi putum tingting blong yumi i stap long Hae God. Hem i stap lukaot gud long yumi, mo i stap givhan long yumi.” (Ol Sam 33:20) !Wan nambawan promes i stap fored long olgeta we hop blong olgeta i stanap long ol profet tok blong God!

[Tok blong pija long pej 7]

Wan drama we i tajem hat i leftemap fasin tangkiu we ol man blong wok blong Jeova oli gat long ol presen long saed blong spirit

[Tok blong pija long pej 7]

Plante we oli obei long ol profet tok blong God oli tekem baptaes